Indian People’s Theathre Association protests:
প্ৰকৃতিৰ ওপৰত আক্ৰমণৰ অন্যতম এক অংশ হ’ল বনধংস’। যোৱা সময়ছোৱাত অসম চৰকাৰে উন্নয়নৰ নামত কোনো বিকল্প ব্যৱস্থা নকৰাকৈ জধেমধে য’তে-ত’তে পাহাৰ খনন আৰু গছ কাটিবলৈ লৈছে। ফলত জলবায়ুৰ পৰিৱৰ্তন আৰু গোলকীয় উষ্ণতা বৃদ্ধিত ইয়াৰ প্ৰভাৱ বাৰুকৈয়ে পৰিব।
শেহতীয়াকৈ গুৱাহাটী মহানগৰীত উৰণ সেতু নিৰ্মাণৰ নামত দীঘলীপুখুৰী পাৰ আৰু ভৰলুমুখ অঞ্চলত শতবৰ্ষ গৰকা বহু সংখ্যক গছ জধেমধে কাটিবলৈ যোজা কৰিছে। বিভিন্ন প্ৰগতিবাদী দল-সংগঠন আৰু মহানগৰীৰ সচেতন নাগৰিক সকলে গণতান্ত্ৰিক ভাৱে প্ৰতিবাদ সাব্যস্ত কৰিছে। তীব্ৰ প্ৰতিবাদ আৰু সামাজিক ন্যায়ৰ বাবে কিছু সচেতন নাগৰিকে ন্যায়ালয়ৰ দ্বাৰস্থ হোৱাত চৰকাৰে শপতনামা দাখিল কৰিবলৈ বাধ্য হৈছে। ভৰলুমুখৰ প্ৰতিবাদীসকলৰ ভিতৰৰে চিত্ৰ শিল্পী মাৰ্শ্বেল বৰুৱা আৰু অংকুমান বৰদলৈক তেওঁলোকৰ ৰং-তুলিকাৰে অংকন কৰা প্ৰতিবাদী চিত্ৰৰ বাবে চৰকাৰৰ পুলিচ বাহিনীয়ে বেআইনী ভাৱে গ্ৰেপ্তাৰ কৰিছে।
ভাৰতীয় গণনাট্য সংঘৰ অসম ৰাজ্যিক সমিতিৰ সভাপতি শৰৎ চন্দ্ৰ নেওগ আৰু প্ৰধান সম্পাদক বিপুল তালুকদাৰে এক প্ৰেছ বিজ্ঞপ্তিত এনে অ-গণতান্ত্ৰিক ফেচীবাদী কাৰ্যক তীব্ৰ ভাষাৰে নিন্দা কৰিছে আৰু শিল্পীদ্বয়ক বিনাচৰ্তে মুক্তিৰ দাবী কৰিছে।
বিবৃতিটোত সভাপতি আৰু সম্পাদক গৰাকীয়ে কয় যে গুৱাহাটী মহানগৰীৰ উন্নয়ন সকলোৰে কাম্য। গণনাট্য সংঘৰ ৰাজ্যিক সমিতিয়েও মহানগৰীৰ নাগৰিক সকলে ভুগি থকা সমস্যাৰ সমাধান আৰু উন্নয়নৰ দাবী কৰি আহিছে। অকল পৰিৱেশ ধংস কৰি উৰণ সেতুৰ নিৰ্মাণ কৰাৰ দ্বাৰাই মহানগৰীৰ উন্নয়ন নহয়। কৃত্ৰিম বানকে ধৰি এশ-এবুৰি সমস্যাৰ সন্মুখীন হৈ থকা মহানগৰীৰ বাসিন্দাৰ বাবে চৰকাৰৰ আৰু বহুতো কৰণীয় আছে। সেইবোৰ কামত চৰকাৰক গুৰুত্ব দিবলৈ সোৱঁৰাই দিয়ে আৰু গছ কটাৰ দৰে মহানগৰীৰ পাৰিপাৰ্শ্বিকতা বিনষ্টকাৰী যিকোনো পদক্ষেপ গ্ৰহণৰ পৰা চৰকাৰক বিৰত থাকিবলৈ আহ্বান জনায়।