অন্য ৰাজ্যত ক’ভিড সংক্ৰমণ হ্ৰাস পালেও গুৱাহাটীত হ্ৰাস পোৱা নাই সংক্ৰমণ । কালিৰ দিনটোত কেৱল গুৱাহাটীতে ১৬৪জন লোক ক’ভিড-১৯ত আক্ৰান্ত হৈছে ।
এই সন্দৰ্ভত আজি ৰাজ্যৰ স্বাস্থ্যমন্ত্ৰী কেশৱ মহন্তই এখন সংবাদমেল আয়োজন কৰে । সংবাদমেলত মন্ত্ৰীগৰাকীয়ে প্ৰশাসনে মহানগৰীত সংক্ৰমণ ৰোধ কৰিবলৈ গ্ৰহণ কৰা বিভিন্ন ব্যৱস্থাৰ বিষয়ে জনায় ।
মহানগৰীত সংক্ৰমণ ৰোধ কৰিবলৈ ভোটাৰ তালিকাখনকে মূল তথ্য হিচাপে লৈ মহানগৰ প্ৰশাসনে বিভিন্ন পদক্ষেপ গ্ৰহণ কৰিছে । মহানগৰত ১২০৪টা ভোট কেন্দ্ৰ আছে আৰু ইয়াৰ বিপৰীতে ১২০৪টা ভোটাৰ তালিকা । ভোট কেন্দ্ৰৰ ১২০৪ জন ব্লক লেবেল বিষয়াক দুই পৰ্যায়ত প্ৰশিক্ষণ দিয়াৰ লগতে এখন ফৰ্ম দিয়া হৈছে ।
গাঁও অঞ্চলত গাঁওবুঢ়া আৰু আশাকৰ্মী আৰু চহৰ অঞ্চলত আশাকৰ্মী আৰু নাগৰিক সমিতিয়ে নিৰ্বাচন কৰি দিয়া এজন বা দুজন লোক এই ব্যৱস্থাত জড়িত হ’ব । তিনিজনীয়া একোটাকৈ দলে মহানগৰবাসীৰ ঘৰে ঘৰে যোৱা আৰম্ভ কৰিছে । তেওঁলোকক তিনিদিন সময়সীমা দিয়া হৈছে । এই সময়সীমাৰ ভিতৰতে অৰ্থাৎ ২৩ আগষ্টৰ ভিতৰত নিজৰ নিজৰ ভোটকেন্দ্ৰৰৰ প্ৰতিখন ঘৰত গৈ সমাপ্ত কৰিব লাগিব । এই দলে কাৰোবাৰ ঘৰত যদি কোনো লোক ভেকচিন নোলোৱাকৈ আছে তেন্তে ফৰ্মখন ফিলাপ কৰি তেওঁলোকৰ ফোন নম্বৰেৰে স’তে লৈ আহিব ।
২৪ আগষ্টত এই তথ্যসমূহ সম্পাদনা কৰা হ’ব । যদি সম্ভৱ হয় ২৫ আগষ্ট তাৰিখে নিৰ্দিষ্ট ভোট কেন্দ্ৰসমূহতে ভেকচিন দিয়াৰ ব্যৱস্থা কৰা হ’ব । ২৫-৩১ আগষ্টলৈকে এই লোকসকলৰ ভেকচিন প্ৰক্ৰিয়া সম্পন্ন কৰাৰ লক্ষ্য স্থিৰ কৰা হৈছে । সম্পূৰ্ণ প্ৰক্ৰিয়াটো পৰিচালনা কৰিব মহানগৰৰ উপায়ুক্তই ।
আজি প্ৰশাসনৰ তৰফৰ পৰা এটা ফোন নম্বৰ প্ৰকাশ কৰা হৈছে ‘৮৯২৯১০৩৭৭৬’ এই নম্বৰটোত মহানগৰবাসীয়ে ‘মিছ কল’ মাৰিব পাৰিব । নম্বৰটোত ‘মিছ কল’ মাৰিলেই তেওঁলোকে ক’ত প্ৰতিষেধক ল’ব পাৰিব জনায় দিয়া হ’ব ।
সকলো বাণিজ্যিক-প্ৰতিষ্ঠানে ভেকচিনেচনৰ ‘ছেল্ফ ডিক্লেৰেচন’ দিব লাগিব; অৰ্থাৎ তেওঁলোকে দোকান বা মলৰ বাহিৰত লগাব লাগিব ‘উই আৰ ভেকচিনেটেড’ । তেওঁলোকৰ হাতত উপযুক্ত প্ৰমাণপত্ৰও থাকিব লাগিব ।
লগতে স্বাস্থ্য মন্ত্ৰীগৰাকীয়ে মহানগৰবাসীক প্ৰশাসনৰ পদক্ষেপক সহযোগ কৰিবলৈ আহ্বান জনায়, অন্যথা প্ৰশাসনে অধিক কঠোৰ পদক্ষেপ গ্ৰহণ কৰিবলৈ বাধ্য হ’ব বুলিও সঁকিয়নী দিয়ে ।