আজি বলীউডৰ অভিনেতা চনু সুডৰ জন্মদিন । প্ৰথমতে চনুলৈ জন্মদিনৰ বহুত শুভেচ্ছা ৷ বলীউডৰ অভিনেতা চনু সুডক সাম্প্ৰতিক সময়ত ছবিৰ হিৰোতকৈ এগৰাকী বাস্তৱৰ হিৰো হিচাপে পৰিচিত ৷ কাৰণ যিধৰণে মহামাৰী কৰ’নাৰ সময়ত চনুৱে বহিঃৰাজ্যত আৱদ্ধ হৈ থকা শ্ৰমিকসকলক নিজ ৰাজ্যলৈ আনিলে সেয়া সচাঁকৈয়ে প্ৰশংসনীয় । চনুৱে বহিঃৰাজ্যৰ আৱদ্ধ লোকসকলক বিনামূলীয়াকৈ খাদ্য সামগ্ৰী যোগান ধৰাৰ লগতে বাছ, ট্ৰেইনৰো যোগান ধৰে ।
শেহতীয়াকৈ চনুৱে ইজৰাইলত বন্দী হৈ থকা ভাৰতীয়সকলক দেশলৈ অহাত সহায় কৰে । চনুৰ মানৱতা কেৱল বহিঃৰাজ্যৰ লোকসকলক নিজ ৰাজ্যত উপস্থিত কৰোৱাতেই সীমাবদ্ধ হৈ থকা নাই । বহু নিবনুৱাক নিযুক্তিও দিছে চনুৱে ৷ লগতে অলপতে এজন কৃষকক এখন ট্ৰেক্টৰো প্ৰদান কৰে চনুৱে । ৰূপালী পৰ্দাত সততে ভিলেইনৰ ভূমিকাত অৱতীৰ্ণ হোৱা চনু বাস্তৱৰ এগৰাকী হিৰো । সেয়া ইতিমধ্যে চনুৱে প্ৰমাণ কৰিছে ৷ আৰ্তজনক চনুৱে কৰা সহায়ৰ বাবে দেশবাসীৰ লগতে বিশ্ববাসীৰ কাৰণে চনু হৈ পৰিছে হিয়াৰ আমঠু ৷ কোনোৱে যদি চনুৰ কাৰণে ব্যৱসায়িক প্ৰতিষ্ঠান খুলিছে । আন কোনোৱা আকৌ টাটু আকিছে চনুৰ নামত ৷
সম্প্ৰতি ইজৰাইলত চনুৰ কাৰণে “চনু সুড ছবি মহোৎসৱ” অনুষ্ঠিত কৰিব অনুৰাগীসকলে ৷ ইজৰাইলৰ এটা প্ৰতিষ্ঠিত চেনেলে চনুৰ সকলো শ্ৰেষ্ঠ ছবিৰ প্ৰিমিয়াৰ কৰিব ৷ চনুৱে ইতিমধ্যে প্ৰায় ৬ টা ভাষাত প্ৰায় ৬০ খন ছবিত অভিনয় কৰিছে । ইজৰাইলৰ অনুৰাগীৰ মৰম দেখি অভিভূত হৈ চনুৱে কয় “মোৰ জন্মদিনটো বিশেষভাৱে উদযাপন কৰা ইজৰাইলৰ সকলো অনুৰাগীলৈ মোৰ বহুত মৰম জনালো ৷ মই ভাৰতৰ লগতে বিদেশতো এনেধৰণে মৰম বুটলিবলৈ সক্ষম হৈ নিজকে বহুত সৌভাগ্যৱান অনুভৱ কৰিছো ৷
উল্লেখযোগ্য যে বলীউডৰ অভিনেতা চনু সুডে চিম্বা, হেপী নিউ ইয়েৰ, দাবাং, কুংফু য়োগাৰ লগতে বহুতো ছুপাৰহিট ছবিত অভিনয় কৰিছে । আন্তৰাষ্ট্ৰীয় অভিনেতা জেকি চেনৰ লগত চনুৱে কুংফু য়োগাত বিশেষ ভূমিকাত অভিনয় কৰিছিল ।