Union Minister Sonowal’s remarks in the Lok Sabha on Sagarmala:
কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্রী সৰ্বানন্দ সোণোৱালে চলিত শীতকালীন সংসদৰ অধিৱেশনত জনায় যে ভাৰত চৰকাৰৰ বন্দৰ, জাহাজ পৰিবহণ আৰু জলপথ মন্ত্রালয়ে ব্ৰহ্মপুত্ৰ আৰু বৰাক নদীৰ ব্যাপক উন্নয়নৰ বাবে ১,০১০ কোটি টকা বিনিয়োগ কৰিছে। কেন্দ্ৰীয় মন্ত্ৰী গৰাকীয়ে সাগৰমালা আঁচনিৰ অধীনত ৯৬.৬০ কোটি টকাৰ বিনিয়োগেৰে মাজুলীত এক নতুন স্লিপৱেৰ অনুমোদনৰ বিষয়েও অৱগত কৰে। বিত্ত মন্ত্ৰালয়ৰ ব্যয় বিভাগৰ দ্বাৰা এই সন্দর্ভত নীতিগত অনুমোদন জনোৱা হৈছে।
যোৰহাট লোকসভা সমষ্টিৰ সাংসদ গৌৰৱ গগৈৰ এক প্ৰশ্নৰ উত্তৰত কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্রী সর্বানন্দ সোণোৱালে জনায় যে, কাৰ্গ’ আৰু যাত্রী চলাচল আৰু নদী পৰ্যটনৰ বাবে ব্ৰহ্মপুত্ৰৰ (ৰাষ্ট্ৰীয় জলপথ-২) আভ্যন্তৰীণ জলপথ আন্তঃগাঁথনি উন্নয়নৰ অংশ হিচাপে ১২টা ফ্লোটিং টার্মিনেল, পাণ্ডু আৰু যোগীঘোপাত ২টা মাল্টিম’ডেল টার্মিনেল আৰু বগীবিল আৰু ধুবুৰীত ২টা স্থায়ী টার্মিনেলৰ নিৰ্মাণ অন্তর্ভুক্ত কৰা হৈছে। ভাৰতীয় আভ্যন্তৰীণ জলপথ প্ৰাধিকৰণক ক্রুজ জাহাজৰ মসৃণ যাত্ৰাৰ বাবে প্রয়োজনীয় গভীৰতাৰ সৈতে সুচল যাতায়াত বজাই ৰখাৰ দায়িত্ব দিয়া হৈছে।
সোণোৱালে সাগৰমালা উন্নয়ন কোম্পানী লিমিটেড (এছডিচিএল), অসম পর্যটন উন্নয়ন নিগম (এটিডিচি), আইডব্লিউটি, অসম আৰু আইডব্লিউএআই সঞ্চালকালয়ৰ মাজত “এছপিভি ফ্রেমৱর্কত নদীকেন্দ্রিক ধর্মীয় পৰ্যটন বৰ্তনী”ৰ বাবে স্বাক্ষৰিত বুজাবুজি চুক্তিৰ বিষয়েও অৱগত কৰে। এই প্ৰকল্পৰ উদ্দেশ্য হৈছে- হপ অন এণ্ড হপ অফ আধাৰত জাহাজৰ উপযুক্ত দক্ষতা প্রয়োগ কৰি জলপথৰ জৰিয়তে বিভিন্ন ধর্মীয় উপাসনাস্থলীসমূহ সংযোগ কৰা। এই সাতটা স্থান হৈছে কামাখ্যা মন্দিৰ, পাণ্ডুনাথ মন্দিৰ, অশ্বক্লান্ত মন্দিৰ, দৌল গোবিন্দ মন্দিৰ, উমানন্দ মন্দিৰ, চক্ৰেশ্বৰ মন্দিৰ আৰু আউনীআটী সত্র।
ব্ৰহ্মপুত্ৰ আৰু বৰাক নদীৰ ব্যাপক বিকাশৰ বাবে ধাৰ্য কৰা প্ৰায় ১,০১০ কোটি টকাৰ অন্যান্য বিভিন্ন প্ৰকল্পৰ ভিতৰত আছে ব্ৰহ্মপুত্ৰৰ প্ৰকল্পৰ সামগ্রিক প্ৰগতিৰ দিশত ৪৭৪ কোটি টকাৰ অনুমোদিত ব্যয়ৰ সৈতে ৭৯.৮৭% কামৰ অগ্রগতি। ইয়াত অন্তর্ভুক্ত আছে পাণ্ডু বন্দৰ টার্মিনেলৰ পৰা ৰাষ্ট্ৰীয় ঘাইপথ ২৭ সংযোগী উচ্চ প্ৰৱেশ পথৰ নিৰ্মাণ আৰু পাণ্ডুত জাহাজ মেৰামতি সুবিধাৰ বিকাশ; যাৰ আনুমানিক ব্যয় ৩৮৮ কোটি, ৬০% তকৈও ইয়াৰ অধিক কাম সম্পূর্ণ হৈছে। আনহাতে ৰাষ্ট্ৰীয় জলপথ-১৬ অর্থাৎ বৰাকৰ উন্নয়ন পেকেজত ১৪৮ কোটি টকাৰে অনুমোদিত বৰাক নদী আৰু ইণ্ডো- বাংলাদেশ প্রট’কল ৰুট (আইবিপিআৰ) ৰ বিকাশ অন্তর্ভুক্ত আছে।
ছয়টা পৰ্যটকৰ জেটিৰ ভিতৰত বগীবিল আৰু পাণ্ডুত নির্মীয়মান ফ্লোটিং জেটিবোৰৰ কাম প্রায় ৮৫% সম্পূর্ণ হৈছে। শিলঘাট, বিশ্বনাথ ঘাট, নিমাতী আৰু গুঁইজানত তীখাৰে নিৰ্মাণ হৈ উঠিবলগীয়া চাৰিটা পর্যটক জেটিৰ বাবে ইণ্ডিয়ান প’ৰ্ট ৰে’ল এণ্ড ৰ’পৱে কনষ্ট্রাকচন লিমিটেডক দায়িত্ব অর্পণ কৰা হৈছে। ধুবুৰী আৰু মাজুলীত স্লিপৱে নিৰ্মাণৰ কাম প্ৰতিটোতে ৯৬.৬০ কোটি টকাৰে চলি থকাৰ সময়তে উত্তৰ লখিমপুৰৰ ঘাগৰ, বৰপেটাৰ বহৰী, গোৱালপাৰা, তিনিচুকীয়াৰ গুঁইজান, দৰঙৰ কুৰুৱা, শিৱসাগৰৰ দিচাংমুখৰ লগতে উত্তৰ লাখিমপুৰৰ মাটমৰাত বিভিন্ন পৰ্যায়ত যাত্রী টার্মিনেল নিৰ্মাণৰ প্রস্তাৱো চলি আছে ।
নগাঁও লোকসভা সমষ্টিৰ সাংসদ প্রদ্যুত বৰদলৈয়ে সোধা প্ৰশ্নৰ উত্তৰত কেন্দ্ৰীয় মন্ত্রী সর্বানন্দ সোণোৱালে জানিবলৈ দিয়ে, “জাহাজৰ সুৰক্ষিত চলাচলৰ বাবে ২ৰ পৰা ২.৫ মিটাৰ প্ৰয়োজনীয় গভীৰতাৰ ফেয়াৰৱে আৰু ৩৫ৰ পৰা ৪৫ মিটাৰ প্ৰস্থৰ নেভিগেচন চেনেল বজাই ৰখা হয়। জাহাজৰ মসৃণ যাত্ৰাৰ বাবে অন্যান্য উপায়ৰ উপৰিও (বেণ্ডেলিং, চেনেল স্থিৰকৰণৰ কাম ইত্যাদি) পষেকীয়া হাইড্ৰ’গ্ৰাফিক জৰীপ, ড্রেজিং কৰা হৈ আহিছে।”