Donald Trump:✒️পূৰ্বৰ তুলনাত এইবাৰ আমেৰিকা যুক্তৰাষ্ট্ৰত ভাৰতীয় ছাত্ৰ-ছাত্ৰীৰ সংখ্যা ব্যাপক হাৰত হ্রাস পাইছে। দেশখনৰ বিভিন্ন শিক্ষানুষ্ঠানত নামভৰ্তি কৰা ভাৰতীয় ছাত্ৰ-ছাত্ৰীৰ সংখ্যা ৭০ৰ পৰা ৮০ শতাংশ পর্যন্ত হ্রাস পাইছে বুলি শেহতীয়া তথ্যত পোৱা গৈছে।
ইয়াৰ মূলতে মার্কিন ৰাষ্ট্ৰপতি ড’নাল্ড ট্রাম্পৰ বিদেশী ছাত্র বিদ্বেষী নীতিৰ ফলত বৃদ্ধি পোৱা ভিছা সংকট বুলি চিহ্নিত হৈছে। এই ভিছা সংকট ইমানেই গভীৰ হৈছে যে বিভিন্ন ভাৰতীয় শিক্ষা পৰামৰ্শদাতা সংস্থাসমূহকো চিন্তিত কৰি তুলিছে।
এই সম্পর্কত হায়দৰাবাদস্থিত অভাৰচীজ কনছালটেন্ট শীর্ষক সংস্থাটোৰ কৰ্মকর্তা সঞ্জীৱ ৰায়ে কয়, ‘বছৰৰ এনে সময়ত ছাত্ৰ-ছাত্ৰীয়ে ভিছা সাক্ষাৎকাৰত অৱতীৰ্ণ হৈ উৰা মাৰিবলৈ প্রস্তুতি চলায়।
এই বছৰ আমি প্রতিদিনে প’র্টেল বিফ্ৰেছ কৰিও ভিছা শ্লট পোৱা নাই। বহু বছৰৰ পাছত এনে বেয়া অৱস্থাৰ সৃষ্টি হৈছে।’ মার্কিন বিষয়াবর্গই শীঘ্রে পর্যায়ক্রমে ভিছা শ্লট মুকলিৰ বাৰম্বাৰ প্ৰতিশ্ৰুতি দিয়াৰ পাছতো ফল ধৰা নাই বুলি ৰয়ে জনায়। পৰিণতিত আমেৰিকা যুক্তৰাষ্ট্ৰৰ বিভিন্ন উচ্চ শিক্ষানুষ্ঠানত অধ্যয়নৰ সপোন পুহি ৰখা ভাৰতীয় ছাত্র-ছাত্রীসকলে উদ্বিগ্নতাৰে সময় অতিবাহিত কৰিব লগা হৈছে।
ৰয়ে জনোৱা মতে, ভিছা শুটৰ ক্ষেত্ৰত আন এটা সমস্যাও দেখা দিছে। বহু ছাত্র-ছাত্রীয়ে শ্লট বুকিং কৰিবলৈ সক্ষম হৈছে যদিও তেওঁলোকে নিশ্চিতি পোৱা নাই। এই সম্পৰ্কত উইণ্ড’ অভাৰচীজ এডুকেছন কনছালটেন্সীৰ অংকিত জৈনে কয় যে মার্কিন কর্তৃপক্ষৰ পৰীক্ষণ পর্ব অব্যাহত থকাত অনুমতি অবিহনে ভিছা শ্লট মুকলি হ’ব পাৰে। গতিকে ভিছা শুট লাভ কৰাসকলেও নিশ্চিতি পোৱা নাই। ইয়াৰ পৰিপ্ৰেক্ষিতত একাংশ ছাত্র-ছাত্রীয়ে আন বিদেশী ৰাষ্ট্ৰত অধ্যয়নৰ সুযোগৰ সন্ধান কৰিবলৈ লৈছে।
এই সম্পর্কত এজন ২৩ বছৰীয়া ছাত্রই কয়, ‘মই অপেক্ষা কৰি থাকিব নোৱাৰিম। মই ইতিমধ্যে এটা শিক্ষাবর্ষ হেৰুৱালো। গতিকে মই আবেদনপত্র প্রত্যাহাৰৰ সিদ্ধান্ত লৈছো।’ সম্প্রতি ছাত্রজনে জার্মানীৰ কোনো শিক্ষানুষ্ঠানত অভিযান্ত্ৰিকৰ স্নাতকোত্তৰ শিক্ষা গ্ৰহণৰ চেষ্টা কৰিছে।
আনহাতে, এই সমস্যা সম্পর্কত আই-২০ ফেভাৰ নামৰ কনছালটেন্সীৰ অৰবিন্দ মাণ্ডুরাই কয়, ‘আগন্তুক কিছুদিনত ভিছা শ্লট খোল নাখালে হেজাৰ হেজাৰ সপোন ভাঙি চূৰমাৰ হ’ব। ভিছা নোপোৱা ছাত্ৰ-ছাত্ৰীৰ সংখ্যা ৮০ শতাংশ হ’ব। আমি আতংকিত হৈছো, কাৰণ প্রতিদিনে অগণন ছাত্র-ছাত্রী আৰু তেওঁলোকৰ অভিভাৱকসকলৰ ফোনকল পাই আছো।’
এই ক্ষেত্রত আন এটা সমস্যায়ো দেখা দিছে বুলি উল্লেখ কৰে মাণ্ডুৱাই। তেওঁ কয় যে যোৱা মার্চত আবেদন কৰা ভাৰতীয় ছাত্র-ছাত্ৰীসকলৰ যিসকলে সাক্ষাৎকাৰত অৱতীৰ্ণ হৈছিল, তেওঁলোকৰ অধিকাংশৰ আবেদনপত্র নাকচ হৈছে। আবেদনপত্ৰ নাকচৰ হাৰ অত্যধিক হৈছে বুলিও তেওঁ জনায়।
বিশেষজ্ঞসকলৰ মতে, সচৰাচৰ মার্কিন প্ৰব্ৰজন আৰু ৰাষ্ট্ৰীয়ত্ব আইনৰ ২১৪ (বি) ধাৰাৰ বাবে ভিছা আবেদন নাকচ হয়। আমেৰিকা যুক্তৰাষ্ট্ৰত শিক্ষা গ্রহণৰ পাছত স্বদেশলৈ ঘুৰি অহাৰ বলিষ্ঠ যুক্তি দিব নোৱাৰিলে উক্ত ধাৰাৰ অধীনত ভিছা আবেদন নাকচ হয়। অৱশ্যে এই সম্পর্কত টেক্সাছস্থিত ইউএছ এডমিছন নামৰ সংস্থাটোৰ ৰবি লথুমল্লাই জনায় যে ভিছা আবেদন নাকচ হোৱাৰ উক্ত আইনৰ সংশ্লিষ্ট ধাৰা পূৰ্বৰে পৰা আছে যদিও এইবাৰহে বাস্তৱ ক্ষেত্ৰত কাৰ্যকৰী কৰা হয়।
ফলত ভিছা আবেদন নাকচ হোৱাৰ ঘটনা বৃদ্ধি পাইছে। অৱশ্যে হায়দৰাবাদস্থিত মার্কিন কনছুলে প্ৰকাশ কৰা অনুসৰি, ভিছা শ্লটসমূহ পুনৰ কাৰ্যক্ষম হৈছে। কনছুল জেনেৰেলে ছাত্র-ছাত্রীসকলক দূতাবাস অথবা ৱেবছাইট পৰীক্ষণ কৰিবলৈ আহ্বান জনাইছে। উল্লেখ্য যে যোৱা বছৰ চীনক পিছপেলাই ভাৰতৰ তিনি লাখ ৩০ হেজাৰৰো অধিক ছাত্র-ছাত্রীয়ে আমেৰিকা যুক্তৰাষ্ট্ৰলৈ শিক্ষা গ্রহণ কৰিবলৈ যায়। দেশৰ বৈদেশিক মন্ত্রণালয়ৰ তথ্য অনুসৰি, ২০২৪ৰ পহিলা জানুৱাৰীলৈকে বিশ্বৰ বিভিন্ন দেশত শিক্ষা গ্রহণ কৰি থকা ভাৰতীয় ছাত্ৰ-ছাত্ৰীৰ সংখ্যা ১১.৬ লাখৰো অধিক আছিল