The Great Nest Defence:✒️কংক্রিটৰ জংঘল। চহৰত প্ৰতিদিনে বর্তি থকাৰ সংগ্ৰাম। এই সংগ্রাম কেৱল মানৱৰ মাজতে আবদ্ধ হৈ থকা নাই। বৰঞ্চ সমগ্ৰ জীৱকুলেই চহৰত জীয়াই থকাৰ সংগ্ৰামত ব্রতী হৈ আছে। চহৰত তিষ্ঠি থাকিবলৈ মানুহে প্রতি মুহূর্ততে সংগ্রাম কৰি আছে। ইয়াৰ সমান্তৰালকৈ যুঁজি আছে ক্ষুদ্রাদিক্ষুদ্র প্রাণীবোৰেও।
এই জীৱনযুদ্ধত বাচি থাকিবলৈ চহৰৰ পক্ষীবোৰ কিমান তৎপৰ, সেয়া জানিলে সকলোৱেই অবাক হ’ব। চহৰীয়া জীৱনত নিজক স্বাভাৱিক কৰি তোলাত ক্রমাৎ কৌশলী হৈ পৰিছে পক্ষীজগত।
সম্প্রতি একাংশ পক্ষীবিদৰ পর্যবেক্ষণত উঠি আহিছে এনে এক চমকপ্রদ তথ্য। চহৰত বাস কৰা ঘৰচিৰিকা, শালিকা, ফেচু প্রভৃতি সৰু আকাৰৰ চৰাইবোৰে সম্প্ৰতি বাহ সাজিবলৈ ব্যৱহাৰ কৰিছে মানুহে পেলাই দিয়া চিগাৰেটৰ ফিল্টাৰ বা অৱশিষ্টাংশ।
সাধাৰণ দৃষ্টিত ইয়াক পৰিৱেশ প্ৰদূষণৰ ফল বুলিয়েই ধাৰণা হ’ব পাৰে; কিন্তু ইয়াৰ নেপথ্যত আছে চৰাইবোৰৰ এক অদ্ভুত জীয়াই থকাৰ প্ৰবৃত্তি।
বিজ্ঞানীসকলে জনাইছে যে চহৰৰ বুকুত প্রাকৃতিক সুগন্ধিযুক্ত গছলতা বা ভেষজ উপাদানৰ অভাৱ প্রকট হৈছে। গ্রামাঞ্চলত বাস কৰা চৰাইবোৰে সাধাৰণতে পৰজীবী প্রাণী খেদিবলৈ সেই ধৰণৰ শিপা নাইবা গছলতাৰ পাত ব্যৱহাৰ কৰে। চহৰত ইয়াৰ অভাৱ পূৰণ কৰিছে চিগাৰেটৰ টুকুৰাই।
গৱেষণাত দেখা গৈছে যে চিগাৰেটৰ ফিল্টাৰত থকা নিকোটিনে এক প্ৰকাৰৰ প্ৰাকৃতিক কীটনাশকৰ কাম কৰে। ই চৰাইৰ বাহৰ ভিতৰত ক্ষুদ্র কীট, ওকণী, চাঁহি, ওৰহ বা অন্যান্য ক্ষতিকাৰক পৰজীৱীবোৰৰ বংশবৃদ্ধি ৰোধ কৰে।
ফলত পৰজীৱীৰ আক্ৰমণত পোৱালিবোৰ অসুস্থ হোৱাৰ আশংকা বহুখিনি হ্রাস পায়। ‘ছায়েন্টিফিক ৰিপ’ৰ্টছ’ত প্রকাশিত তথ্য অনুসৰি, যিবোৰ বাহত চিগাৰেটৰ টুকুৰা বেছিকৈ থাকে, তাত পৰজীৱীৰ উপদ্ৰৱ তুলনাত বহু কম হয়। কেৱল স্বাস্থ্য সুৰক্ষাই নহয়, তাপমাত্ৰাৰ ভাৰসাম্য বজাই ৰখাতো ই অতি কাৰ্যকাৰী। চিগাৰেটৰ ফিল্টাৰৰ চেলুলোজ ফাইবাৰ বা তন্তুৱে বৰ ভাল অন্তৰকৰ কাম কৰে।
ই নিশাৰ ঠাণ্ডাত বাহৰ ভিতৰ অংশ গৰম কৰি ৰাখে, যিটো পোৱালিবোৰ দ্রুত ডাঙৰ হৈ অহাৰ বাবে অতি জৰুৰী। অৰ্থাৎ, নগৰায়নৰ চাপত শ’লঠেকত পৰা চৰাইবোৰে মানুহৰ বৰ্জনীয় বস্তুকে নিজৰ ‘সুৰক্ষা বৰ্ম’ কৰি তুলিছে।
ইয়াৰ অৱশ্যে বিপৰীত দিশো আছে। নিকোটিনে পৰজীৱী খেদোৱাত সহায় কৰিলেও ইয়াৰ দীর্ঘম্যাদী বিষক্রিয়াই চৰাই পোৱালিৰ শৰীৰৰ কোষৰ ক্ষতি কৰিব পাৰে। গৱেষকৰ দলৰ মতে, ই এক প্ৰকাৰৰ বিৱৰ্তনীয় বুজাবুজি। এফালে পৰজীৱীৰ হাতৰ পৰা তাৎক্ষণিক মুক্তি, আনফালে বিষাক্ত ৰাসায়নিকৰ বিষবৃক্ষ। এই দুটাৰ মাজত ভাৰসাম্য বজাই ৰাখিয়েই তিষ্ঠি আছে চহৰৰ বাস্তুতন্ত্র।
চৰাইবোৰৰ এই আচৰণে প্ৰমাণ কৰে যে সিবোৰ পৰিৱেশৰ স’তে মানি লোৱাত কিমান দক্ষ। চহৰৰ প্ৰদূষিত পৰিৱেশত য’ত স্বাভাৱিক ৰচদৰ অভাৱ, তাত আবৰ্জনাৰ পৰাই সিহঁতে বিচাৰি লৈছে আগন্তুক দিনৰ দিশ।