Cancer:✒️গেষ্ট্ৰিক ৰোগীক সচৰাচৰ চিকিৎসকে গ্ৰহণ কৰিবলৈ পৰামৰ্শ দিয়া তিনিবিধ ঔষধে কৰ্কটৰ সৃষ্টি কৰাৰ আশংকা প্রবল হৈছে। এই ঔষধ তিনিবিধ হ’ল ৰেনটাক, জিনটাক আৰু এচিলক।
গেষ্ট্রিকজনিত সমস্যা নিৰাময়ত ব্যৱহৃত এই তিনিবিধ ঔষধ হিষ্টামিন-২ ব্লক নামৰ ঔষধ গ্ৰুপৰ অন্তর্ভুক্ত। আমেৰিকা যুক্তৰাষ্ট্ৰত ৰেণ্টিডিন নামে উপলব্ধ হোৱা এই ঔষধ ভাৰতত ৰেনটাক, জিনটাক আৰু এচিলক নামেৰে বজাৰত পোৱা যায়।
এইসমূহ ঔষধৰ অধিক ব্যৱহাৰে কৰ্কটৰ সৃষ্টি কৰে বুলি বিগত কিছু বছৰ ধৰি চর্চা চলি আহিছে। এই ঔষধসমূহত থকা এন-নাইট্র’ছ’ডিমিথাইলামাইন (এনএনডিএমএ) নামৰ উপাদানে পাকস্থলী, খাদ্যনলী আৰু মূত্রাশয়ত কৰ্কটৰ সৃষ্টি কৰে বুলি ২০১৯ত আমেৰিকা যুক্তৰাষ্ট্ৰৰ খাদ্য আৰু ঔষধ নিয়ন্ত্রক সংস্থাই অভিযোগ পায়।
ইয়াৰ এবছৰৰ পাছত ২০২০ত দেশখনত এই ঔষধ নিষিদ্ধ হয়। ভাৰততো গেষ্ট্ৰিকৰ এই তিনিবিধ ঔষধক লৈ পৰীক্ষা-নিৰীক্ষা আৰম্ভ হয়। যোৱা বছৰৰ ডিচেম্বৰত গঠিত এখন বিশেষজ্ঞ সমিতিয়ে দাখিল কৰা প্রতিবেদন পর্যালোচনা কৰিছে কেন্দ্রীয় ঔষধ মান নিয়ন্ত্রক সংস্থা (চিডিএছচিঅ’)ই।
সংস্থাটোৰ এই পৰ্যালোচনাৰ ভিত্তিত কেন্দ্ৰীয় চৰকাৰে দেশৰ সকলো ৰাজ্যলৈ এই ঔষধ তিনিবিধ সম্পর্কত তদন্ত চলাবলৈ নিৰ্দেশ জাৰি কৰিছে। সূত্রই জনোৱা মতে, এই নির্দেশত কোৱা হৈছে যে গেষ্ট্ৰিকৰ এই তিনিবিধ ঔষধত থকা এন-নাইট্ৰ’ছ’ডিমিথাইলামাইন মাত্ৰা পৰীক্ষা কৰিব লাগিব।
তদুপৰি দোকান বা ফার্মাচীত যাতে অধিক দিন পৰি নাথাকে তাৰো বুজ ল’ব তদন্তকাৰীয়ে। সূত্রই জনোৱা মতে, এই তিনিবিধ ঔষধ গেষ্ট্ৰ’ছ’ফাজিয়াল বিফ্লাক্স ডিজিজ আৰু গেষ্ট্ৰিক আলচাৰ ৰোগীকো গ্রহণ কৰিবলৈ চিকিৎসকে পৰামৰ্শ দিয়ে।