Bir Lachit Sena workers Arrested:
এগৰাকী ৰাষ্ট্ৰীয় পৰ্যায়ৰ যুৱতী পাঞ্জা খেলৱৈক অনা অসমীয়া তিনিজনলোকে শাৰীৰিকভাৱে প্ৰহাৰ কৰাক কেন্দ্ৰ কৰি শিৱসাগৰ বিভিন্ন দল – সংগঠনে উত্তাল প্ৰতিবাদৰ অন্তত মাৰোৱাৰী সমাজে উল্লিখিত ঘটনাৰ দুখ প্ৰকাশ কৰি ৰাজহুৱা ক্ষমা প্ৰাৰ্থনা কৰাৰ পিছত পৰিস্থিতি ক্ৰমাৎ স্বাভাৱিক হৈ পৰে ৷
এনে ঘটনাক্ৰমৰ মাজতে বীৰ লাচিত সেনাৰ এজন কৰ্মীয়ে দুৰ্গা পূজাৰ পূৰ্বে বহিৰাগত অধ্যুষিত অঞ্চলত আলফা স্বাধীনক কূটাঘাতমূলক কাৰ্য সংঘটিত কৰিবলৈ ছ’চিয়েল মিডিয়াত পোষ্ট দি ইতিমধ্যে আৰক্ষীৰ ৰোষত পৰে ৷
উল্লেখ্য যে স্বাধীনতা দিৱসৰ দিনটোত ৰাজ্যৰ ভিন্ন স্থানত বিস্ফোৰক সামগ্ৰী সংস্থাপন কৰি ৰাজ্যজুৰি আতংকময় পৰিবেশৰ সৃষ্টি কৰিছিল আলফা স্বাঃ)ই। সেই ঘটনাৰ প্ৰতিক্ৰিয়া মাৰ নৌযাওঁতেই শিৱসাগৰৰ দল- সংগঠনৰ আন্দোলনৰ গইনা লৈ জাতীয় সংগঠনৰ বিষয়ববীয়াই কূটাঘাতমূলক কাম কৰাৰ বাবে আলফা (স্বাঃ)ক আহ্বান জনাই ফেচবুকত পোষ্ট লিখাৰ বাবেই শিৱসাগৰ আৰক্ষীয়ে গ্ৰেপ্তাৰ কৰিছে বীৰ লাচিত সেনাৰ কৰ্মী মনদ্বীপ গোহাঁই ৷
উল্লেখ্য যে শিৱসাগৰ চেৰেকাপাৰৰ মনদ্বীপ গোহাঁই-এ পোষ্টটোত লিখিছিল ‘দূৰ্গা পূজাৰ প্ৰাক মূহর্তত আমি আলফা(স্বা) ৰ পৰা ঠাই ঠাই কূটাঘাত বিচাৰো । বিশেষকৈ বহিৰাগত অধ্যঘোষিত অঞ্চলসমূহত, উদাহৰণস্বৰূপে তিনিচুকীয়া । (পূজাৰ আগত আলফাই ব’ম দিয়াটো বিচাৰে নে ৰাইজ, মতামত জনাব)?’’৷ যুৱকজনৰ এই উচতনিমূলক পোষ্টক লৈ ইতিমধ্যে শিৱসাগৰত তীব্ৰ প্ৰতিক্ৰিয়াৰ কৰিছে ৷
