ভাৰতীয়সকলৰ সুখ-সন্তুষ্টি হ্রাস পাইছে নেকি? বহুতে সুখ-দুখৰ মাজতে জীৱনক লৈ সন্তুষ্টি প্রকাশ কৰিলেও সামগ্রিকভাৱে ভাৰতীয়সকল অসুখী হোৱাৰ ইংগিত আকৌ স্পষ্ট হৈছে। চলিত ২০২৬ৰ বিশ্বৰ সুখ প্ৰতিবেদনত ভাৰতে ১১৬ সংখ্যক স্থানহে লাভ কৰিছে।
অর্থাৎ ভাৰতীয়সকলতকৈ বিশ্বৰ ১১৫ খন দেশৰ লোক অধিক সুখী। বিশ্বখ্যাত অক্সফ’র্ড বিশ্ববিদ্যালয়ৰ ৱেলবিং ৰিছাৰ্চ চেণ্টাৰে গল-আপ আৰু ৰাষ্ট্ৰসংঘৰ বহনক্ষম উন্নয়ন সমাধান নেটৱৰ্কৰ সহযোগত প্ৰকাশ কৰা এই প্রতিবেদনত আর্থিক অসমতা, সামাজিক সকাহ, জনমূৰি জিডিপি আদিক লক্ষ্য কৰি বিভিন্ন দেশক সুখ সূচকাংকত স্থান দিয়া হয়।
উল্লেখ্য যে সম্প্রতি ভাৰতৰ আৰ্থিক অসমতা হৈছে ৯২। একেদৰে সামাজিক সকাহৰ দিশৰ পৰা স্থান ১২৩ আৰু জনমূৰি দিশৰ পৰা জিডিপিৰ স্থান ৮৯। অর্থনীতিবিদসকলে জনমূৰি জিডিপিকহে এখন দেশ বা ৰাজ্যৰ উন্নয়নৰ প্ৰকৃত মাপকাঠি আখ্যা দিয়ে।
এই ক্ষেত্রত ভাৰতৰ অৱস্থা শোচনীয় দেখা গৈছে। একেদৰে দেশত ধনী আৰু দুখীয়াৰ মাজৰ ব্যৱধান বৃহৎ হাৰত বৃদ্ধি পাইছে। ফলত আর্থিক অসমতাই ৯২ক স্পৰ্শ কৰিছে। এনে কাৰকে সুখ সূচকাংকত ভাৰতৰ স্থান নিম্নগামী কৰি ৰাখিছে।
অৱশ্যে যোৱা বছৰতকৈ এইবাৰ সুখ প্রতিবেদনত দুটা স্থান উন্নীত হয় ভাৰতৰ। যোৱা বছৰ এই প্ৰতিবেদনত দেশৰ স্থান ১১৮ আছিল। আশ্চর্যজনক যে উক্ত প্রতিবেদনত ভাৰতীয়সকলতকৈ পাকিস্তানী আৰু নেপালীসকলক অধিক সুখী বুলি কোৱা হৈছে।
কাৰণ প্রতিবেদনখনত দুই চুবুৰীয়া দেশ নেপালে ৯৯ সংখ্যক আৰু পাকিস্তানে ১০৪ সংখ্যক স্থান লাভ কৰিছে। অৱশ্যে যোৱা বছৰ এই প্রতিবেদনত নেপালৰ স্থান ৯২ আছিল। গতিকে এই ক্ষেত্রত এই বছৰ দেশখনৰ অৱস্থাৰ অৱনতি ঘটে। ফলত এবছৰৰ ভিতৰতে দেশখনৰ স্থান অৱনমিত হৈ ৯৯ হৈছে।
আনহাতে, পাকিস্তানৰ স্থান এইবাৰ পাঁচ ঘৰ উন্নীত হয়। কাৰণ যোৱা বছৰ এই প্ৰতিবেদনত দেশখনৰ স্থান ১০৯ আছিল। অৱশ্যে ভাৰতৰ আন দুখন প্রতিবেশী দেশ শ্রীলংকা আৰু বাংলাদেশৰ স্থান ভাৰততকৈ তলত। প্রতিবেদনখনত দ্বীপৰাষ্ট্ৰ শ্রীলংকাই ১৩৪ আৰু বাংলাদেশে ১২৭ সংখ্যক স্থান লাভ কৰিছে।
একেদৰে ভাৰতৰ আন এখন প্রতিবেশী দেশ ম্যানমাৰে তালিকাখনত ১২৯ সংখ্যক স্থান দখল কৰিছে। অৱশ্যে যোৱা বছৰৰ এই তালিকাত ম্যানমাৰৰ স্থান ১৩৬ সংখ্যক আছিল। অর্থাৎ প্রতিবেদনখনত এইবাৰ দেশখনৰ সাতটা স্থান উন্নীত হয়। ভাৰতৰ আন এখন চুবুৰীয়া দেশ চীনে এইবাৰ প্রতিবেদনখনত ৬৫ সংখ্যক স্থান লাভ কৰিছে। যোৱা বছৰতকৈ দেশখনৰ তিনিটা স্থান উন্নীত হয়।
উল্লেখ্য যে আন্তর্জাতিক সুখ দিৱসৰ দিনা অর্থাৎ প্রতি বছৰে ২০ মাৰ্চত বিশ্ব সুখ প্রতিবেদন প্রকাশ পায়। এইবাৰৰ প্রতিবেদন ১৪০ খনৰো অধিক দেশক সামৰি প্ৰস্তুত কৰা হৈছে। এইবাৰৰ তালিকাখনত বিশ্বৰে সবাতোকৈ সুখী দেশৰ স্থান দখল কৰিছে ফিনলেণ্ডে। তাৰ পাছতে ডেনমার্ক, আইচলেণ্ড, ছুইডেন, নৰৱে আদি দেশে স্থান লাভ কৰিছে।
লক্ষ্যণীয়ভাবে বিশ্ব জনসংখ্যাৰ তেনেই নগণ্য সংখ্যকহে এই দেশসমূহত বাস কৰে। অর্থাৎ বিশ্বৰ মুঠ জনসংখ্যাৰ এমুঠিমানহে সুখী। তালিকাখনত এইবাৰো সবাতোকৈ শেষত স্থান লাভ কৰিছে যুদ্ধ-সংঘাত বিধ্বস্ত আফগানিস্তানে। লক্ষ্যণীয়ভাৱে বিশ্বৰে সৰ্ববৃহৎ শক্তি বুলি চিহ্নিত আমেৰিকা যুক্তৰাষ্ট্ৰই এই প্রতিবেদনত ২৪ সংখ্যক স্থানহে দখল কৰিবলৈ সক্ষম হৈছে। একেদৰে ৰাছিয়াই ৭৯ সংখ্যক স্থান দখল কৰিছে। এই বার্ষিক প্রতিবেদন প্রস্তুতত বহু সংখ্যক গৱেষক জড়িত হৈ আছে। প্রতিবেদনখন প্রস্তুত কৰোতে গৱেষকসকলে বিভিন্নজনৰ মতামতো গ্রহণ কৰে।