Air in Guwahati Is Poisonous:
ফটকা-আতচবাজীয়ে গুৱাহাটী মহানগৰীতো সৃষ্টি কৰিলে ব্যাপক প্রদূষণ। উচ্চতম ন্যায়ালয়ে এইবাৰ দীপাৱলীত শব্দ আৰু বায়ু প্ৰদূষণৰ অন্যতম কাৰক ফটকা ব্যৱহাৰত নিষেধাজ্ঞা আৰোপ কৰিছিল যদিও দেওবাৰে বিয়লিৰে পৰা ব্যাপক হাৰত ফটকা ফুটোৱাৰ পৰিণতিত নিশাৰে পৰা গুৱাহাটীৰ আকাশমার্গ ছানি ধৰে প্রদূষণে।
পৰিস্থিতি এনে পর্যায়ত উপনীত হয় যে গুৱাহাটীত বায়ুৰ মান সূচকাংক’ (একিউআই)ৰ পৰ্যায় যোৱা নিশাৰে পৰা সৰ্বাধিক ২৫৪ পর্যন্ত বৃদ্ধি পায়। প্ৰদূষণ নিয়ন্ত্রণ পৰিষদে প্ৰকাশ কৰা তথ্য মতে, গুৱাহাটীত বায়ু প্ৰদূষণৰ অন্যতম উপাদেয় পি এম ২.৫ হান বিশ্ব স্বাস্থ্য সংস্থাই নিৰ্ধাৰণ কৰি দিয়া স্বাভাৱিক হাৰতকৈ আজি ৫.৫ গুণ বৃদ্ধি পাইছে।
উল্লেখ্য যে পি এম ২.৫ৰ হাৰ দ্ৰুত গতিত উর্ধ্বগামী হোৱাৰ পৰিণতিত গুৱাহাটীৰ বায়ু হাপানী ৰোগ আৰু হৃদৰোগৰ দৰে ৰোগাক্ৰান্তৰ বাবে বিপজ্জনক হৈ পৰিছে। উচ্চতম ন্যায়ালয়ৰ নিৰ্দেশনাৰ আধাৰত প্ৰদূষণ নিয়ন্ত্ৰণ পৰিষদে গুৱাহাটীত নিশা আঠ বজাৰ পৰা ১০ বজালৈ দুঘন্টাৰ বাবেহে সেউজ ফটকা ফুটাবলৈ অনুমতি দিছিল।
পিছে আশ্চৰ্যকৰ কথা এয়ে যে গুৱাহাটীত দেওবাৰে বিয়লি প্ৰায় চাৰি বজাৰ পৰাই আৰম্ভ হয় উচ্চ প্ৰাৱলাৰ ফটকা ফুটোৱাৰ অঘোষিত প্রতিযোগিতা। লক্ষ্যণীয় যে গুৱাহাটীৰ প্ৰতিটো পথতে যোৱা সপ্তাহৰ পৰাই গঢ়ি উঠিছিল ফটকাৰ এখন বৃহৎ ব্যৱসায়। পূৰ্বতকৈয়ো দুগুণে বৃদ্ধি পায় ফটকাৰ দোকানৰ সংখ্যা।
প্ৰদূষণ নিয়ন্ত্ৰণ পৰিষদে উচ্চতম ন্যায়ালয়ৰ নিৰ্দেশৰ আধাৰত ফটকা ফুটোৱাত নিষেধাজ্ঞা আৰোপ কৰে যদিও ফটকা বিক্রীত প্রশাসনে কোনো হকা-বাধা নকৰাত গুৱাহাটীত ধোঁৱাচাঙত উঠে উচ্চতম ন্যায়ালয়ৰ নিৰ্দেশনা আৰু প্ৰদূষণ নিয়ন্ত্ৰণ পৰিষদৰ আহ্বান।
এই প্রসংগত অসম ৰাজ্যিক প্ৰদূষণ নিয়ন্ত্ৰণ পৰিষদৰ এজন শীর্ষ বিষয়াই আজি কয় যে পৰিষদৰ আহ্বান অমান্য কৰা পক্ষৰ বিৰুদ্ধে ব্যৱস্থা গ্ৰহণ কৰাৰ কৰ্তৃত্ব নাই পৰিষদৰ। পৰিষদে মাথোঁ এই বিষয়ত কঠোৰ ব্যৱস্থা গ্ৰহণ কৰিবলৈ জিলা প্রশাসনকহে দায়িত্ব প্ৰদান কৰে। পিছে গুৱাহাটীত কালিৰে পৰা অবিৰাম গতিত অব্যাহত থকা ফটকা ফুটোৱা পক্ষসমূহক নিয়ন্ত্ৰণ কৰিবলৈ কোনো পদক্ষেপ গ্ৰহণ নকৰিলে মহানগৰ প্ৰশাসনে।
সেউজ ফটকা দূৰৈৰ কথা, মহানগৰীত মুকলিকৈয়ে বিগত দিনকেইটাত বিক্ৰী কৰা হ’ল বায়ু প্ৰদূষণ সৃষ্টিকাৰী ফটকাহে। উল্লেখ্য যে মহানগৰীৰ গড়চুক চাৰিআলিত সোমবাৰে বিয়লি একিউআইৰ হাৰ ২৫৪ পইন্ট, পাণবজাৰত ২৩৯ পইন্ট, বৰঝাৰ বিমান কোঠত ২২৮ পইন্ট আৰু আইআইটি গুৱাহাটী চৌহদত ২০৭ পইন্টলৈ ঊর্ধ্বগামী হৈছে। দেওবাৰে দুপৰীয়া গুৱাহাটীৰ সামগ্ৰিক একিউআইৰ হাৰ আছিল ১৮৩ আৰু পিএম ২.৫ৰ হাৰ আছিল ৮৪।
কিন্তু বিয়লিৰে পৰা আৰম্ভ হোৱা ব্যপক হাৰত ফটকা ফুটোৱাৰ অঘোষিত প্ৰতিযোগিতাই সন্ধিয়াৰে পৰা প্ৰদূষিত কৰি তোলে গুৱাহাটীৰ আকাশ-বতাহ।
উল্লেখ্য যে দেশৰ ৰাজধানী মহানগৰ নতুন দিল্লীত শেহতীয়াকৈ সৃষ্টি হোৱা ভয়াৱহ বায়ু প্ৰদূষণে কঢ়িয়াই অনা বিপদ ঘন্টাৰ প্ৰতি লক্ষ্য ৰাখি উচ্চতম ন্যায়ালয়ে এইবাৰ পোহৰৰ উৎসৱ দীপাৱলীত উচ্চ প্ৰাৱল্য তথা প্ৰদূষণ সৃষ্টিকাৰী ফটকা ফুটোৱাত কঠোৰ নিষেধাজ্ঞা আৰোপ কৰিছিল; কিন্তু উচ্চতম ন্যায়ালয়ৰ নিৰ্দেশ বলবৎ কৰাৰ ক্ষেত্ৰত চৰকাৰ প্ৰশাসনৰ দুৰ্বল ভূমিকাই এইবাৰৰ দীপাৱলীতো বাধাহীন গতিত ফটকা ফুটোৱাত অৰিহণাহে যোগায়।
প্ৰশাসনে নিশা ১০ বজাৰ পৰা পুৱা আঠ বজালৈ উচ্চ শব্দৰ ফটকা ফুটোৱাত নিষেধাজ্ঞা আৰোপ কৰিয়েই দায়িত্ব সামৰে। ফলত সোমবাৰে গুৱাহাটীত সমানে অব্যাহত থাকে ব্যাপক হাৰত ফটকা ফুটোৱাৰ ধাৰাবাহিকতা।
পৰিণতিত মহানগৰীত সোমবাৰে ব্যাপক হাৰত ঊর্ধ্বগামী হয় প্ৰদূষণৰ মাত্ৰা। চিকিৎসকৰ মতে, আজি গুৱাহাটীত একিউ আইৰ উচ্চ হাৰৰ সময়ত হাওঁফাওঁৰ সংক্ৰমণ, হৃদৰোগ, হাপানী আদি ৰোগাক্ৰান্ত লোকে মুকলিকৈ এই বায়ু সেৱন কৰাটো অতি বিপজ্জনক।
পৰাপক্ষত এনে শ্ৰেণীৰ লোকে ঘৰতে সোমাই থকাটোৱে মংগল বুলিও চিকিৎসকে মত প্রকাশ কৰিছে। ধাৰাবাহিক ফটকা ফুটোৱাৰ ফলত গুৱাহাটীৰ বায়ুমণ্ডল বিষাক্ত হৈ পৰাৰ পাছতো পিছে আজিও পৰিৱেশ প্ৰদূষণ ৰক্ষাৰ প্ৰতি তিলমানো গুৰুত্ব দিয়া নাই মহানগৰবাসীয়ে।
প্ৰদূষণ ৰোধৰ বাবে ফটকা ফুটোৱাত নিষেধাজ্ঞা আৰোপ কৰাৰ পাছতো গুৱাহাটীত দুদিন ধৰি বাধাহীনভাৱে অব্যাহত থকা ফটকা ফুটোৱাৰ ধাৰাবাহিকতাৰ প্ৰসংগত আজি কার্যতঃ অসহায়তা প্ৰকাশ কৰি হাত দাঙিলে মহানগৰ আৰক্ষীয়ে।
গুৱাহাটীৰ যুটীয়া আৰক্ষী আয়ুক্ত প্রতীক থুৱেই ‘দৈনিক অগ্ৰদূত’ৰ আগত কয় যে প্ৰদূষণ ৰোধৰ বাবে উচ্চতম ন্যায়ালয়ৰ নিৰ্দেশনা কাৰ্যকৰী কৰিবলৈ আৰক্ষীয়ে চেষ্টা অব্যাহত ৰাখিছে। প্ৰতিখন থানা অঞ্চলতে আৰক্ষীৰ নিয়মীয়া তহলৰ উপৰি ফটকা ফুটোৱাত বাধা আৰোপ কৰিবলৈ ‘স্পেছিয়েল স্কোৱাড’ গঠন কৰি মহানগৰীত ব্যৱস্থা গ্ৰহণ কৰা হৈছে; কিন্তু আৰক্ষীৰ তহলদাৰীৰ দলে পিছ দিয়াৰ লগে লগে বহুলোকে ফটকা ফুটাইছে।
মহানগৰীৰ যুটীয়া আৰক্ষী আয়ুক্তজনে অসহায়তা ব্যক্ত কৰি কয়, ‘মূল সমস্যাটো হ’ল সকলো ঘৰৰ সন্মুখতে নিৰাপত্তাৰক্ষী নিয়োগ কৰাটো সম্ভৱ নহয়। তথাপি তহলদাৰী গোটে অভিযান অব্যাহত ৰাখিছে ।
মহানগৰ আৰক্ষীয়ে সামাজিক মাধ্যমৰ জৰিয়তে দিনৰ ভাগতো ফটকা ফুটাবলৈ বাধা দি ৰাইজক আহ্বান জনাইছো।’ উল্লেখ্য যে গুৱাহাটীত দেওবাৰৰ দৰে সোমবাৰৰ নিশালৈকে অব্যাহত আছে ব্যাপক হাৰত ফটকা ফুটোৱাৰ শব্দ। স্বাভাৱিকতে ধূসৰিত হৈ পৰিছে মহানগৰীৰ পৰিৱেশ।