ওদালগুৰি অসামৰিক চিকিৎসালয়ৰ বিৰুদ্ধে চলি অহা দীৰ্ঘদিনীয়া অভিযোগ আজি উদঙালে এবছুৰ কেন্দ্ৰীয় সভাপতি দ্বিপেন বড়োৱে। স্বাস্থ্য পৰীক্ষাৰ বাবে চিকৎসালয়খনলৈ গৈ চিকিৎসকৰ অভাৱত ঘণ্টাৰ পাছত ঘণ্টা অপেক্ষা কৰিবলীয়া হ’ল এবছু সভাপতি গৰাকী।
ফলত চিকিৎসালখনৰ চিকিৎসা সেৱাৰ বিৰুদ্ধে জাঙুৰ খাই উঠে বড়ো। উল্লেখযোগ্য যে এবছুৰ কেন্দ্ৰীয় সভাপতি দ্বিপেন বড়োৱে আজি নিজৰ স্বাস্থ্য পৰীক্ষাৰ বাবে দিনৰ প্ৰায় ১-১৫ বজাত উপস্থিত হৈছিল ওদালগুৰি অসামৰিক চিকিৎসালয়খনত।
বড়োৱে চিকিৎসালয়খনত চিটিস্কেন কৰাৰ উদ্দেশ্যে চিকিৎসালয় কৰ্তৃপক্ষৰ পৰা কুপন লৈ চিকিৎসক বিচাৰি হাবাথুৰি খায়। ঘণ্টাৰ পাছত ঘণ্টা অপেক্ষা কৰাৰ পাছতো কোনো চিকিৎসক উপস্থিত নোহোৱাত অৱশেষত চিকিৎসালয়খনৰ অধীক্ষকগৰাকীক অভিযোগ দিয়ে।
ইয়াৰ পাছতে অধীক্ষকগৰাকীৰ নিৰ্দেশত এগৰাকী চিকিৎসকে ততাতয়াকৈ চিকিৎসালয়খনত উপস্থিত হৈ যাৱতীয় ব্যৱস্থা গ্ৰহণ কৰে। অৱশেষত কেইৱাঘণ্টা জুৰি কৰা অপেক্ষাৰ অন্তত সভাপতি বড়োৱে চিকিৎসালয়খনত চিটিস্কেন কৰিবলৈ সক্ষম হয়।
ইয়াৰ পাছত চিকিৎসালয়খনৰ বিৰুদ্ধে ক্ষোভিত হৈ পৰে এবছুৰ কেন্দ্ৰীয় সভাপতিগৰাকী। এই সন্দৰ্ভত সাংবাদিকৰ সন্মুখত প্ৰকাশ কৰি বড়োৱে কয় যে “আজি মই নিজৰ স্বাস্থ্য পৰীক্ষাৰ বাবে ওদালগুৰি অসামৰিক চিকিৎসালয়লৈ আহিছিলো। মই ১-১৫ বজাত চিকিৎসালয়খনত উপস্থিত হৈছিলো যদিও চিকিৎসালয়খনৰ বহিঃ বিভাগত কোনো এগৰাকী চিকিৎসক নাই। নিয়মানুসৰি দিনৰ দুই বজা পৰ্যন্ত চৰকাৰী চিকিৎসালয়ৰ বহিঃ বিভাগত চিকিৎসক উপস্থিত থাকিব লাগে।
তথ্য অনুসৰি আজিও বহিঃ বিভাগত দুগৰাকীকৈ চিকিৎসক দ্বায়িত্বত আছে যদিও বৰ্তমান কৰ্তব্যত উপস্থিত নাই। মই আচৰিত হৈছো যে সকলো বিভাগৰ চিকিৎসক থকাৰ পাছতো দিনৰ এক বজা পৰ্যন্ত চিকিৎসালয়খনত কোনো চিকিৎসক উপস্থিত নাথাকিলে সাধাৰণ ৰাইজৰ কি অৱস্থা হ’ব।
ইয়াৰ পূৰ্ৱেও বহু লোকে অভিযোগ দিছিল যে সময়মতে চিকিৎসালয়খনত চিকিৎসক উপস্থিত নাথাকে। গতিকে অসমৰ স্বাস্থ্যমন্ত্ৰী, বিটিআৰ মুৰব্বী প্ৰমোদ বড়ো, স্থানীয় বিধায়ক, জিলা উপায়ুক্তক আহ্বান জনাও যে চিকিৎসালয়খনৰ ক্ষেত্ৰত বিহিত ব্যৱস্থা গ্ৰহণ কৰক।
এখন চৰকাৰী চিকিৎসালয়ত সময়মতে চিকিৎসক উপস্থিত থাকিবই লাগিব। তেতিয়াহে সাধাৰণ ৰাইজ উপকৃত হব। আজিৰ এই ঘটনা অতিকৈ নিন্দনীয়। ৰাইজৰ দিৰ্ঘদিনীয়া অভিযোগ আজি মই স্বচক্ষে দেখিবলৈ পালো।
গতিকে আগন্তুক দিনত যাতে এনে ঘটনা সংঘটিত নহয় তাৰ বাবে চিকিৎসালয়খনৰ চিকিৎসকলে সঠিক সময়ত কাম কৰক। চিকিৎসক সকলে সঠিক সময়ত নিজৰ চৰকাৰী চিকিৎসা সেৱা প্ৰদান কৰাৰ অন্তত যিখিনি অতিৰিক্ত সময় পায় সেইখিনি সময়ত প্ৰাইভেট চেম্বাৰত বহক, তাত কোনো আপত্তি নাই।
কিন্তু চৰকাৰী দ্বায়িত্বৰ সময়ত কৰ্তব্য উপস্থিত নাথাকি প্ৰাইভেট চেম্বাৰত চিকিৎসা কৰাটো মানি লোৱা নহব।” ফলত আজি এবছুৰ কেন্দ্ৰীয় সভাপতিগৰাকীয়েই ওদালগুৰি ২০০ বিচনাযুক্ত চিকিৎসালয়ৰ ফোপোলা স্বৰূপ উদঙাই দিয়ে। আগন্তুক দিনত চিকিৎসালয় কৰ্তৃপক্ষই বিষয়টো সন্দৰ্ভত কি ব্যৱস্থা গ্ৰহণ কৰে সেয়া হব লক্ষণীয়।
