Powercut:ডায়েলাইছিছৰ সময়ত চিকিৎসালয়ত বিদ্যুৎ বিচ্ছিন্ন। মেচিনত আবদ্ধ হৈ পৰিল ৰোগীৰ তেজ। দীৰ্ঘ সময়ৰ পাছতো ভাল নহ’ল যন্ত্ৰ। তাতেই মৃত্যু হ’ল ৰোগীৰ। উত্তৰ প্ৰদেশৰ এখন চিকিৎসালয়ৰ এই ঘটনাই কঁপাই তুলিছে সেই ৰাজ্যৰ স্বাস্থ্য ব্যৱস্থা। উত্থাপন হৈছে প্ৰশ্ন ।
চিকিৎসালয়ত বিদ্যুৎ বিচ্ছিন্ন হোৱাটো নতুন কথা নহয়। অৱশ্যে চিকিৎসালয়ত সাধাৰণতে জেনেৰেটৰ থাকে। বিদ্যুতৰ সমস্যাৰ ক্ষেত্ৰত জেনেৰেটৰ চলাই ৰোগীৰ প্ৰয়োজনীয়তা পূৰণ কৰা হয়। কিন্তু এই বিশেষ চিকিৎসালয়খনত দীৰ্ঘদিন ধৰি জেনেৰেটৰটো অচল হৈ আছে বুলি অভিযোগ উঠিছে।
চিকিৎসালয়ৰ কৰ্মচাৰীয়ে জনোৱা মতে, জেনেৰেটৰত ইন্ধন নাই। যিটো কোম্পানীৰ পৰা এই ইন্ধন ক্ৰয় কৰা হয়, সেই কোম্পানীয়ে দীৰ্ঘদিন ধৰি চিকিৎসালয়খনলৈ ইন্ধন যোগান ধৰা নাই। সেই কাৰণেই এই মৃত্যু।
উত্তৰ প্ৰদেশৰ বিজনোৰ জিলা চিকিৎসালয়ত সংঘটিত হৈছে এই ঘটনা। ২৬ বছৰীয়া ছাৰফৰাজ আহমেদক বৃক্কৰ সমস্যাত ভৰ্তি কৰোৱা হৈছিল চিকিৎসালয়ত।
তেওঁৰ লগত আছিল তেওঁৰ মাতৃ। বিজনুৰৰ ফুলছান্দা গাঁৱৰ বাসিন্দা। চিকিৎসালয়ত ডায়েলাইছিছ চলি আছিল ছাৰফৰাজৰ।
কিন্তু হঠাৎ তাৰ মাজতে চিকিৎসালয়খনৰ বিদ্যুৎ যোগান বন্ধ হৈ গ’ল। জেনেৰেটৰ চলাবলৈ চেষ্টা কৰা হৈছিল যদিও জেনেৰেটৰত ইন্ধন নথকাৰ বাবে সেয়া কৰিব পৰা নগ’ল।
যুৱকজনৰ মাতৃয়ে অভিযোগ কৰে যে চিকিৎসালয়ৰ বিদ্যুৎ বন্ধ হোৱাৰ পাছত যেতিয়া ডায়েলাইছিছ মেচিনটো বন্ধ কৰি দিয়া হৈছিল তেতিয়া পুত্ৰৰ বহু পৰিমাণৰ তেজ মেচিনটোৰ ভিতৰত আবদ্ধ হৈ পৰিছিল।
তাইৰ কথাত, “মোৰ ল’ৰাৰ আধা তেজ মেচিনত আবদ্ধ হৈ আছিল। মই সকলোৰে হাতে ভৰিয়ে ধৰিছিলো, কিন্তু কোনেও সহায় নকৰিলে। কিছুসময়ৰ পাছতে ল’ৰাটোৰ মৃত্যু হয়।”
যদিও বিশেষজ্ঞসকলে জনাইছে, ডায়েলাইছিছৰ সময় বেছি দীঘল হ’লে মেচিনৰ মাজেৰে ২০০ৰ পৰা ২৫০ মিলিলিটাৰ তেজ পাৰ হৈ যায়। কিন্তু মেচিনটোৱে কাম কৰা বন্ধ কৰি দিলে, যাৰ বাবে প্ৰক্ৰিয়াটো পিছুৱাই গ’ল। ইয়াৰ ফলত ৰোগীজনৰ অৱস্থা আৰু অধিক বেয়া হৈ পৰে। সমগ্ৰ ঘটনাৰ তদন্ত আৰম্ভ হৈছে।
