Special compound in Tezpur that is safe for wild birds:
তেজপুৰৰ ৰঙাপুখুৰীপাৰ অঞ্চলৰ এটা চৌহদ ৷ চৌহদটো আৱৰি আছে বিভিন্ন গছ বিৰিখে ৷ সন্মুখত পকা অমিতা,ডালিম আদি ফলমূলৰ গছ ৷ চৌহদটোৰ কাষ চপাৰ লগে লগেই শুনিবলৈ পোৱা যায় বিভিন্ন চৰাইৰ সুললিত মাত ৷ আকাশত মুক্তমনে উৰি ফুৰা বিহংগৰ বাবে এক নিৰাপদ জিৰণি স্হল এই চৌহদটো ৷ ইয়াত ক্ৰমান্বয়ে সংখ্যা হ্ৰাস হোৱা ডাউক,
ঘৰচিৰিকা,টোকোৰা,টুনী,কপৌ,দহিকটৰা,কানকুৰিকা,বালিমাহি,শালিকা,ফেচুলুকা আদি বিভিন্ন চৰায়ে কাহিলি পুৱাতে কোৰাছ গাইহি ৷ অঞ্চলটোৰ দীনেশ কুমাৰ শৰ্মা আৰু প্ৰতিমা শৰ্মাই এইদৰেই বিগত প্ৰায় ১৬টা বছৰে এজাক বনৰীয়া পক্ষীৰ স’তে বন্ধুত্ব বৰ্তাই ৰাখিছে ৷ এইজাক চৰাইৰ মাজতে এতিয়া লগ হৈছেহি এজনী কুলী চৰাই ৷ শৰ্মা দম্পতীৰ ঘৰৰ এই চৌহদটোৰ চাৰিওকাষে থকা গছ -গছনিত চৰাইবোৰে আহি পুৱাই ভিৰ কৰেহি ৷ পুৱা প্ৰায় ছয় বজাত সিহঁতে সিহঁতৰ পৰিচিত শৰ্মা দম্পতীক বিচাৰি কোঢ়াল কৰে ৷ সিহঁতৰ কিচিৰমিছিৰ সংগীতৰেই যেন এই চৌহদটোত ৰাতিপুৱাই ৷
এখন দলাত ধান বা চাউল লৈ ওলাই অহা শৰ্মা দম্পতীয়ে চোতালত সিঁচি দিয়া সেই খাদ্যৰ বাবে সিহঁত চোতাললৈ নামি আহে ৷ ২০০৮ৰ পৰাই এইদৰেই এইখন চোতালত সিহঁতবোৰে ৰাজত্ব চলাইছে ৷ জাকজাক চৰাইৰ এই মিঠা কোলাহল যদি নিৰ্দিষ্ট সময়ত নুশুনে তেনেহলে শৰ্মা দম্পতী উদিগ্ন হৈ পৰে ৷
উল্লেখযোগ্য যে,খেৰী ঘৰৰ অভাৱ তথা সকলোতে ক্ৰমান্বয়ে ক্ৰংকিটে আৱৰি ধৰাৰ সময়তে মোবাইল ফোনৰ টাৱাৰ আৰু ইয়াৰ পৰা নিৰ্গত ত্বৰংগই ঘৰচিৰিকাৰ দৰে চৰাই- চিৰিকটিৰ বাবে দুৰ্যোগ কঢ়িয়াই অনা বুলি চলা চৰ্চাৰ পৰাই দীনেশ কুমাৰ শৰ্মাই ঘৰচিৰিকা চৰাইৰ সংৰক্ষণৰ বাবে নীৰৱে কাম আৰম্ভ কৰে ৷ নিজা বাসগৃহৰ চৌপাশে সিহঁতৰ বাবে ভালে সংখ্যক বাঁহ সাজি দিয়াৰ পিছত ইয়াত এযোৰ দোযোৰকৈ ভালেসংখ্যক ঘৰচিৰিকাই থাকিবলৈ ল’লে ৷
কিন্তু ক্ৰমান্বয়ে ঘৰচিৰিকাৰ লগতে আগমন ঘটিল দহিকতৰা,তুনী,টোকোৰাকে ধৰি বিভিন্ন চৰাইৰ ৷ বৃদ্ধিপালে কপৌৰ সংখ্যাও ৷ সময় অনুসৰি,টোকোৰা,তুনী চৰাই গুছি যায় যদিও ঘৰচিৰিকা,শালিকা,কপৌ,দহিকতৰা আদি স্হায়ীভাবেই থাকিবলৈ ল’লে শৰ্মাৰ চৌহদটোত ৷ তেওঁলোকে পুৱা সিহঁতক নিয়মীয়াকৈ আহাৰ দিয়াৰ পিছতে সিহঁতে উৰি যায় আন স্হানলৈ ৷ দুপৰীয়া পুনৰ ঘূৰি আহি হুলস্থূল আৰম্ভ কৰি দিয়ে ৷
পুনৰ সিহঁতৰ ভাগৰ আহাৰ খোৱাৰ পিচত সন্ধিয়া সিহঁতৰ বাঁহলৈ যোৱাৰ পূৰ্বে আকৌ এবাৰ আহে এইখন ঘৰৰ চোতাললৈ ৷ দিনটোৰ তিনিটা বেলাত এইদৰে সিহঁতক আহাৰ যোগান ধৰে শৰ্মা দম্পতীয়ে ৷ চৰাইজাকক লৈ ব্যস্ত থকা এই দুজন লোকে কয় যে,এতিয়া কেবাটাও ঢোৰা কাউৰিও আহে ৷ কাষতে এজোপা গছত আছে এযোৰ চিলনী ৷
চিলনী হালৰ বাবেই সেইজোপা গছ কটা হোৱা নাই ৷ মাজতে গছজোপাত চিলনী থকাৰ বিষয়ে নজনাৰ বাবে গছজোপা কাটিবলৈ লোৱাৰ সময়তে চিলনীয়ে যি দৰে হাঁহাকাৰ কৰিলে,লগে লগে গছজোপা কটাটো বন্ধ কৰা হ’ল ৷ তেতিয়াৰ পৰাই ইয়াতে সুৰক্ষিতে আছে চিলনীৰ পৰিয়াল ৷ শৰ্মাৰ ঘৰৰ পকা অমিতা,ডালিমৰ ওপৰত কেৱল চৰাইৰ অধিকাৰ ৷ সেয়া চায়েই ভাল পাই তেওঁলোকে ৷
শালিকা,দহিকটৰা জাকৰ লগতে কাউৰিৰ আকৌ দাবী আৰু বেলেগ ৷ পুৱা চাহ পান কৰাৰ সময়ত ৰুটিৰ ভাগ সিহঁতক যদি দিয়া নহয়,তেনেহলে সিহঁতে উৎপাত কৰে ৷ হাতৰ প্লেট খঙতে পেলাই দিয়ে শৰ্মা দম্পতীৰ পৰা ৷ দুই সন্তানৰ লগতে শৰ্মা দম্পতীয়ে এইদৰেই চৰাইৰ জাকৰ সংখ্যা যোৱা সময়চোৱাত বৃদ্ধি পোৱাটো লক্ষ্য কৰাৰ লগতে তেওঁলোকৰ এই চৌহদৰ পৰা চৰাইবোৰৰ বহুকেইটা প্ৰজন্ম ডাঙৰ হোৱা দেখিছে ৷ নৰীয়া পক্ষীৰ বাবে নিৰাপদ এই চৌহদটোৰ লগতে আশে পাশে সেয়ে দিনটোৰ সকলো সময়তে বিৰাজ কৰে চৰাই চিৰিকটিৰ কাকলিৰ এক অনন্য প্ৰাকৃতিক পৰিৱেশ ৷