ৰাজ্যত ২৬ হাজাৰ নিযুক্তিক লৈ বিতৰ্ক চলি থকাৰ মাজতে আজি পুৱা গুৱাহাটীত সাতটাকৈ দালাল আৰক্ষীৰ জালত পৰা ঘটনাই এতিয়া বিশেষ তাৎপৰ্য বহন কৰিছে । জল সম্পদ বিভাগত চাকৰি দিয়াৰ নামত ধন দাবী কৰিছিল এই দালাল চক্ৰটোৱে । পুৱা এক গোপন সূত্ৰৰ পম খেদি দিশপুৰ আৰক্ষীয়ে মহানগৰৰ বৰবাৰীৰ পৰা এই দালাল কেইটাক আটক কৰে ।
ধৃত দালাল কেইটা হৈছে, গুৱাহাটী কাহিলীপাৰাৰ নয়ন শইকীয়া , মঙলদৈৰ চিৰাজুল হক ,নলবাৰীৰ গোবিন্দ চৌধুৰী , নলবাৰীৰ নুৰ ইছলাম আহমেদ ,বশিষ্ঠৰ জয়ন্ত ডেকা , নলবাৰীৰ প্ৰাঞ্জল বৰ্মন আৰু গোৱালপাৰাৰ জয়ন্ত দাস ।
এ চি পি হিমাংশু দাসৰ নেতৃত্বত চলা অভিযানত বৰবাৰীৰ জিবি গেষ্ট হাউচৰ পৰা আটক কৰা হৈছে এই দালাল চক্ৰটোক । জিবি গেষ্ট হাউচৰ দুই, চাৰি আৰু ১০৮ নম্বৰ কোঠাত বাহৰ পাতি আৰম্ভ কৰিছিল চাকৰি দিয়াৰ নামত ধন ঘটাৰ এই ব্লুপ্ৰিণ্ট ।
আৰক্ষীৰ সূত্ৰে প্ৰকাশ যে, ১৪ আগষ্টৰ পৰাই ৰফিকুল হুছেইন নামৰ এই দালালজনে গেষ্ট হাউচটোত বাহৰ পাতি আছিল । ৯ আৰু ১০ ছেপ্টেম্বৰত পুনৰ আন দুটা কোঠাত বাহৰ পাতিছিল দালালকেইটাই । ইফালে পলাতক হৈ থকা ৰফিকুলক বিচাৰি আৰক্ষীয়ে জোৰদাৰ অভিযান আৰম্ভ কৰিছে । দালাল কেইজনে ২০১৭ চনতে অনুষ্ঠিত হোৱা জলসম্পদ বিভাগৰ পৰীক্ষাক লৈ এই প্ৰৱঞ্চনাৰ জাল পাতিছিল ।
উল্লেখযোগ্য যে , ২০১৭ চনতে অনুষ্ঠিত হোৱা এই পৰীক্ষাৰ ওপৰত এতিয়াও গুৱাহাটী উচ্চ ন্যায়ালয়ত এক গোচৰ চলি আছে । ইয়াৰ মাজতো এই চক্ৰটোৱে নিযুক্তিৰ বাবে প্ৰাৰ্থীৰ তালিকা প্ৰ্স্তুত কৰি এক বৃহৎ অংকৰ ধনৰ লেন-দেন আৰম্ভ কৰিছিল ।
