Bangladesh Set To Get Interim Government Led By Nobel Winner Muhammad Yunus:
ব্যাপক ৰক্তপাত-অৰাজকতাৰ মাজতে শান্তি ঘূৰাই অনাৰ আশ্বাসেৰে বৃহস্পতিবাৰে বাংলাদেশত শান্তিৰ ন’বেল জয়ী মহম্মদ ইউনুছ নেতৃত্বাধীন অন্তৱৰ্তী চৰকাৰে শপত গ্রহণ কৰিব।
একালত প্রতিষ্ঠাপক ৰাষ্ট্ৰপতি শ্বেইখ মুজিবুৰ ৰহমানকে প্রাণদণ্ড বিহি সেনা বাহিনীয়ে অন্ধকাৰৰাজৰ সূচনা কৰা দেশখনত শেহতীয়া হিংসাত্মক প্রতিবাদে সৃষ্টি কৰা অৰাজকতা তথা হিংসাৰ জুই জ্বলি আছে। এই জুই নুমুৱাই ইউনুছে শান্তি ঘূৰাই আনিবলৈ সক্ষম হ’ব নে নহয়, তাক লৈ বহুজন সন্দিহান হৈ আছে। এনে অৱস্থাতে বুধবাৰে সেনা প্রধান জেনেৰেল ৱাকাৰ-উজ-জামানে ঘোষণা কৰে যে বৃহস্পতিবাৰে অন্তৱতী চৰকাৰে শপত গ্রহণ কৰিব।
লক্ষ্যণীয় যে অন্তৱর্তী চৰকাৰক নেতৃত্ব দিবলৈ উন্মুখ হোৱা ইউনুছেও অৰাজকতাৰ অৱসান ঘটি শান্তি ঘূৰি আহিব বুলি আশা প্রকাশ কৰিছে। আনহাতে, সাংবাদিকৰ আগত সেনা প্রধানে কয় যে বৃহস্পতিবাৰে নিশা আঠ বজাত শান্তিৰ ন’বেল- প্ৰাপক ইউনুছৰ নেতৃত্বত অন্তৱর্তী চৰকাৰে শপত গ্ৰহণ কৰাৰ সম্ভাৱনা আছে। এই অন্তৱর্তী চৰকাৰক পৰামৰ্শ প্ৰদানৰ বাবে গঠিত হ’বলগীয়া উপদেষ্টা পৰিষদত ১৫জন সদস্য থকাৰ সম্ভাৱনা ব্যক্ত কৰে সেনা প্ৰধান জামানে। উপদেষ্টা পৰিষদক নেতৃত্ব দিব মহম্মদ ইউনুছে। ইয়াৰ পূৰ্বে কালি ৰাষ্ট্ৰপতি মহম্মদ চাহাবুদ্দিনে ৮৪ বছৰীয়া ইউনুছক অন্তৱৰ্তী চৰকাৰৰ মুৰব্বীৰূপে নিযুক্তি দিয়ে।
সোমবাৰে চৰকাৰ বিৰোধী প্ৰতিবাদকাৰীসকলে নৰসংহাৰ তথা ধ্বংসলীলা চলোৱাৰ মাজতে প্রধানমন্ত্রী শ্বেইখ হাছিনাই পদত্যাগ আৰু দেশ ত্যাগ কৰাৰ পাছৰ পৰা দেশখন চৰকাৰবিহীন হৈ আছে। আজি এই চৰকাৰবিহীন অৱস্থাৰ অৱসান ঘটাৰ সম্ভাৱনা আছে। আনহাতে, আজি দেশবাসীক উদ্দেশি সেনা মুৰব্বী জেনেৰেল জামানে টেলিভিছন যোগে দিয়া ভাষণত কয়, ‘তেওঁ’ (ইউনুছ) এই দায়িত্ব পালন কৰিবলৈ ব্যগ্ৰ হৈ আছে। মই নিশ্চিত যে তেওঁ আমাক এক সুন্দৰ গণতান্ত্রিক প্রক্রিয়াৰ মাজেৰে নিবলৈ সক্ষম হ’ব আৰু তাৰ জৰিয়তে আমি লাভৱান্বিত হ’ম।’ হাছিনাৰ পলায়নৰ পাছৰে পৰা বাংলাদেশব ক্ষমতা সেনাই নিজৰ হাতত ৰাখিছে।
আনহাতে, পেৰিছৰ পৰা ইউনুছ গৃহাভিমুখে ৰাওনা হৈছে। পেৰিছৰ ছাল্ল্ফ ডি গাউল বিমানকোঠত ডুবাইমুখী বিমানত উঠাৰ সময়ত বুধবাৰে তেওঁ সাংবাদিকৰ আগত কয়, ‘মই ঘৰলৈ ঘূৰি যাবলৈ গভীৰ প্রত্যাশাত আছো। দেশত কি ঘটিছে মই চাবলৈ বিচাৰো। কেনেদৰে অশান্তিৰ পৰা সকলোকে উদ্ধাৰ কৰাৰ উদ্দেশ্যে আমি সকলো ঐক্যবদ্ধ হৈ পাৰো, তাৰ চেষ্টা কৰিম।’ তেওঁ লগতে দেশখন উত্তাল কৰি ৰখাসকলক সকীয়াই দি কয়, ‘যদি আমি হিংসাৰ পথ লওঁ, তেন্তে আমি সকলো ধ্বংস হ’ম।’ একালত দৰিদ্ৰতাত ককবকাই থকা বাংলাদেশৰ কোটি কোটি লোকক উদ্ধাৰ কৰা দেশখনৰ গ্ৰামীণ বেংকৰ জনকজনে মতপোষণ কৰে যে দেশখনক সম্প্রতি শান্তিৰ প্ৰয়োজন।
হাছিনা চৰকাৰৰ পতনৰ পাছত সৃষ্ট শূন্য স্থান পূৰণ কৰিবলৈ হাবিয়াস থকা বুলিও তেওঁ সদৰী কৰে। সকলোকে শান্তি- সম্প্রীতি বজাই ৰাখিবলৈ আহ্বান জনাই তেওঁ লগতে কয়, ‘আমাৰ কোনো ভুলৰ বাবে যাতে এই বিজয় হাছিনা চৰকাৰৰ পতন) অসার্থক নহয়, সেয়া সকলোৰে মনত ৰখা উচিত। আমি সকলোকে শান্তি-সম্প্রীতি বৰ্তাই ৰাখিবলৈ আহ্বান জনাইছো। সকলো ধৰণৰ হিংসা, স্থাৱৰ-অস্থাৱৰ সম্পত্তি বিনষ্ট কাৰ্যৰ পৰা সকলো বিৰত থাকক। ছাত্র-ছাত্ৰীসকলৰ লগতে দল-মত নির্বিশেষে সকলোকে আমি শান্তি ধৰি ৰাখিবলৈ আহ্বান জনাইছো। এতিয়া আমাৰ প্ৰধান উদ্দেশ্য হৈছে এই বিপুল সম্ভাৱনাপূর্ণ দেশখনৰ পৰবৰ্তী প্ৰজন্মৰ বাবে এখন প্রগতিশীল দেশ গঢ়া। এখন নতুন পৃথিৱী গঢ়িবলৈ আমাৰ যুৱক- যুৱতীসকল প্রস্তুত। অকাৰণত হিংসাৰ আশ্রয় নল’ব। সহিংসা আমাৰ সকলোৰে শত্রু। অনুগ্রহ কৰি শত্রু সৃষ্টি নকৰিব। সকলোৱে শান্তিৰে থাকক আৰু দেশ পুনৰ গঠনত চামিল হওক।’
লক্ষ্যণীয় যে ইউনুছক দেশখনৰ অন্তৰ্বর্তী চৰকাৰৰ নেতাৰূপে বাছনিত সন্মতি প্রদান কৰে স্থলসেনা, নৌসেনা, বায়ুসেনাৰ লগতে প্ৰতিবাদকাৰী ছাত্র সংগঠনসমূহৰ নেতাসকলেও। ৰাষ্ট্ৰপতি চাহাবুদ্দিনৰ উপস্থিতিত অনুষ্ঠিত এখন বৈঠকত স্থলসেনা, নৌসেনা, বায়ুসেনা আৰু ছাত্র সংগঠনৰ নেতাসকলে ইউনুছক অন্তৱৰ্তী চৰকাৰৰ প্ৰধানৰূপে বাছনি কৰে। এই সম্পর্কত এজন ছাত্রনেতা নাহিদ ইছলামে কয় যে ইউনুছ অন্তর্বর্তী চৰকাৰৰ মুখ্য উপদেষ্টাৰূপে থাকিব। ইপিনে, ইউনুছ ডুবাইত উপস্থিত হোৱাৰ পাছত তাৰ পৰা আন এখন বিমানেৰে ঢাকালৈ যাত্রা কৰিব। সেনা মুৰব্বী জামানে কালি সদৰী কৰা অনুসৰি বৃহস্পতিবাৰে দিনৰ ২-১০ বজাত তেওঁ ঢাকাত উপস্থিত হ’ব। পাছত চাৰিশ ব্যক্তিৰ উপস্থিতিত আজি নিশা আঠ বজাত অন্তর্বর্তী চৰকাৰে শপত গ্ৰহণ কৰাৰ প্ৰস্তুতি চলাইছে।
.#শ্রমিক সংক্ৰান্তীয় গোচৰত ইউনুছক মুক্তি
হাছিনা চৰকাৰ উৎখাত হোৱাৰ পাছতো বাংলাদেশত হত্যা-হিংসা অব্যাহত আছে। যোৱা দেওবাৰৰ পৰা আৰম্ভ হোৱা হিংসাত্মক ঘটনাত এই পর্যন্ত চাৰি শতাধিক লোকৰ প্ৰাণহানি ঘটাৰ লগতে আন সহস্রাধিক আহত হৈছে।বুধবাৰে পেৰিছত সাংবাদিকৰ আগত ন’বেল জয়ী মহম্মদ ইউনুছে কয় যে দেশখনৰ হিংসাত্মক ঘটনাত বর্তমানলৈ কমেও ৪৫৫জন লোকে প্রাণ হেৰুৱাইছে। মৃতসকলৰ মাজত বহুসংখ্যক আৰক্ষীৰ লোকো আছে।
এনেদৰে অশান্ত হৈ থকাৰ মাজতে আজি ইউনুছ নেতৃত্বাধীন অন্তৱৰ্তী চৰকাৰে শপতবাক্য পাঠ কৰাৰ কথা। ইপিনে, এক সূত্ৰৰ মতে, হাছিনা চৰকাৰৰ পতনৰ পাছত সমগ্র দেশজুৰি অৰাজকতা আৰম্ভ হৈছে। এনে অৱস্থাতে দেশখনৰ আৰক্ষী বাহিনীয়ে কর্মবিৰতিৰ আহ্বান জনাইছে। এই সম্পৰ্কত আজি সেনা মুৰব্বীয়ে কয়, ‘আৰক্ষী বাহিনীৰ পুনৰ গঠনৰ কাম চলিছে। আশা ৰো আৰক্ষীৰ লোকসকলৰ মনোবল ঘূৰি আহিব।
তেওঁলোকে নিজৰ দায়িত্ব পালন কৰিব। সদায় জনগণৰ কাষত সেনা বাহিনী আছে। আমি সকলো মিলি কাম কৰিম আৰু দেশক এক সুন্দৰ ভৱিষ্যৎ উপহাৰ দিম।’ আনহাতে, আৰক্ষীৰ অনুপস্থিতিত দেশখনৰ বিভিন্ন স্থানত চুৰি- ডকাইতিৰ ঘটনা সংঘটিত হোৱাৰ অভিযোগ উত্থাপিত হৈছে।
এই সম্পর্কত সেনা মুৰব্বীয়ে অৱশ্যে দাবী কৰে যে সামগ্রিকভাবে পৰিস্থিতি শান্ত। বিক্ষিপ্ত ঘটনা সংঘটিত হোৱা বুলি মন্তব্য কৰি তেওঁ লগতে কয়, ‘ঠায়ে ঠায়ে অশান্তি বর্তি থকাৰ অন্তৰালত কিছু কাৰণ আছে। পাছত পৰিস্থিতি স্বাভাৱিক হ’ব।’ ইপিনে, বাংলাদেশৰ এই ধ্বংসলীলাৰ সময়ত সদ্য ক্ষমতাচ্যুত আৱামী লীগৰ বহুসংখ্যক নেতায়ো প্রতিবাদকাৰীৰ হাতত প্ৰাণ হেৰুওৱাৰ তথ্যও পোহৰলৈ আহিছে।
শেহতীয়া তথ্য অনুসৰি, সৰ্বাত্মক প্ৰতিবাদৰ সময়ছোৱাত চৰকাৰ বিৰোধীৰ নৃশংস আক্রমণত আবামী লীগৰ প্ৰায় ৫০জন নেতায়ো প্রাণ হেৰুৱায়। এইসকলৰ ২৯জনৰ মৃতদেহ বৰ্তমানলৈ উদ্ধাৰ হৈছে। তদুপৰি চৰকাৰ বিৰোধীয়ে দলৰ একাংশ নেতাৰ বাসগৃহ ভাঙি চুৰমাৰ কৰাৰ লগতে লুটপাট চলায়।
# সেনাই স্বৰূপাৰ্থতে ক্ষমতা হস্তান্তৰ কৰিব নে?
শপত গ্ৰহণৰ পাছত অন্তৱৰ্তী চৰকাৰক সেনাই স্বৰূপাৰ্থতে ক্ষমতা হস্তান্তৰ কৰাৰ কথা আজি একপ্ৰকাৰ আওপকীয়াকৈ ঘোষণা কৰে সেনা মুৰব্বী জামানে। তেওঁ গণতান্ত্রিক প্রক্রিয়াত আস্থা ৰখাৰ কথা কৈ আৰক্ষী বাহিনীৰ পুনৰ গঠন চলি থকা বুলি মন্তব্য কৰাটোৱে তাৎপর্য বহন কৰিছে।
