তেজপুৰৰ ঢেকিয়াল গাঁৱৰ জ্যোতিনগৰত কালি দিনৰ পৰা আৰম্ভ হোৱা শিল,ভঙা ইটা নিক্ষেপৰ ঘটনাকলৈ অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে ৷
তেজপুৰৰ চহৰৰ গাতে লাগি থকা এই অঞ্চলটোৰ বিপিন দাস নামৰ পৰিয়ালটোৰ চোতালত কালি দিনৰ প্ৰায় ১২-৩০ বজাৰ পৰা আৰম্ভ হয় এই ঘটনা ৷
অজ্ঞাত স্হানৰ পৰা পৰা আহি পৰিয়ালটোৰ চোতালত তথা কাষৰ মানুহৰ ঘৰৰ দৰজাত উফৰি পৰিছেহি যথেষ্ট ডাঙৰ আকৃতিৰ পাথৰ আৰু ইটাৰ টুকুৰা ৷
এনে উফৰি পৰা শিলে পথেদি গৈ থকা এগৰাকী যুৱতীৰ ভৰিতো আঘাত কৰিছে৷উল্লেখযোগ্য যে,কালি দুপৰীয়াৰ পৰা আৰম্ভ হোৱা এই শিলাবৰ্ষণৰ দিনৰ প্ৰায় দুই বজালৈকে চলাৰ পাছত সাম কাটে য’দিও পুনৰ বিয়লি তিনিমান বজাৰ পৰা আৰম্ভ হয় ৷
সেইবাৰ এইঘটনা সন্ধিয়া প্ৰায় ছয় বজালৈকে চলে৷নিশা পুনৰ ১০বজাত এইঘটনাৰ পুণৰাবৃত্তি ঘটে নিশা ১২বজা পৰ্যন্ত৷এনে নাভূত নাশ্ৰুত কাণ্ডত পৰিয়ালটো আতংকিত হৈ পৰে ৷
এটা দৰিদ্ৰ সীমাৰেখাৰ তলৰ পৰিয়ালটোৰ বাসগৃহত সংঘটিত এই ঘটনাত বিনিদ্ৰ ৰজনী অতিবাহিত কৰে সদস্য সকলে৷নিশা চেগাচোৰোকাকৈ এনে ঘটনা ঘটি থকাৰ পাছত পুৱতি নিশা তিনিমান বজাত পুণৰ সাম কাটে য’দিও আজি পুৱা প্ৰায় আঠ বজাৰ পৰা আকৌ আৰম্ভ হয় একেই কাণ্ড ৷
এই বিষয়ে স্হানীয় সংবাদকৰ্মী সকল অৱগত হৈ ঘটনাস্থলীত উপস্থিত হোৱাৰ সময়ত শিলবৰ্ষণ বন্ধ হয়৷কিন্তু সংবাদকৰ্মী সকল পৰিয়ালটোৰ চৌহৰ পৰা আহি পদুলিত ৰোৱাৰ সময়তে পুণৰ পাতলীয়া ভাবে একেদৰেই শিল আহি পৰেহি পৰিয়ালটোৰ বাসগৃহ চোতালত ৷
উল্লেখযোগ্য যে,এই শিলাবৰ্ষণৰ ঘটনা প্ৰত্যক্ষ কৰা দাস আৰু একাংশ লোকে সদৰি কৰা মতে,যথেষ্ট উচ্চতালৈ দলিয়াই দিয়া শিলবোৰ উভটি আহি পৰেহি পৰিয়ালটোৰ চৌহদত৷একাংশ লোকে প্ৰকাশ কৰা মতে এই ঘটনা কোনো অচিনাক্ত দুস্কৃতিকাৰীয়ে পৰিয়ালটোৰ বাসগৃহৰ সমীপৰ পৰাই সংঘটিত কৰিছে ৷
আকস্মিক ভাবে আৰম্ভ হোৱা এই ঘটনাকলৈ ভুক্তভোগী পৰিয়ালটো আতংকিত হৈ পৰাৰ লগতে একাংশই এয়া ভৌতিক কাৰ্য বুলি প্ৰচাৰ চলোৱাই নহয়,আজি সংবাদকৰ্মী উপস্থিত থকাৰ সময়তে তাত উপস্থিত হয়হি এজন অচিনাক্ত ব্যক্তি ৷
ব্যক্তিজনে পৰিয়ালটোক এয়া এক ভৌতিক ঘটনা বুলি পতিয়ন নিয়াবলৈ অপচেষ্টা চলোৱাৰ লগতে এই বিপদ দূৰীকৰণৰ বাবে তেওঁৰ চিনাকী বেজ অনাৰ বাবেও পৰিয়ালটোক পতিয়ন নিওৱাৰ চেষ্টা কৰে৷তাৰ বাবে যথেষ্ট ধনৰো প্ৰয়োজন হ’ব বুলি আতংকগ্ৰস্হ পৰিয়ালটোৰ মুৰব্বী দাসক কৈ থকাৰ সময়তে সংবাদকৰ্মী কাষচাপি অহাত অচিনাক্ত লোকজনে ঘটনাস্থলী ত্যাগ কৰে ৷
উল্লেখযোগ্য যে, অঞ্চলটোত এটা পথ নিৰ্মাণৰ কাম চলি আছে আৰু পথত ব্যৱহাৰ কৰিবলৈ অনা পাত্থৰেই এই দুস্কাৰ্যত ব্যৱহাৰ কৰিছে অজ্ঞাত দুস্কৃতিকাৰীয়ে৷উল্লেখযোগ্য যে, এই ঘটনাৰ বিষয়ে এইপৰ্যন্ত পৰিয়ালটো আৰক্ষীৰ কাষ চপা নাই আৰু স্হানীয় একাংশই এই ঘটনাক কোনো দুস্কৃতিকাৰীৰ কাৰ্যতকৈ এক ভৌতিক কাণ্ড হিচাপে প্ৰতিষ্ঠা কৰাত অধিক গুৰুত্ব আৰোপ কৰিছে ৷
