ওদালগুৰিত এনডিএফবি(প্ৰ) সভাপতি গোবিন্দ বসুমতাৰীৰ সংবাদ মেল
ওদালগুৰি : এনডিএফবি(প্ৰ)ৰ মেৰু বিভাজনৰ পাছত আজি ওদালগুৰি সাপেখাইটিস্থিত এনডিএফবি(প্ৰ)ৰ ডেজিগনেটেড কেম্পত এক সংবাদমেল সম্বোধন কৰে সংগঠনটোৰ সভাপতি গোবিন্দ বসুমতাৰীয়ে। সংবাদমেলত বসুমতাৰীয়ে কেইবাটাও গুৰুত্বপূৰ্ণ মন্তব্য কৰি এইবাৰ বিটিএডি অঞ্চলত গুপ্ত হত্যাৰ উকমুকনিৰ কথাও উল্লেখ কৰে। তেওঁ কয় যে যোৱা নিশা কোকৰাঝাৰ জিলাৰ অতিৰিক্ত আৰক্ষী অধীক্ষক গৰাকীয়ে সংগঠনটোৰ কোকৰাঝাৰৰ এগৰাকী কেডাৰক লগ ধৰিবৰ বাবে পুৱতি নিশা ২ বজাৰ পৰা ৪ বজালৈ ফোনযোগে অশান্তি দি অহাৰ কথা উল্লেখ কৰি কয় যে মাজনিশা এনৈদৰে এগৰাকী কেডাৰক লগ ধৰিবলৈ বিচৰাটোৱে অন্য বিষয়ৰহে সুচনা কৰিছে। লগতে বসুমতাৰীয়ে কয় যে উক্ত কেডাৰজনে নিজৰ ফোন ৰিছিভ নকৰাত সংগঠনটোৰে আন এজন ৱাং নাৰ্জাৰী নামৰ কেডাৰৰ সৈতে অতিৰিক্ত আৰক্ষী অধীক্ষকগৰাকীয়ে ফোনত কথা পাতি আহিবলৈ কোৱাত পুৱতি নিশা প্ৰায় ২-৩০ বজাত কোকৰাঝাৰৰ চেৰফাংগুৰি আৰক্ষী থানাৰ ভাৰপ্ৰাপ্ত আৰক্ষী বিষয়া গৰাকীয়ে নাৰ্জাৰীক পাটগাওঁ সেনা শিৱিৰলৈ লৈ যায়। কিন্তু উক্ত সেনাৰ শিৱিৰটোত পূৰ্ৱৰেপৰা ৰাজ্যৰ মন্ত্ৰী চন্দন ব্ৰহ্মৰ লগতে আন কেইবাজনো যুৱক থকা বুলি জানিবলৈ দিয়ে সভাপতি বসুমতাৰীয়ে। পৰৱৰ্তী সময়ত মন্ত্ৰী ব্ৰহ্মই ৱাং নাৰ্জাৰী নামৰ কেডাৰজনৰ সৈতে কথা পাতি ব্ৰহ্মই এনডিএফবি(প্ৰ)ৰ এগৰাকী জেষ্ঠ্য নেতা চিলা বসুমতাৰীক ৱাং নাৰ্জাৰীৰ হতুৱাই সেই স্থানলৈ মাতি পঠিয়াবলৈ ক’লে। ইয়াৰ পাছত নাৰ্জাৰীয়ে চিলা বসুমতাৰীক মাতিবলৈ যাও বুলি কৈ কৌশলেৰে সেই স্থান ত্যাগ কৰে। এনে ঘটনাৰ বিষয়ে আজি অৱগত হৈ সমগ্ৰ ঘটনাক গৰিহনা দিয়াৰ লগতে এয়া এক গুপ্তহত্যাৰ উকমুকনি তথা ষড়যন্ত্ৰ বুলি আজিৰ সংবাদমেলত গোবিন্দ বসুমতাৰীয়ে জানিবলৈ দি কয় যে যদিহে কোনো সৎ কামৰ বাবে কেডাৰসকলক আৰক্ষী প্ৰশাসনৰ প্ৰয়োজন হৈছিল তেন্তে দিনৰ পৰিৱৰ্তে কিয় ৰাতি তেওঁলোকক মাতি লৈ যোৱা হ’ল বুলিও প্ৰশ্ন কৰে।
ইফালে কালি সদ্য বহিষ্কৃত নেতা ধীৰেণ বড়োৱে নতুনকৈ গঠন কৰা সমিতিখন সন্দৰ্ভত গোবিন্দ বসুমতাৰীয়ে মত ব্যক্ত কৰি কয় যে সংগঠনটোৰ সাধাৰণ সভাত বিগত জুন মাহৰ ৬ তাৰিখে ওদালগুৰিত নেচনেল কাউঞ্চিল গঠন কৰা হৈছিল। উক্ত সভাত ধীৰেণ বড়ো উপস্থিত থকাৰ কথা উল্লেখ কৰি বসুমতাৰীয়ে কয় যে কোনটো সংগঠন প্ৰকৃত আৰু কোনটো সংগঠন ডুব্লিকেট সেয়া ২৩ জুনত স্বাক্ষৰিত হোৱা যুদ্ধ বিৰতিৰ ম্যাদ বৃদ্ধিৰ পত্ৰখনত থকা স্বাক্ষৰেই প্ৰমাণ কৰে। লগতে বসুমতাৰীয়ে বিগত দহ বছৰে সভাপতিৰ পদত থকা ধীৰেণ বড়োৱে শান্তি আলোচনাৰ নামত বিশেষ একো নকৰিলে বুলি অভিযোগ কৰে। লগতে পূৰ্ৱৰ সভাপতিক দোষাৰোপ কৰি বসুমতাৰীয়ে আজিৰ সংবাদমেলত কয় যে বিগত দহটা বছৰে শান্তি আলোচনা সন্দৰ্ভত তৎপৰ নোহোৱা সভাপতি ধিশীৰেণ বড়ো কেৱল গান গোৱা আৰু চিনেমা বনোৱাতহে ব্যস্ত আছিল। ফলত শান্তি আলোচনাই কোনো বিশেষ ধৰণে গতি লাভ নকৰিলে। লগতে আজিৰ সংবাদমেলত বসুমতাৰীয়ে স্পষ্ট কৰি প্ৰকাশ কৰে যে ধীৰেণ বড়োৱে প্ৰচাৰ কৰাৰ দৰে হাগ্ৰামাক লগ ধৰিব যোৱা বাবে তেওঁক সংগঠনৰ পৰা বহিষ্কাৰ কৰা নাই। পূৰ্ৱৰে পৰা সংগঠনটোক দুভাগ কৰি নেতৃত্ব লোৱাৰ ষড়যন্ত্ৰ কৰাৰ বাবে ধীৰেণ বড়োক বহিষ্কাৰ কৰা হৈছে। সংগঠনটোৰ মেৰু বিভাজনত ৰাজ্যৰ মন্ত্ৰী চন্দন ব্ৰহ্ম জৰিত থকাৰ প্ৰমাণ শনিবাৰে বাক্সাৰ এটা ডিজিগনেটেড কেম্প দখল কৰা আৰু দেওবাৰৰ পুৱতি নিশা পাটগাওঁ সেনা শিৱিৰত মন্ত্ৰীগৰাকীৰ উপস্থিতিয়ে প্ৰমাণ কৰে। লগতে সংগঠনটোৰ ৭০% কেডাৰ ধীৰেণ বড়োৰ লগত যোৱা সম্পৰ্কে চলি থকা প্ৰচাৰ সম্পৰ্কত বসুমতাৰীয়ে প্ৰতিক্ৰিয়া প্ৰকাশ কৰি কয় যে সংগঠনটোৰ সৰ্বমুঠ কেডাৰ প্ৰায় ১১০০ জন মানৰ ভিতৰত মাত্ৰ ৫০ জনমান কেডাৰ ধীৰেণ বড়োৰ লগত যোৱা বুলি প্ৰকাশ কৰে ইয়াৰ ভিতৰৰ বহুকেইজনে পুনৰ গোবিন্দ বসুমতাৰীৰ সংগঠনলৈ আহিবলৈ যোগাযোগ কৰি থকা বুলিও সভাপতি বসুমতাৰীয়ে উল্লেখ কৰে। এন ডি এফ বি প্ৰগতিশীলৰ সভাপতি জনে বিটিচিত বাহুবল ব্যৱহাৰেৰে নিৰ্বাচনী বৈতৰনী পাৰ হোৱা উদ্দেশ্যৰে মন্ত্ৰী চন্দন ব্ৰহ্মই এন ডি এফ বিক বিভাজন কৰি সংগঠনটোক দুৰ্বল কৰাৰ অভিসন্ধি ৰচনাৰ লগতে ক্ষমতাৰ লোভত আৰু সংগঠনটোৰ আজীৱন সভাপতি হোৱাৰ স্বাৰ্থত ধীৰেন বড়োই অন্য এটা ভুৱা সংগঠন জন্ম দিয়াৰ অভিযোগ কৰে। লগতে আজিৰ সংবাদমেলৰ দ্বাৰা ৰাজ্য চৰকাৰখনক আহ্বান জনাই বসুমতাৰীয়ে কয় যে বাক্সাৰ দৰে ঘটনা যাতে কোকৰাঝাৰ আৰু ওদালগুৰিৰ ডেজিগনেটেড কেম্পত সংঘটিত নহয় তাৰ বাবে ৰাজ্য চৰকাৰৰ গৃহ বিভাগে দৃষ্টি দিয়াৰ লগতে বিভিন্ন কেম্পত থকা কেডাৰসকলক সুৰক্ষা দিয়াৰ ব্যৱস্থা কৰিবলৈ তেওঁ আহ্বান জনায়।
