Smartglasses are coming:
দুচকুত পৰিধান কৰি থকা চছমাযোৰেই কাম কৰি আপুনি হাতত ৰখা ম’বাইল অথবা স্মার্টফোনটোৰ কাম। সকলো ঠিকে ঠাকে থাকিলে এনে এক অৱস্থালৈ অধিক দিন অপেক্ষা কৰাৰ প্ৰয়োজন নহ’ব। অবৱশ্যে এই চচ্ছমা সাধাৰণ চচ্ছনা নহয়, এই চছমা হ’ব অত্যাধুনিক প্রযুক্তি সম্বলিত চছমা, যাক স্মার্টগ্লাছ বুলি কোৱা হয়।
কোৱা নিষ্প্রয়োজন যে বিগত কিছু বছৰত বিশ্বৰ প্রযুক্তিক্ষেত্ৰৰ অভূতপূর্ব উন্নতি সাধন হয় আজি কোনো দুর্গম প্রান্তত থাকিও এজন ব্যক্তিয়ে সামাজিক মাধ্যম ব্যৱহাৰৰ যি সুবিধা লাভ কৰিছে সেয়া হৈছে প্রযুক্তিৰ চমকপ্রদ উত্তৰণৰ ফল। অর্থাৎ বিগত কিছু বছৰত বিশ্বৰ প্রযুক্তি ভূচিত্ৰৰ অভিনৱ পৰিৱৰ্তন সাধন হয়। এই পৰিৱৰ্তন বর্তমানেও অব্যাহত আছে।
এনে পৰিৱৰ্তনক অধিক মাত্ৰা দি ফেচবুকৰ মালিকানাধীন প্রতিষ্ঠান ‘মেটা’ৰ প্ৰতিষ্ঠাপক তথা মুখ্য কার্যবাহী বিষয়া মার্ক জুকাৰবাৰ্গে সম্প্রতি ঘোষণা কৰিছে যে তেওঁলোকে স্মার্টগ্লাছ উদ্ভাৱনৰ দিশে অগ্ৰসৰ হৈছে। এই ক্ষেত্ৰত তেওঁলোক সফল হ’লেই ম’বাইল ফোন বা স্মার্টফোনৰ প্ৰয়োজন নোহোৱা হ’ব। অর্থাৎ হাতত ৰখা ম’বাইল অথবা স্মার্টফোনটোৰ কাম চকুত পৰিধান কৰি থকা চছমাযোৰেই সম্পন্ন কৰিব।
এই সম্পৰ্কত জুকাৰবাৰ্গে কয় যে এই স্মার্টগ্লাছ হ’ব পৰৱৰ্তী বৃহৎ কম্পিউটিং প্লেটফর্ম। অর্থাৎ অত্যাধুনিক প্রযুক্তিযুক্ত হ’ব এই স্মার্টগ্লাছ। অৱশ্যে ইয়াৰ পূৰ্বেও মেটাৰ প্ৰতিষ্ঠাপক জুকাৰবাৰ্গে স্মার্টফোনৰ স্থান ল’ব পৰা স্মার্টৱাটছ উৎপাদনৰ লক্ষ্য লৈছিল। অৱশ্যে এই ক্ষেত্ৰত তেওঁ সফল নহ’ল। তৎসত্ত্বেও তেওঁ স্মার্টফোনৰ বিকল্প উদ্ভাৱনৰ চেষ্টা ত্যাগ কৰা নাই। ইয়াৰ অংশ স্বৰূপে তেওঁ স্মাৰ্টগ্লাছ উদ্ভাৱনৰ লক্ষ্য লৈছে।
লক্ষ্যণীয় যে কম্পিউটাৰৰ উদ্ভাৱনেই আছিল এক বৃহৎ প্রযুক্তি বিপ্লব। তাৰ পাছতে অহা আন এক বৃহৎ প্রযুক্তিগত সফল বিপ্লৱ হ’ল ম’বাইল ফোনৰ উদ্ভাৱন। যদিহে জুকাৰবাৰ্গৰ পৰিকল্পনা সফল হয় তেন্তে ম’বাইল ফোন বিপ্লৱ অতীত হোৱাৰ সম্ভাৱনা প্ৰৱল। তাৰ ঠাই ল’ব স্মার্টগ্লাছে।
এই সম্পর্কত মেটাৰ প্ৰতিষ্ঠাপকজনে লগতে কয়, ‘এনে এক সময় আহিব যেতিয়া আপুনি জেপৰ পৰা স্মার্টফোনটো উলিওৱাৰ প্রয়োজন নহ’ব। সেই সময়ত আপুনি পৰিধান কৰা চছমাযোৰে (স্মার্টগ্লাছ)ই স্মার্টফোনৰ কাম কৰিব। মই ভাবো যে ২০৩০ৰ দশকত আপুনি এনে অভিজ্ঞতা অৰ্জন কৰিবলৈ সক্ষম হ’ব।’
লক্ষ্যণীয় যে কেৱল জুকাৰবাৰ্গে নহয়, বিশ্বৰ আন এক শীর্ষ প্রযুক্তি প্রতিষ্ঠান এপেলেও স্মার্টগ্লাছ উদ্ভাৱনৰ পৰিকল্পনা কৰিছে। ইতিমধ্যে দুয়োটা প্রতিষ্ঠান এই ক্ষেত্ৰত অগ্রসৰো হৈছে।