Assam is the most polluted state in the country:
ভয়ংকৰ বায়ু প্ৰদূষণৰ গ্ৰাসত পৰিছে অসম। আজিৰ দিনটোত সামগ্রিকভাৱে অসমৰ গড় প্ৰদূষণৰ মাত্ৰা দেশৰ ৰাজ্যবোৰৰ ভিতৰত সর্বোচ্চ। আকৌ অসমৰ ভিতৰতে দিছপুৰ আৰু বৃহত্তৰ গুৱাহাটীৰ বায়ু প্ৰদূষ্কাৰ সূচাংকৰ পৰিমাণ আটাইতকৈ বিপজ্জনকৰূপে পৰিগণিত হয়। আজি গুৱাহাটীৰ প্ৰদূষিত বায়ুমণ্ডল ইমানেই বিষাক্ত হৈ পৰে যে ই মানর শৰীৰৰ গুৰুতৰ ক্ষতিসাধন কৰিব পাৰে। একাধিক সংস্থাই আজি এই পৰিসংখ্যা নির্ণয় কৰিছে। বায়ুমণ্ডল অতি বিষাক্ত হৈ পৰাৰ বাবেই গুৱাহাটীৰ বহু লোকে আজি উশাহ-নিশাহত অসুবিধাৰ সন্মুখীন হয়।
বায়ুমণ্ডলৰ প্ৰদূষণৰ মাত্ৰা ছটা স্তৰত পৰীক্ষা কৰা হয়। সেই অনুসৰি, বায়ুৰ মান সূচাংক (একিউআই) ০-৫০লৈ ভাল তথা মানসম্পন্ন বুলি গণ্য কৰা হয়। ৫১-১০০লৈ সূচাংক থাকিলে মধ্যমীয়া বুলি গণ্য কৰা হয়। ১০১-১৫০ লৈ সূচাংক স্পৰ্শকাতৰ। ১৫১-২০০লৈ সূচাংক অস্বাস্থ্যকৰ। তেনেদৰে ২০১-৩০০লৈ সূচাংক হ’ল অতি অস্বাস্থ্যকৰ। আনহাতে, ৩০১-৫০০লৈ সূচাংকক অতি বিপজ্জনক বুলি গণ্য কৰা হয়।
সামগ্রিকভাৱে আজি দেশৰ ৰাজ্যসমূহৰ ভিতৰত অসমৰ সূচাংক হয় ২২০ আৰু এয়া হ’ল অতি অস্বাস্থ্যকৰ। বিশ্বৰ অন্যতম প্রদূষিত মহানগৰ হ’ল দিল্লী। সেই দিল্লীৰে আজি সামগ্রিক একিউআই হ’ল ২১০। ৰাজ্যবোৰৰ একিউআইৰ আজিৰ তালিকাত শীৰ্ষত থকা ৰাজ্যখনেই হ’ল অসম। এই তালিকাত দ্বিতীয় স্থানত আছে দিল্লী।
অসম-দিল্লীৰ বাদে দেশৰ আন সকলো ৰাজ্য আৰু কেন্দ্ৰীয়শাসিত অঞ্চলৰ একিউআই আজি ২০০ৰ তলত থাকে। অসমৰ ভিতৰত আকৌ আজিৰ দিনটোত সর্বাধিক প্রদূষিত অঞ্চলৰূপে চিহ্নিত হয় দিছপুৰ। আজি সন্ধিয়া দিছপুৰৰ একিউআই ৫১৮লৈ বৃদ্ধি হয়। সেই হিচাপত দিছপুৰ আজি ভাৰতৰ ভিতৰতে সৰ্বাধিক প্ৰদূষিত অঞ্চলৰূপেও পৰিগণিত হয়।
উল্লেখ্য যে দেশৰ বায়ু প্ৰদূষণৰ এই সূচাংকৰ পৰিমাণ কেন্দ্ৰীয় প্ৰদূষণ নিয়ন্ত্ৰণ পৰিষদৰ তথ্যত প্ৰকাশ পাইছে। প্ৰদূষণ নিয়ন্ত্ৰণৰ শুনি ভাল লগা কথাবোৰহে অসমৰ নেতৃত্ব লোৱাসকলে আওৰাই আহিছে। নিশ্চিতভাৱে ইয়াত চৰকাৰ-প্ৰশাসনে মূল ভূমিকা লৈ আহিছে; কিন্তু কথাবোৰক হাতে-কামে ৰূপায়ণত ন্যূনতমো কোনো ব্যৱস্থা লোৱা হোৱা নাই। চৰকাৰ-প্ৰশাসন যে ইয়াৰ প্রতি চূড়ান্ত দায়বদ্ধহীন, সেয়া তেওঁলোকে নিজেই প্ৰমাণ কৰিছে।
চলিত মাহৰ দ্বিতীয় সপ্তাহৰ পৰাই বায়ুমণ্ডলৰ প্ৰদূষণৰ মাত্রা বৃদ্ধি হয়। অথচ এই ক্ষেত্রত কোনো কার্যব্যৱস্থা অদ্যাপি লোৱা নাই। প্ৰদূষণ সৃষ্টিকাৰী উদ্যোগৰ পৰা জধে-মধে চলি থকা নির্মাণকার্য অন্ততঃ সাময়িকভাৱে হ’লেও ধৰণৰ নিয়ন্ত্ৰণলৈ অনাৰ পদক্ষেপ লোৱা হোৱা নাই। অথচ এনে ধৰণৰ। তাৎক্ষণিকভাৱে গ্ৰহণৰে দিল্লীৰ পৰিৱেশ সাময়িকভাৱে হ’লেও সুস্থিৰ কৰিবলৈ চেষ্টা চলাই অহা হৈছে।
পাহাৰসমূহতো নিয়মিতভাৱে খনন চলিছে। এইবোৰ বন্ধ কৰাৰো কোনো উদ্যোগ নাই। ব্ৰহ্মপুত্ৰৰ পৰা উৰি অহা ধূলি-বালিয়ে গুৱাহাটী আৰু ইয়াৰ দাঁতি-কাষৰীয়া অঞ্চলৰ বায়ুমণ্ডল স্বাভাৱিকভাৱে প্ৰদূষিত কৰে। তেনে ক্ষেত্ৰত বায়ু প্ৰদূষণ ৰোধৰ অন্যান্য ব্যৱস্থাসমূহ নলৈ হাত সাৱটি বহি থকাটোৱে গুৰুতৰ বিষয়টোৰ প্ৰতি চৰকাৰ-প্ৰশাসনৰ দায়বদ্ধহীনতাকে স্পষ্ট কৰিছে।
প্ৰসংগক্রমে উল্লেখ্য যে গুৱাহাটী মহানগৰীৰ পাৰ্শ্বৱৰ্তী উত্তৰ গুৱাহাটীৰ একিউআই আজি ২৪৩ লৈ বৃদ্ধি হয়। এই সূচাংক অতি অস্বাস্থ্যকৰ শ্ৰেণীত পৰে। উত্তৰ গুৱাহাটীত চলি থকা ব্যাপক নির্মাণ কাৰ্য আৰু উদ্যোগসমূহৰ ওলোৱা ধোঁৱাই হ’ল বায়ু প্রদূষণৰ মাত্ৰা এনেদৰে বৃদ্ধি কৰাৰ অন্যতম কাৰণ। পলাশবাৰীৰো একিউআই ২২১লৈ বৃদ্ধি হয়।