Cuon Alpinus in Kaziranga:
‘আমাৰ মানুহে চামে চামে দেখি আহিছে এই ৰাং কুকুৰ। এতিয়া কমিল। সৰু সৰু জাকত পাহাৰৰ মাজে মাজে দেখা যায়। যিকোনো চিকাৰ সহজেই ধৰি খায়।’ কাজিৰঙা ৰাষ্ট্ৰীয় উদ্যান আৰু কাৰ্বি আংলঙৰ পাহাৰৰ সীমান্ত অঞ্চলত শেহতীয়াকৈ ৰাং কুকুৰৰ উপস্থিতি ধৰা পৰাৰ পাছতে পাহাৰীয়া জিলাখনত কামসিং হাঞ্চেই শুক্ৰবাৰে ৰাং কুকুৰৰ বিষয়ে প্রকাশ কৰে এনেদৰে।
উল্লেখ্য যে ৰাজ্যৰ মুখ্যমন্ত্রী ড: হিমন্ত বিশ্ব শর্মাই এক বহুদিনীয়া বিচাৰ-খোচাৰৰ অন্তত এই সীমান্ত অঞ্চলত ৰাং কুকুৰৰ নিশ্চিত উপস্থিতি ধৰা পৰাৰ কথা প্রকাশ কৰাৰ লগতে জনসাধাৰণে প্রকাশ কৰিছে ৰাং কুকুৰৰ উপস্থিতিৰ এই তথ্য।
মুখ্যমন্ত্ৰীয়ে নিজৰ সামাজিক মাধ্যমত শুভ বাতৰি বুলি উল্লেখ কৰি প্ৰকাশ কৰিছে এনেদৰে-‘কাজিৰঙা-কাৰ্বি আংলং অঞ্চলত কেমেৰাত উপস্থিতি ধৰা পৰা কুৱন পাইনছ বৈজ্ঞানিক নামৰ জন্তুবিধৰ আমাৰ বাবে চিনাকি নামটি হৈছে ৰাং কুকুৰ। নিজৰ ওজনতকৈ আঠ গুণ বেছি ওজনৰ প্ৰাণীকো চিকাৰ কৰাত সিদ্ধহস্ত ৰাং কুকুৰৰ উপস্থিতি অসমৰ সম্পূৰ্ণ জৈৱ-বৈচিত্র্যৰ এক উৎকুষ্ঠ নিদর্শন। প্রতিটো বৈজ্ঞানিক অগ্ৰগতিৰ আঁৰত বছৰ বছৰ ধৰি কৰা কঠোৰ পৰিশ্ৰম বৈজ্ঞানিক অধ্যয়নসমূহ প্রায় মাহৰ পাছত মাহ, আনকি বছৰ বছৰ ধৰি চলি থাকে। তাৰ পাছত আমি ইয়াৰ ফলাফল সম্পর্কে অৱগত হওঁ। এই যাত্রা অগণন ঘণ্টাৰ গৱেষণা, পৰীক্ষা-নিৰীক্ষা, বিপৰ্যয় আৰু অধ্যৱসায়েৰে ভৰি আছে। প্রায় তিনি বছৰ অধ্যয়ন কৰা গৱেষকসকলে এতিয়াহে বৈজ্ঞানিক গৱেষণা পত্ৰখন বিশ্লেষণ কৰিছে।’
উল্লেখ্য যে ৰাং কুকুৰ এবিধ মাংসহাৰী জন্তু, যাৰ বৈজ্ঞানিক নাম হৈছে কুৱন পাইনছ। ইয়াক ইংৰাজীত ড’লি বুলি কোৱা হয়। এতিয়া কাজিৰঙা আৰু কাৰ্বি আংলং অঞ্চলত এই জন্তুবিধ পোৱা যায় বুলি তথ্য পোৱা গৈছে। ৰাং কুকুৰ হৈছে ভাৰত আৰু দক্ষিণ এছিয়াৰ কিছুমান অঞ্চলত পোৱা এবিধ মাংসহাৰী জন্তু। ই মূলতঃ ভাৰতৰ কাজিৰঙা আৰু কার্বি আংলং অঞ্চলত পূৰ্বে প্ৰচুৰ পৰিমাণে পোৱা গৈছিল।
ৰাং কুকুৰৰ শৰীৰৰ দৈর্ঘ্য প্রায় ৯০-১১৪ ছেন্টিমিটাৰ আৰু ওজন প্রায় ১৫-২০ কিলোগ্রাম পর্যন্ত হ’ব পাৰে। ইয়াৰ নোম ডাঠ আৰু সেউজীয়া-বাদামী বৰণৰ হয়। ই দলবদ্ধভাবে বাস কৰে আৰু চিকাৰো কৰে। ইহঁতে দলবদ্ধভারে বৃহৎ জন্তু যেনে হৰিণা, সুঁৱৰ আদি চিকাৰ কৰিব পাৰে। ইতিমধ্যে ৰাং কুকুৰ এক বিপদাপন্ন প্রজাতি হিচাপে পৰিগণিত হৈছে আৰু ইয়াৰ মূল কাৰণ হৈছে বাসস্থান ধ্বংস আৰু চিকাৰৰ পৰিমাণ কমি অহাটো। এই প্রসংগত প্রকৃতিপ্রেমী অপূর্ব বল্লভ গোস্বামীয়ে প্রকাশ কৰিছে যে বিশ্ব ঐতিহ্য ক্ষেত্র কাজিৰঙা ৰাষ্ট্ৰীয় উদ্যানৰ সমীপৰ কাৰ্বি আংলং জিলাৰ অঞ্চলত কেমেৰাত উপস্থিতি ধৰা পৰিছে বিৰল প্ৰজাতিৰ বনৰীয়া ৰাং কুকুৰ।
উল্লেখ্য যে ২০০৪ত চৰকাৰৰ পৃষ্ঠপোষকতাত পৃথানীয়ে বিহৰা শিল কুঁৱাৰী বিস্ফোৰণৰ সমীপৰ বনাঞ্চলত আমি ৰাং কুকুৰৰ সন্ধান পাইছিলো। কুৱন পাইনছ বৈজ্ঞানিক নাম। ইয়াৰ গোষ্ঠী কেনিডি, প্রজাতি কুৱন আল পাইনছ। ৰাং কুকুৰ কাৰ্বি আংলং, ডিমা হাছাও, মেঘালয়ৰ বলফাকৰাম ৰাষ্ট্ৰীয় উদ্যান আদিত পোৱা যায়।
১৯৮১ত প্ৰথমবাৰৰ বাবে এই বন্যপ্রাণীটোৰ পিয়ল হৈছিল। পিয়লত ৰাং কুকুৰৰ কে’বাটাও পৰিয়াল পোৱা গৈছিল। ৰাং কুকুৰে বাঘৰ নিচিনাকৈ গাইগুটিয়া চিকাৰ নকৰে। একাধিক ৰাং পৈথন পৰিয়াল লগ লাগি দল সৃষ্টি কৰি চিকাৰ কৰে।’ এতিয়া পুনৰ চর্চালৈ আহিছে কাৰ্বি পাহাৰৰ ৰাং কুকুৰৰ দল। এতিয়া ইহঁতজাক বিলুপ্তিৰ পথত। এই সময়তে উপযুক্ত ব্যৱস্থা গ্ৰহণৰ লগতে বিজ্ঞানসম্মত সংৰক্ষণ প্রণালী ব্যৱহাৰৰে এই এমুঠি ৰাং কুকুৰক জীয়াই ৰাখিব পাৰিলে নিশ্চিতভাৱে এয়া হ’ব মানুহৰ বাবেই এক গৌৰৱৰ বিষয়।