বিয়াৰ বাবে মাজত মাথো চাৰিটা দিন । উথপ থপ ঘৰখনলৈ হঠাৎ নামি আহিল অমানিশা । ঘৰৰ পৰা চাই দিয়া যুৱকজনৰ সৈতে বিবাহপাশত আৱদ্ধ হ’বলৈ ৰাজহুৱাভাৱে বিৰোধিতা কৰি নিজৰ প্ৰেমিকৰ সৈতে বিবাহপাশত আৱদ্ধ হ’বলৈ ইচ্ছা প্ৰকাশ কৰিছিল দুৰ্ভগীয়া যুৱতীগৰাকীয়ে । তাতেই লাগিলে কেনা । ফলত আৰক্ষী আৰু পঞ্চায়তৰ সন্মুখতে পিতৃয়ে গুলীয়াই হত্যা কৰিলে যুৱতীগৰাকীক ।
এই ভয়ংকৰ ঘটনা সংঘটিত হৈছে মধ্য প্ৰদেশৰ গোৱালিয়ৰত । মৃত যুৱতীগৰাকীৰ নাম তনু গুৰ্জাৰ বুলি জানিবলৈ পৰা গৈছে । মঙলবাৰে সন্ধিয়া প্ৰায় ৯ বজাত চহৰখনৰ গোলা কা মন্দিৰ অঞ্চলত হত্যাকাণ্ডটো সংঘটিত হৈছিল। ভুক্তভোগীগৰাকীৰ পিতৃ মহেশ গুৰ্জাৰে আৰম্ভণিতে তনুৱে ছ’চিয়েল মিডিয়াত পোষ্ট কৰা এটা ভিডিঅ’দেখি খঙত অগ্নিশৰ্মা হৈ উঠে । তাৰ পিছত হস্তনিৰ্মিত বন্দুকেৰে নিৰ্মমভাৱে গুলীয়াই হত্যা কৰে ।
ঘটনাৰ বিৱৰণী অনুসৰি, হত্যাৰ কেইঘণ্টামানৰ পূৰ্বে তনুৱে ছ’চিয়েল মিডিয়াত এটা ভিডিঅ’ ৰেকৰ্ড আৰু শ্বেয়াৰ কৰিছিল, ভিডিঅআটোত তনুক পৰিয়ালে ইচ্ছাৰ বিৰুদ্ধে বিবাহৰ বাবে হেঁচা দিয়াৰ অভিযোগ উত্থাপন কৰিছিল। ৫২ ছেকেণ্ডৰ ভিডিঅ’টোত, তনুৱে পিতৃ মহেশ আৰু পৰিয়ালৰ আন সদস্যসকলক এই অৱস্থাৰ বাবে দায়বদ্ধ বুলি উল্লেখ কৰে । তনুৱে নিজৰ জীৱনৰ প্ৰতি ভয় ভাবুকি অহাৰ কথাও প্ৰকাশ কৰিছিল ।
তনুৱে ভিডিঅ’টোত কয় যে, “মই বিকিক বিয়া কৰাবলৈ বিচাৰো। মোৰ পৰিয়ালে প্ৰথমতে সন্মতি দিছিল কিন্তু পিছত অস্বীকাৰ কৰিছিল। তেওঁলোকে মোক প্ৰতিদিনে মাৰধৰ কৰিছিল আৰু মোক হত্যা কৰাৰ ভাবুকি দিছিল। যদি মোৰ কিবা হয়, মোৰ পৰিয়াল দায়বদ্ধ হ’ব ।”
তনুৱে উল্লেখ কৰা বিকি ওৰফে ভিকাম মাৱাই, উত্তৰ প্ৰদেশৰ আগ্ৰাৰ বাসিন্দা । যোৱা ছয় বছৰ ধৰি তনুৰ সৈতে সম্পৰ্কত আছিল বিকি ।
ভিডিঅ’টো ভাইৰেল হোৱাৰ পিছতেই আৰক্ষী অধীক্ষক ধৰ্মবীৰ সিঙৰ নেতৃত্বত আৰক্ষীৰ এটা দল সমস্যাৰ সমাধান কৰিবলৈ তনুৰ ঘৰলৈ ৰাওনা হৈছিল । তেতিয়ালৈ সেই স্থানত এক ৰাজহুৱা পঞ্চায়তৰ আহ্বান কৰি সমগ্ৰ বিষয়টো সমাধান কৰিবলৈ চেষ্টা কৰি থকা হৈছিল । তনুৱে প্ৰাণ হেৰুৱাৰ ভয়ত পৰিয়ালৰ সৈতে থাকিবলৈ অস্বীকাৰ কৰিছিল । কিন্তু তনুৰ পিতৃয়ে কোনো লোককে তেওঁৰ সৈতে ব্যক্তিগতভাৱে কথা পাতিবলৈ বাধা প্ৰদান কৰিছিল ।
তাৰ পিছতেই সংঘটিত হয় ভয়ংকৰ কাণ্ড । দেশী কাট্টাৰে মহেশে তেওঁৰ কন্যাৰ বুকু চালনী কৰি তোলে । একে সময়তে, তনুৰ ভাতৃ ৰাহুলে তনুৰ কপাল, ডিঙি আৰু তাইৰ চকু আৰু নাকত লক্ষ্য কৰি গুলী চালনা কৰে । দুৰ্ভগীয়া তনুৱে ঘটনাস্থলীতেই মৃত্যুক আকোঁৱালি লয় । এই ঘটনাৰ পিছতেই আৰক্ষীয়ে তদন্ত আৰম্ভ কৰিছে । আৰক্ষীয়ে পিতৃ আৰু ভাতৃক গ্ৰেপ্তাৰ কৰিছে বুলি জানিবলৈ পৰা গৈছে ।