Golakganj thana: ধুবুৰী জিলাৰ লক্ষীমাৰী দ্বিতীয় খণ্ড গাঁৱৰ পৰা আজি হত্যাকাৰী শিক্ষকক ফাঁচীৰ দাবীত বিভিন্ন দল সংগঠন তথা স্থানীয় সহস্ৰাধিক ৰাইজে মৃতদেহ লৈ গোলকগঞ্জ থানা ঘেৰাও কৰিবলৈ সমদল কৰি আহে।
- গোলকগঞ্জ থানাৰ বিশাল আৰক্ষী বাহিনী গোলকগঞ্জৰ দীনেশ চন্দ্ৰ সৰকাৰ দলঙৰ কাষত বেৰিকেড লগাই সমদলকাৰীক আটক কৰে। ইয়াক লৈ দুয়োপক্ষৰ ঠেলা হেঁচা খণ্ড যুদ্ধৰ সৃষ্টি হয়।
- গাঁও খনত এক ঘৰুৱা কাজিয়াৰ পৰিণতিত লক্ষীমাৰী মজলীয়া ইংৰাজী বিদ্যালয়ৰ শিক্ষক শ্বাহ আলম সৰকাৰ তেঁৱৰ পুত্ৰ ইনজামামুল সৰকাৰ আৰু ভাগিন ৰেজ্জাক তালুকদাৰ ২৫ ডিচেম্বৰৰ নিশা অতৰ্কিতে মিৰাজুল ইছলামৰ ঘৰত প্ৰৱেশ কৰি ডেগাৰেৰে খপিয়ায়। মিৰাজুলক বচাবলৈ পত্নী আমিনা বিবি আৰু ভাতৃ সাহাজুল ইছলাম আগবাঢ়ি যোৱাত সিহঁতকো চোকা অস্ত্ৰৰে আক্ৰমণ কৰি পলায়ন কৰে।
ADVERTISEMENT
- নিশাতে পৰিয়ালৰ লোক গোলকগঞ্জ থানাত এজাহাৰ দিবলৈ আহে। থানাত আৰক্ষী বিষয়াই এজাহাৰ নলৈ দাবী ধমকি দি খেদি পঠিয়ায়। মিৰাজুলৰ অৱস্থা সংকটজনক হোৱাত নিশাতে কোচবিহাৰৰ ব্যক্তিগত নাৰ্চিংহোমত ভৰ্তি কৰে। ধনৰ অভাৱত চিকিৎসা আধাতে সামৰি ২৭ ডিচেম্বৰৰ নিশা ঘৰত ঘুৰাই আনে। পিছদিনা পুনৰ এজাহাৰ দিবলৈ যোৱাত অভব্য আচৰণ কৰি ঘুৰাই পঠিয়ায়।
- আক্ৰমণকাৰী শিক্ষক শ্বাহ আলম থানাৰ সন্মুখত দপদপাই ঘুৰি ফুৰাৰ লগতে আক্ৰমণকাৰীৰ বিৰূদ্ধে এজাহাৰ নোলোৱা কাৰ্যত ক্ষুব্ধ হৈ গাঁও খনৰ দুই শতাধিক ৰাইজ থানা ঘেৰাও কৰে। উপায়ন্তৰ হৈ আৰক্ষীয়ে এজাহাৰ সংগ্ৰহ কৰি ২৯৮/২৪ নম্বৰত গোচৰ ৰুজু কৰি নিশাৰ ভিতৰতে ইনজামামুল আৰু ৰেজ্জাকক গ্ৰেপ্তাৰ কৰে।
- ৰহস্যজনক ভাবে গ্ৰেপ্তাৰ নহয় শিক্ষক শ্বাহ আলম সৰকাৰ। ৩০ ডিচেম্বৰত শিক্ষক জনৰ বিৰুদ্ধে তাৎক্ষণিক ভাবে বিভাগীয় ব্যৱস্থা গ্ৰহণৰ দাবীত স্থানীয় ৰাইজ আৰু অভিভাৱক সকল বিদ্যালয় ঘেৰাও কৰি স্মাৰকপত্ৰ প্ৰদান কৰে। কালি পুৱতি নিশা গুৱাহাটী চিকিৎসা মহাবিদ্যালয়ত চিকিৎসাধীন অৱস্থাত মিৰাজুলৰ মৃত্যু হয়।
- মৃত্যুৰ বাতৰি প্ৰচাৰ হোৱাত অঞ্চলটোত তীব্ৰ প্ৰতিক্ৰিয়াৰ সৃষ্টি হয়। স্থানীয় দল সংগঠন ক্ষুদ্ধ হৈ পৰে। খবৰ পাই ভীতিগ্ৰস্ত হৈ পৰে আৰক্ষী। ৰাইজৰ ৰোষত পৰাৰ ভয়তে নাটকীয় ভাবে আৰক্ষীয়ে সন্ধিয়া শক্তিমান ধাৰাবাহিকৰ শক্তিমানৰ দৰে গোপন স্থানৰ পৰা গ্ৰেপ্তাৰ কৰে।
- আৰক্ষীৰ লগত হত্যাকাৰীৰ গোপন বুজাবুজি থকাৰ অভিযোগ তুলি আজি সদৌ অসম গৰিয়া মৰিয়া দেশী জাতীয় পৰিষদৰ ধুবুৰী জিলা সমিতি , দেশী জনগোষ্ঠীয় মঞ্চ,অসমৰ জিলা সমিতি আৰু আক্ৰাছুৰ জিলা সমিতিৰ উদ্যোগত স্থানীয় সহস্ৰাধিক ৰাইজৰ সহযোগত সমদল উলিওৱা হয়।
- প্ৰায় দুঘন্টা ধৰি আৰক্ষীয়ে সমদলকাৰীক আটক কৰি ৰাখে। যাৰ ফলত প্ৰচণ্ড যান যটৰ সৃষ্টি হয়। যোগাযোগ ব্যহত হৈ পৰে। ঘটনাস্থলীতে মিৰাজুলৰ পত্নী শোকত ভাগি ঢলি পৰি মুৰ্চ্ছা যায়। ততালিকে তেওঁক গোলকগঞ্জ সমূহীয়া স্বাস্থ্য কেন্দ্ৰ লৈ নিয়া হয়।
- ঘটনাস্থলীত অতিৰিক্ত আয়ুক্ত উপস্থিত হৈ উচিত তদন্তৰ প্ৰতিশ্ৰুতি দিয়াত পৰিস্থিতি নিয়ন্ত্ৰণ হয়। মৃতদেহ লৈ প্ৰতিবাদকাৰী ঘৰলৈ উভতি যায়।