Assam DGP:
দেশত থকা অবৈধ বাংলাদেশীক বিচাৰি উলিয়াই ভাৰতৰ পৰা বিতাড়িত কৰিবলৈ কেন্দ্ৰীয় গৃহ মন্ত্রণালয়ে সকলো ৰাজ্যক নির্দেশ দিছে। অসমতো ইয়াকে লৈ অব্যাহত থকা তৎপৰতাৰ অংশ হিচাপে পুৰুষ-মহিলাসহ ১৪ জনক বুধবাৰে পুৱতি নিশা বিতাড়ন কৰা হয়। ইয়াৰ বিপৰীতে বিদেশী ন্যায়াধিকৰণ আৰু ন্যায়ালয়ৰ দ্বাৰা ঘোষিত অনুপ্ৰৱেশকাৰী বহুতকে আৰক্ষীয়ে বিচাৰি পোৱা নাই। আনকি গৃহ মন্ত্রণালয়ৰ নিৰ্দেশৰ পাছত ঘোষিত অনুপ্ৰৱেশকাৰীসকলক স্থানীয় আৰক্ষী থানাত হাজিৰ হ’বলৈ জাৰি কৰা নির্দেশো বহুতে অমান্য কৰে।
ইয়াৰ পৰিপ্ৰেক্ষিতত অসম আৰক্ষীৰ মুখ্য কার্যালয়ে সকলো জিলাৰ আৰক্ষী অধীক্ষকক তেনে লোকসকলক শীঘ্রে করায়ত্ত কৰাৰ লগতে সন্দেহজনক নাগৰিকৰ তালিকা প্রস্তুতৰ নিৰ্দেশ দিছে। তদুপৰি সন্দেহজনক লোক থকা বুলি ধাৰণা কৰা অঞ্চলত জিলা আৰক্ষীক বিশেষ অভিযান চলাবলৈয়ো নির্দেশ দিয়া হৈছে। তেনে লোকৰ গতি-বিধিৰ ওপৰতো চকু ৰখাৰ লগতে চোৰাংচোৱাক অধিক তৎপৰ হ’বলৈ বিভিন্ন পৰামৰ্শ আগবঢ়োৱা হৈছে।
আৰক্ষীৰ সূত্রই সদৰী কৰা অনুসৰি, সন্দেহজনক লোক অধিক থকা বুলি চর্চা চলি অহা ৰাজ্যৰ নির্দিষ্ট কেইখনমান জিলাৰ ওপৰত বিশেষ দৃষ্টি ৰখা হৈছে। আৰক্ষীৰ অভিযানৰ ফলত তেনে লোকে যাতে আন জিলালৈ গৈ আত্মগোপন কৰিব নোৱাৰে, তাৰ প্ৰতি লক্ষ্য ৰাখি চোৰাংচোৱা ব্যৱস্থাটোক অধিক সক্রিয় কৰাৰ পৰামর্শ দিছে আৰক্ষীৰ উর্ধ্বতন কর্তৃপক্ষই।
ইপিনে, সন্দেহজনক লোকৰ তালিকা প্রস্তুতত গাঁওপ্রধানসকলক অধিক দায়বদ্ধ কৰা হৈছে। কোনো গাঁওপ্রধানে যদি ইচ্ছাকৃতভাবে তেনে লোকৰ তথ্য গাপ দিয়া বুলি প্রমাণিত হয়, তেন্তে বিধি অনুসৰি ব্যৱস্থা গ্রহণৰো স্থিতি গ্রহণ কৰিছে আৰক্ষীয়ে। উল্লেখ্য যে ১৪ জন লোকক বিতাড়নৰ পাছত আৰু অধিক লোকক বাংলাদেশলৈ পঠিওৱাৰ ব্যৱস্থা কৰিছে অসম আৰক্ষীয়ে। বাংলাদেশীক আশ্রয় দিয়া লোকসকলৰ বিৰুদ্ধেও কঠোৰ ব্যৱস্থা গ্রহণ কৰা হ’ব বুলি আৰক্ষীৰ মুখ্য কার্যালয়ে জিলাবোৰক অৱগত কৰিছে। এনে নির্দেশৰ পাছতে অনুপ্রৱেশকাৰী তথা অবৈধ বাংলাদেশী বিচাৰি পিয়াপি দি ফুৰিছে আৰক্ষী আৰু চোৰাংচোৱাৰ দল।