৪১ নং ভৱানীপুৰ বিধানসভা সমষ্টিৰ উপ নিৰ্বাচনত মিত্ৰজোঁটৰ প্ৰাৰ্থী ফনীধৰ তালুকদাৰৰ সমৰ্থনত বিজেপি আৰু ইউপিপিএলৰ উদ্যোগত নিৰ্বাচনী প্ৰচাৰ ক্ৰমাৎ জোৰদাৰ হৈ উঠিছে । উল্লেখ্য যে কালি সন্ধিয়াৰ ভাগত ভৱানীপুৰ বিধানসভা সমষ্টিৰ অন্তৰ্গত তথা বাগসাৰ শালবাৰীত উপস্থিত হয় বিটিচিৰ মুখ্য কাৰ্যবাহী তথা ইউপিপিএলৰ সভাপতি প্ৰমোদ বড়ো, ইউপিপিএলৰ কাৰ্যকৰী সভাপতি ৰৌণগৌৰা নাৰ্জাৰী, বিধায়ক ভূপেন বড়ো, বিধায়ক তথা মুখ্যমন্ত্ৰী হিমন্ত বিশ্ব শৰ্মাৰ ৰাজনৈতিক সচিব জয়ন্ত মল্ল বৰুৱা, বড়ো কছাৰী স্বায়ত্ব শাসিত পৰিষদৰ কাৰ্যবাহী সদস্য মহীপাল বড়োৰ লগতে দুয়োটা দলৰ বহুসংখ্যক শীৰ্ষ নেতা ।
নিশাৰ ভাগলৈ শালবাৰীৰ ৰাজহুৱা প্ৰেক্ষাগৃহত ইউপিপিএলৰ উদ্যোগত অনুষ্ঠিত এখন সভাত ভাষণ দি বিটিচিৰ মুখ্য কাৰ্যবাহী প্ৰমোদ বড়োৱে কয় যে অসমৰ মিত্ৰজোঁট চৰকাৰখনে ৰাইজৰ সমস্যা সমাধান আৰু উন্নয়নৰ ক্ষেত্ৰত বলিষ্ঠ পদক্ষেপ গ্ৰহণ কৰাৰ বাবেই সৰ্বস্তৰৰ ৰাইজ চৰকাৰখনৰ প্ৰতি বহু আকৰ্ষিত হৈছে । অসমত মিত্ৰজোঁট আৰু বিটিচিত বিজেপি – ইউপিপিএলৰ ৰসায়ন মিলিছে । বিটিচিত বিজেপি – ইউপিপিএলৰ ৰসায়ন, অসমত মিত্ৰজোঁটৰ ৰসায়ন ৰাইজৰ উন্নয়নৰ বাবে । মিত্ৰজোঁটক ৰোধ কৰাৰ ক্ষেত্ৰত বিৰোধী শক্তিহীন ৷
সভাত ইউপিপিএলৰ কাৰ্যকৰী সভাপতি ৰৌণগৌৰা নাৰ্জাৰীয়ে তেওঁৰ ভাষণত কয় যে উপ নিৰ্বাচনত পাঁচখন আসনৰ পাঁচখনতেই বিৰোধীয়ে নূন্যতম ভোট লাভ কৰি বিধ্বস্ত হ’ব । অকল উপ নিৰ্বাচনতেই নহয়, অসমৰ পৰৱৰ্তী সময়ত সকলোবোৰ নিৰ্বাচনতেই মিত্ৰজোঁটৰ জয়যাত্ৰা অব্যাহত থাকিব ৷ ভৱানীপুৰ বিধানসভা সমষ্টিত মিত্ৰজোঁটৰ প্ৰাৰ্থী ফনীধৰ তালুকদাৰে অভিলেখ সংখ্যক ভোটেৰে বিজয়ী হোৱাটো নিশ্চিত বুলিও দাবী কৰে নাৰ্জাৰীয়ে ।
ইউপিপিএলৰ শালবাৰী জিলা সমিতিৰ সভাপতি বিকণ গয়াৰীৰ সভাপতিত্বত অনুষ্ঠিত সভাখনত বিধায়ক জয়ন্ত মল্ল বৰুৱা, বিধায়ক ভূপেন বড়ো, বড়ো কছাৰী স্বায়ত্ব শাসিত পৰিষদৰ কাৰ্যবাহী সদস্য মহীপাল বড়োৱে ভৱানীপুৰ বিধানসভা সমষ্টিত মিত্ৰজোঁটৰ প্ৰাৰ্থী ফনীধৰ তালুকদাৰৰ বিজয়ী নিশ্চিত বুলি দাবী কৰে । লগতে ইউপিপিএলৰ মহিলা কোষৰ কেন্দ্ৰীয় সাধাৰণ সম্পাদিকা বিউটি বসুমতাৰী, দলৰ শালবাৰী জিলা সমিতিৰ উপ সভাপতি সুৰেশ সৰকাৰ, সাধাৰণ সম্পাদক প্ৰদীপ সৰকাৰ, দলৰ যুৱ কোষৰ শালবাৰী জিলা সমিতিৰ সভাপতি সত্যজিৎ বড়ো, শালবাৰী সমষ্টিৰ টিচিএলচিচিৰ অধ্যক্ষ বিনোদ মুছাহাৰীকে ধৰি কেবাগৰাকীও বিজেপি আৰু ইউপিপিএলৰ নেতা উপস্থিত থাকে ।
উল্লেখ্য যে ভৱানীপুৰ বিধানসভা সমষ্টিৰ অন্তৰ্গত বিটিএডিৰ ছখন ভিচিডিচিৰ বিষয়ববীয়া, দলৰ বিভিন্ন ব্লক, প্ৰাইমাৰী, বুথ কমিটীৰ বিষয়ববীয়াসহ সহস্ৰাধিক ইউপিপিএলৰ নেতা কৰ্মীৰ স’তে মত বিনিময় কৰি প্ৰমোদ বড়ো, ৰৌণগৌৰা নাৰ্জাৰী, জয়ন্ত মল্ল বৰুৱা, ভূপেন বড়ো, মহীপাল বড়োৰ লগতে ইউপিপিএল আৰু বিজেপিৰ নেতৃবৃন্দই মিত্ৰজোঁটৰ প্ৰাৰ্থী ফনীধৰ তালুকদাৰৰ সমৰ্থনত ৰাইজৰ মাজত জোৰদাৰ প্ৰচাৰ অভিযান চলোৱাৰ নিৰ্দেশ দিয়ে ।
ইফালে আজি বড়ো কছাৰী স্বায়ত্ব শাসিত পৰিষদৰ কাৰ্যবাহী সদস্য মহীপাল বড়োৰ নেতৃত্বত ভৱানীপুৰ বিধানসভা সমষ্টিৰ অন্তৰ্গত বড়ো অধ্যুষিত অঞ্চলত মিত্ৰজোঁটৰ প্ৰাৰ্থী ফনীধৰ তালুকদাৰৰ হৈ জোৰদাৰ নিৰ্বাচনী প্ৰচাৰ চলায় । তদুপৰি বিজেপি বিধায়ক জয়ন্ত মল্ল বৰুৱাৰ নেতৃত্বতো ফনীধৰ তালুকদাৰৰ সমৰ্থনত জোৰদাৰ নিৰ্বাচনী প্ৰচাৰ চলায় ।
