Cm Reaction:
মহানগৰীৰ মাজমজিয়াৰ ঐতিহ্যমণ্ডিত দীঘলীপুখুৰীৰ পাৰত থকা ২৫ জোপাকৈ গছ কাটিবলৈ প্ৰশাসন তৎপৰ হোৱাৰ পিছতে ক্ষুব্ধ হৈ পৰে নাগৰিক তথা বিভিন্ন শিক্ষানুষ্ঠানৰ শিক্ষাৰ্থী। মঙলবাৰে গুৱাহাটীৰ জ্যেষ্ঠ নাগৰিক সহ বহু শিক্ষানুষ্ঠানৰ শিক্ষাৰ্থীয়ে হাতত বেনাৰ – প্লেকাৰ্ড লৈ দীঘলীপুখুৰী পাৰত উত্তাল প্ৰতিবাদ সাব্যস্ত কৰে ৷ আনকি নিশা গুৱাহাটী বিশ্ববিদ্যালয়ৰ শিক্ষাৰ্থীয়ে গছ ৰক্ষাৰ বাবে নৈশ পহৰা দিয়ে ৷
শিক্ষাৰ্থীৰ লগতে নাগৰিক সমাজে প্ৰতিবাদ কৰাৰ পাছতেই মুখ্যমন্ত্ৰী ড:হিমন্ত বিশ্ব শৰ্মাই ছ’চিয়েল মেডিয়াৰ জৰিয়তে প্ৰতিক্ৰিয়া প্ৰকাশ কৰিছে। এই সন্দৰ্ভত মুখ্যমন্ত্ৰী গৰাকীয়ে কয় ,চৰকাৰে গুৱাহাটীৰ আন্তঃগাঁথনি উন্নয়নৰ লগতে ঐতিহ্য আৰু পৰিৱেশ ৰক্ষাৰ ক্ষেত্ৰতো বদ্ধপৰিকৰ বুলি সামাজিক মাধ্যমযোগে জনালে । দীঘলীপুখুৰীৰ পৰা নুনমাটি সংযোগী উৰণ সেতু নিৰ্মাণৰ বাবে দীঘলীপুখুৰীৰ পাৰৰ পুৰণি গছ নকটাকৈ বিকল্প ব্যৱস্থাৰ চিন্তা চৰ্চা কৰাৰ আশ্বাস দিয়ে মুখ্যমন্ত্ৰীয়ে।
শেহতীয়াকৈ জানিব পৰা মতে, ৰাজ্য চৰকাৰৰ লোকনিৰ্মাণ বিভাগে এসপ্তাহৰ ভিতৰতে প্ৰস্তুত কৰিব বিকল্প ব্যৱস্থা। গছ কটাৰ বিৰুদ্ধে ৰাইজৰ উত্তাল প্ৰতিবাদত সেও মানি লোকনিৰ্মাণ বিভাগে বিকল্প ব্যৱস্থাৰ সিদ্ধান্ত গ্ৰহণ কৰিছে।
আনহাতে ,গছ কটাৰ বিৰুদ্ধে ছ’চিয়েল মিডিয়াৰ জৰিয়তে তীব্ৰ প্ৰতিক্ৰিয়া প্ৰকাশ কৰিছে কন্ঠশিল্পী জুবিন গাৰ্গ,অংগৰাগ পাপন মহন্ত,দীপলীনা ডেকা,প্ৰথিতযশা চলচ্চিত্ৰ পৰিচালক ৰীমা দাসে ৷ গছ কটাৰ বিকল্প ব্যৱস্থা ল’বলৈ আহ্বান জনালে চৰকাৰক।