Rats :
ভূমিকম্পৰ পাছত তৎপৰতাৰে উদ্ধাৰকাৰ্য চলোৱা কিছু অসুবিধাজনক হৈ পৰিছে । কোনো বহুতল ভাঙি পৰিলে তাৰ ধ্বংসস্তূপৰ তলত আৱদ্ধ হৈ থাকে বহু লোক । সঠিক সময়ত উদ্ধাৰ নকৰিলে প্রাণো হেৰুৱাই অনেকে ।
এই সমস্যাৰ সমাধান আনিছে বেলজিয়ামৰ এটা সংস্থা ‘আপোপো’এ । কেনেদৰে ধ্বংসস্তূপৰ তলৰ পৰা কম সময়ৰ ভিতৰতে আটকসকলক উদ্ধাৰ কৰিব পাৰি, তাৰ সমাধান ওলিয়াবলৈ বিশেষজ্ঞসকলে বাছি লৈছে এন্দুৰ ।
ভূমিকম্পৰ পাছত যি পৰিস্থিতিৰ সৃষ্টি হয়, তাৰ কৃত্রিম পৰিৱেশ তৈয়াৰ কৰি এন্দুৰবোৰক প্রশিক্ষণো দিছে সংস্থাৰ স’তে জড়িত বিশেষজ্ঞসকলে ।
এইণ্ডহোভেন ইউনিভাৰ্চিটি অৱ টেকনোলজিৰ এগৰাকী ইলেকট্রিকেল ইঞ্জিনিয়াৰে এন্দুৰৰ বাবে এটা বেগ তৈয়াৰ কৰিছে । সেই বেগত লগোৱা থাকিব এটা ভিডিঅ’ কেমেৰা, মাইক্র’ফোন আৰু ল’কেছন ট্রান্সমিটাৰ ।
প্রাথমিকভাৱে এই বেগটোৰ নাম দিয়া হৈছে ‘ৰেট পেক’ । ইঞ্জিনিয়াৰ গৰাকীয়ে জনায় যে, এই বেগটোৰ প্র’ট’টাইপ পৰীক্ষা কৰা হৈছে । প্রাথমিকভাৱে সফলো হৈছে তেওঁ ।
ধ্বংসস্তূপথ তলত যদি কোনো আবদ্ধ হৈ থাকে, তেন্তে, কেমেৰা আৰু মাইক্র’ফোনৰ জৰিয়তে চাব পাৰিব । কোন ঠাইত লোকজন আবদ্ধ হৈ আছে, তাৰ সঠিক স্থানো অন্য প্রান্তত থকা লেপটপত ধৰা পৰিব ।
প্রাথমিকভাৱে সফল হ’লেও এতিয়াও বহু কাম বাকী বুলি জনাইছে গৱেষকসকলে । আকাৰ আৰু ওজন আৰু কম কৰিব লাগিব বুলি তেওঁলোকৰ মত । বেগটো যিমান পাতল হ’ব, পিঠিত সেই বেগ লৈ এন্দুৰে চলাফিৰা কৰাত সিমানে সুবিধা হ’ব ।
বেগটো এন্দুৰৰ গাত নিওপ্রিন ভেষ্টৰ জৰিয়তে স্থাপন কৰা হ’ব বুলি তেওঁ জনায় । সাধাৰণতে, স্কুবা ডাইভ কৰাৰ সময়ত এই নিওপ্রিনেৰেই স্কুবা ছুট তৈয়াৰ কৰা হয় ।
মাটি খন্দাৰ সময়ত যন্ত্রৰ যেনে ধৰণৰ শব্দ হয়, সেই ধৰণৰে কিছু শব্দ চলাই এন্দুৰবোৰক এই আপৎকালীন পৰিস্থিতিৰ বাবে প্রস্তুত কৰিছে বিশেষজ্ঞসকলে । ইয়াৰ পাছত পৃথক পৃথক স্তৰত এন্দুৰক প্রশিক্ষণ দিয়া হ’ব, যাতে সিহঁতে বহুতলত উঠা-নমা কৰাত সুবিধা হয় ।
এই প্রশিক্ষণমূলক গৱেষণাৰ নেতৃত্বত আছে ডনা কিন । ডনাই জনাইছে, সকলো ধৰণৰ পৰিৱেশতে এন্দুৰে খাপ খাই যাব পাৰে । স্বভাৱত কৌতূহলীও সিহঁত । ভূমিকম্পৰ পাছত ধ্বংসাৱশেষৰ ভিতৰ পর্যন্ত প্রৱেশ কৰিবলৈও সক্ষম সিহঁত । সেয়ে উদ্ধাৰকাৰ্যৰ বাবে এন্দুৰেই উপযুক্ত ।
ডনাই কয়, ‘‘সপ্তাহত পাঁচ দিন ১৫ মিনিটকৈ এন্দুৰবোৰক প্রশিক্ষণ দিয়া হয় । প্রশিক্ষণৰ পাছত কেতিয়াবা সিহঁতক পিঞ্জৰাৰ ভিতৰ পৃথক পৃথককৈ ৰখা হয় । আকৌ কেতিয়াবা সমলিংগৰ এন্দুৰৰ স’তে এটা পিঞ্জৰাতে ৰখা হয় ।’’
তেওঁ জনায় যে, গৱেষণা অব্যাহত আছে । এটা এন্দুৰৰ প্রশিক্ষণ সম্পূর্ণ কৰিবলৈ ন মাহৰ পৰা এবছৰ সময় লাগে । আগন্তুক এবছৰৰ ভিতৰতেই সম্পূর্ণ প্রক্রিয়াটো সমাপ্ত কৰা সম্ভৱ হ’ব বুলি তেওঁ আশাবাদী ।
