তলাবন্ধ মোৰ বাবে এক নতুন অভিজ্ঞতা। তলাবন্ধ আৰম্ভ হোৱা দিনৰে পৰা বৰ্তমানলৈকে ইয়াক মই আতংকৰে গ্ৰহণ কৰিছো। আৰু এনেদৰে আজিলৈকে নিজকে ঘৰত আবদ্ধ কৰি আহিছো। মই বিশেষ কাম-কাজত নিজক ব্ৰতী কৰাব পৰা নাই। ভয়-শংকাৰ মাজতে সময় অতিবাহিত কৰিছো। চৰকাৰে যি নীতি-নিয়ম প্ৰৱৰ্তন কৰিছে, তাক মই ষোল অনাই পালন কৰি আছো। ইয়াৰ পৰিণতি সম্পৰ্কে মোৰ কোনো ধাৰণা নাই যদিও অনতি পলমে ইয়াৰ পৰা মুক্তি পাম বুলি আশা কৰিছো। খোৱা-লোৱা নিয়মিত ভাৱে কৰি আছো যদিও শান্তি পোৱা নাই। মানসিক শান্তি হেৰাই গৈছে। প্ৰতিটো মুহূৰ্ততে মোক মোক মৃত্যুৰ দূতে খেদি ফুৰিছে, কিন্তু উপায় নাই। পৰম পিতাৰ আমাৰ জীৱনলৈ এয়া এক অভিশাপ বুলিয়েই গ্ৰহণ কৰিছো। মই লিখা-মেলা বৰকৈ কৰিব পৰা নাই। দৰাচলতে এই সময়ছোৱাত কোনো কামলৈকে মন যোৱা নাই। তথাপি অকল মোৰেই নহয়, সমস্যাটো সমগ্র বিশ্বৰ মানুহে গ্ৰহণ কৰিবলৈ চেষ্টা কৰিছে। আৰু সময়ে সময়ে চৰকাৰে এই ক্ষেত্ৰত জাৰি কৰা নিৰ্দেশনা সমূহ সঠিকভাৱে পালন কৰিবলৈ যত্নপৰ হৈছো।
কৰ’না ভাইৰাছৰ সংক্ৰমণ প্ৰতিৰোধৰ বাবে অব্যাহত থকা তলাবন্ধৰ সময়ছোৱাত সাধ্যানুসাৰে ওচৰ চুবুৰীয়াৰ মাজত সাহায্য বিতৰণ কৰিছো। ভৱিষ্যতেও সাধ্যানুসাৰে দুৰ্গত সকলক সহায় কৰি যাম। এই সময়ছোৱাত বন্ধু- বান্ধৱৰ সৈতে মিলামিছা কৰিব পৰা নাই যদিও ফোন যোগে বাৰ্তালাপ কৰি আছো। তেনে বাৰ্তালাপে মোক আনন্দ দিছে। ছাত্ৰ- ছাত্ৰী সকলৰ কাৰণে কিবা উপায় উদ্ভাৱন কৰিব পাৰিলে তেওঁলোকৰ মংগল হ’ব। এই ক্ষেত্ৰত সংশ্লিষ্ট কৰ্তৃপক্ষই গুৰুত্ব দিব বুলি মই আশা কৰো। চৰকাৰৰ শেহতীয়া কাম কাজক লৈ ব্যক্তিগতভাৱে মই যথেষ্ট সুখী। বিশেষকৈ স্বাস্থ্যমন্ত্রী ড°হিমন্ত বিশ্ব শৰ্মাৰ প্ৰতি মই কৃতজ্ঞতা জ্ঞাপন কৰিছো । তেওঁৰ শুভবুদ্ধি, কৰ্মতৎপৰতা আমাৰ বাবে পাথেয় হ’ব।
কবিতা, গল্প লিখাটো মোৰ পুৰণি এক অভ্যাস, কিন্তু এই সময়ছোৱাত যথাযোগ্য লেখা-মেলা কৰিব পৰা নাই যদিও তাৰ মাজতে দুই-চাৰিটা কবিতা, গল্প আৰু এখন নাটক লিখি আছো। তলাবন্ধৰ সময়ছোৱাত এই কাম সমাপ্ত কৰিম বুলি লক্ষ্য নিৰ্ধাৰণ কৰিছো। মোৰ পৰিয়ালৰ প্রতিজন সদস্যই আশাবাদী যে অতি সোনকালে আমাৰ মাজলৈ শুভদিন আহিব। ইয়াৰ বাবে আমি কেৱল ধৈৰ্যৰে অপেক্ষা কৰিব লাগিব। এইকেইটা দিনত দৈনিক অগ্ৰদূত, ‘দৈনিক অসম’, আৰু নিয়মীয়া বাৰ্তাই ইমান সকাহ দিছে যে এই তিনিখন বাতৰি কাকত পঢ়ি সময় অতিবাহিত কৰিছো। সংকটৰ এই মুহূৰ্তত বাতৰি কাকতে গ্ৰহণ কৰা ভূমিকা আমি আন্তৰিকতাৰে শলাগ লৈ বাতৰি কাকতৰ প্ৰতিজন কৰ্ম কৰ্তা লৈ অভিনন্দন জজ্ঞাপন কৰিছো এই ছেগতে।
ব্যক্তিগতভাৱে এই তলাবন্ধৰ সময়ছোৱাত বাহিৰলৈকে যাবলগীয়া হোৱা নাই। প্ৰয়োজনীয় দৰবকে ধৰি অন্যান্য সা-সামগ্ৰীসমূহ আন আন সহযোগী সকলে ঘৰতে পোৱাৰ ব্যৱস্থা কৰিছে। মোৰ বয়সৰ প্ৰতি লক্ষ্য কৰিয়ে ময়ো ঘৰতে আছো এই সময়ছোৱাত। শেষত পৰম পিতাৰ ওচৰত প্ৰাৰ্থনা জনাইছো যাতে এই সন্ত্ৰাসৰ পৰা সোনকালে আমাক মুক্ত কৰক।