Golokganj:
ধুবুৰী জিলাৰ হালাকুৰা আৰক্ষী তালাচী চকীৰ অন্তৰ্গত অসম পশ্চিমবংগ সীমান্তৰ পোকালাগী চতুৰ্থ খণ্ড গাঁৱৰ মোদক পাৰাৰ পথত যোৱা পচিছ আগষ্টৰ বিয়লি চোৰাং সৰবৰাহকাৰীয়ে গো মাংস পেলোৱা ঘটনাত জড়িতৰ অভিযোগত আজি আৰক্ষী অধীক্ষকে তালাচী চকীৰ বিজয় কুমাৰ ৰায় নামৰ এজন আৰক্ষী কনিষ্টবলক ৰিজাৰ্ভ ক্লজ কৰে।
গাঁও খনৰে দীৰ্ঘ দিন ধৰি চলি থকা নিষিদ্ধ মাংসৰ চোৰাং সৰবৰাহত এজন কনিষ্টবলৰ ওপৰত দোষ জাপি দি ভাৰপ্ৰাপ্ত বিষয়াক ৰক্ষণাবেক্ষণ দিয়া বুলি স্থানীয় ৰাইজে গুৰুতৰ অভিযোগ উত্থাপিত কৰিছে। জানিব পৰা মতে, পশ্চিমবংগৰ মানসাই অঞ্চলৰ পৰা দিনে নিশাই মোদক পৰা হৈ গো মাংসৰ আমদানি দীৰ্ঘ দিনৰ পৰাই চলি আহিছে। মাজে মাজে বাইকৰ পৰা নিষিদ্ধ মাংসৰ টোপোলা ছিঙি পৰা ঘটনা ইতিপূৰ্বে বহুবাৰ সংঘটিত হৈছে।
হিন্দু বসতিপূৰ্ণ এলেকাৰে নিষিদ্ধ গো-মাংসৰ সৰবৰাহ বন্ধ কৰাৰ বাবে গাঁও খনৰ ৰাইজে দীৰ্ঘ দিনৰ পৰা আৰক্ষী চকীৰ ভাৰপ্ৰাপ্ত বিষয়া গৰাকীক অৱগত কৰিও কোনো সুফল লাভ কৰা নাই। উপায়ন্তৰ হৈ স্থানীয় ৰাইজ গো মাংস সহ সৰবৰাহকাৰীক ধৰি আৰক্ষী চকীত চমজাই দিছিল। তৎসত্বেও গা লৰা নাছিল হালাকুৰা আৰক্ষী তালাচী চকীৰ ভাৰপ্ৰাপ্ত বিষয়া অথবা জিলা আৰক্ষী প্ৰশাসনৰ। সিদিনা বিয়লি চোৰাং বেপাৰীয়ে গাঁও খনেৰে বাইকত গো মাংস নিয়াৰ সময়ত মোনাৰ পৰা পথটোত পৰি যায়।
মন্দিৰৰ ওচৰে পাজৰে এনেকৈ গো মাংস সিচৰিত পৰি থকা প্ৰত্যক্ষ কৰি স্থানীয় ৰাইজৰ মাজত হুলস্থুলীয়া পৰিবেশৰ সৃষ্টি হয়। স্থানীয় মহিলা সকল হাতে হাতে ঝাৰু লৈ আহি আৰক্ষী প্ৰশাসনৰ বিৰুদ্ধে প্ৰতিবাদ সাব্যস্ত কৰে। প্ৰায় তিনি ঘন্টা ধৰি পথ অৱৰোধ কৰি আৰক্ষীৰ বিৰুদ্ধে বিভিন্ন শ্ল’গান দি পৰিবেশ উত্তাল কৰে। অৱশেষত সম জিলা আৰক্ষী অধীক্ষকৰ উপস্থিতিত পৰিস্থিতি নিয়ন্ত্ৰণ হয়। এই সন্দৰ্ভত কালি নিশা দুই বজাত গোলকগঞ্জ হালাকুৰা ছাগলীয়া আৰক্ষীৰ বিশাল বাহিনী পোকালাগী শিলকুৰীপাৰ আদিৰ অসম পশ্চিমবংগ সীমান্ত অঞ্চলত টহল দি চমক সৃষ্টি কৰে যদিও আজিকোপতি কোনো সৰবৰাহকাৰীক আটক কৰিবলৈ সক্ষম হোৱা নাই।
অকল কনিষ্টবল জনক ৰিজাৰ্ভ ক্ল’জ কৰি দায়িত্ব সামৰা বুলি চৰ্চিত হৈছে। উল্লেখ্য যে হালাকুৰা এলেকাত অকল গো মাংস সৰবৰাহই নহয় সমান ভাবে চলিছে অবৈধ ড্ৰাগছৰ সৰবৰাহ। গোপন থানাৰ আৰক্ষীয়ে গৈ অঞ্চলটোত ড্ৰাগছ সহ সৰবৰাহকাৰীক আটক কৰাৰ বিপৰীতে হালাকুৰা আৰক্ষীৰ ভুমিকাৰ ওপৰত সন্দেহ ঘনীভূত হৈছে সাধাৰণ ৰাইজৰ। সমগ্ৰ ঘটনাৰ উচ্চ পৰ্যায়ৰ তদন্ত কৰি দোষী ব্যক্তিৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে হালাকুৰাবাসী ৰাইজে।
ADVERTISEMENT