Imposition Of US Tariffs:
মার্কিন শুল্কবাণত একপ্ৰকাৰ জৰ্জৰিত হৈছে ভাৰতীয় টকা। মার্কিন ৰাষ্ট্ৰপতি ড’নাল্ড ট্রাম্পে ভাৰতীয় সামগ্রীত অত্যধিক শুল্ক আৰোপৰ ফলত বিগত ছদিন ধৰি ডলাৰৰ বিপৰীতে টকাৰ মূল্যৰ অৱনমন অব্যাহত আছে।
বুধবাৰে এক মার্কিন ডলাৰৰ বিপৰীতে ভাৰতীয় মুদ্রাৰ মূল্য ৮৭.৬৬ টকা হয়। কালিলৈকে এই অনুপাত ৮৭.৬৮লৈ অবনমিত হৈছিল। ভাৰতীয় মুদ্রাৰ মূল্যৰ এই অৱনমন বুধবাৰেও অব্যাহত থকাত ভাৰতীয় টকাৰ মূল্য পুনৰ দুই পইচা হ্রাস পায়।
তদুপৰি মঙলবাৰে বোম্বে ষ্টক এক্সচেঞ্জৰ সূচকাংক ছেনছেক্সৰো৮৪৯,৩৭ৰ পতন ঘটে। ফলত বিনিয়োগকাৰীসকলৰ কমেও ছয় লাখ কোটি টকাৰ লোকচান হয়। একেদৰে নতুন দিল্লীস্থিত ৰাষ্ট্ৰীয় ষ্টক এক্সচেঞ্জৰ সূচকাংকও ২৫৫.৭০ হ্রাস পায়।
স্বাভাৱিকতে ইয়াক লৈ উদ্বিগ্ন হৈছে অর্থনীতিবিদসকল। কালি গণেশ চতুর্থীৰ পৰিপ্ৰেক্ষিতত ষ্টক এক্সচেঞ্জ বন্ধ থাকে। ইপিনে, একাংশ বিশ্লেষকৰ মতে, মার্কিন শুল্কবাণৰ পৰিপ্ৰেক্ষিতত ভাৰতীয় শ্বেয়াৰ বজাৰৰ পৰা বিনিয়োগকাৰীসকলে ধন তুলি নিবলৈ ধৰাত এনে বিপৰ্যয়ৰ উদ্ভৱ হৈছে।
এই সম্পর্কত মুদ্রা বিশ্লেষক দিলীপ পার্মাৰে কয়, ‘ডলাৰৰ চাহিদা আৰু সৰবৰাহৰ মাজত ভাৰসাম্যহীনতাৰ সৃষ্টি হৈছে। এই ক্ষেত্ৰত ভাৰতীয় মুদ্রাৰ প্রতি পক্ষপাতিত্ব কম। বর্তমানে বজাৰ পৰিস্থিতি লক্ষ্য কৰি ক’ব পাৰি যে ভাৰতীয় মুদ্রাৰ অভিলেখ সৃষ্টিকাৰী পতন অৱশ্যম্ভাবী।’
উল্লেখ্য যে শেহতীয়াভাৱে নৰেন্দ্ৰ মোদী চৰকাৰে জিএছটিৰ হাৰ হ্ৰাসৰো সিদ্ধান্ত লৈছে। আগন্তুক দীপাৱলীৰ পৰা জিএছটিৰ নতুন হাৰ বলবৎ হোৱাৰ সম্ভাৱনা আছে। সম্প্রতি বজাৰত যি পৰিস্থিতিৰ সৃষ্টি হৈছে সেয়া লক্ষ্য কৰি জিএছটি হ্রাস হোৱালৈ অপেক্ষা কৰাৰ বাহিৰে ক্ষুদ্ৰ ব্যৱসায়ীসকলৰ বাবে আন উপায় নোহোৱা হৈছে। ক্ষতিগ্রস্ত ব্যৱসায়ীলৈ বিত্তীয় সাহায্য যোগানৰ যো-জা মোদী চৰকাৰৰ
একবিংশ শতিকাত ভাৰত-আমেৰিকা যুক্তৰাষ্ট্ৰৰ মাজত সবল হোৱা ৰণকৌশলগত সহযোগিতাত মাধমাৰ শোধাই ট্রাম্পে ভাৰতীয় সামগ্রীত অত্যধিক (৫০ শতাংশ) শুল্ক আৰোপ কৰাৰ ফলত অধিকাংশ খণ্ডৰে ব্যৱসায় তথা দেশৰ ৰপ্তানি বাণিজ্য ক্ষতিগ্রস্ত হোৱাৰ আশংকা প্রৱল হৈছে।
ৰাছিয়াৰ পৰা খাৰুৱা তেল ক্ৰয়ৰ ক্ষোভত ট্রাম্পে আৰোপ কৰা এই ৫০ শতাংশ শুল্কক লৈ দেশৰ বাণিজ্য মন্ত্রণালয়ে বর্তমানলৈকে কোনো প্রতিক্রিয়া প্রকাশ কৰা নাই যদিও সম্ভাব্য ক্ষতিৰ জোৰা মাৰিবলৈ চৰকাৰে প্ৰস্তুতি চলোৱাৰ ইংগিত পোৱা গৈছে।
উল্লেখ্য যে ট্রাম্পৰ এই শুল্কই প্রধানমন্ত্রী মোদীৰ গৃহ ৰাজ্য গুজৰাটসহ দেশৰ বিভিন্ন স্থানৰ লাখ লাখ ক্ষুদ্ৰ ৰপ্তানিকাৰীৰ লগতে চাকৰিৰ বজাৰলৈও ভাবুকি কঢ়িয়াই আনিছে। ঘাইকৈ এই শুল্কই বস্ত্র, মণিমুকুতা আৰু আ-অলংকাৰ, জোতা-ছেণ্ডেল, ক্রীড়াৰ সামগ্রী, আচবাব, ৰাসায়নিক দ্রব্য আদি খণ্ডত লোকচানৰ সাগৰত পেলোৱাৰ আশংকা আছে।
কাৰণ এনে সামগ্ৰী ভাৰতৰ পৰা আমেৰিকালৈ ৰপ্তানি হয়। গতিকে ভাৰত চৰকাৰে আমেৰিকা যুক্তৰাষ্ট্ৰক বাদ দি আন দেশলৈ এনে সামগ্ৰী ৰপ্তানি বৃদ্ধি কৰাৰ উদ্দেশ্যে ৰপ্তানিকাৰীসকলৰ স’তে আলোচনাত মিলিত হ’ব বুলি সূত্ৰই প্ৰকাশ কৰিছে। উল্লেখ্য যে সম্প্রতি ব্রিটেইনকে ধৰি অন্যান্য ইউৰোপীয় দেশ, অস্ট্রেলিয়া, সংযুক্ত আৰব আমিৰ শ্বাহী আদিৰ স’তে ভাৰতৰ বাণিজ্যিক চুক্তি আছে।
এই দেশসমূহলৈ বিভিন্ন সামগ্রী বিশেষকৈ বস্ত্ৰ ৰপ্তানি বৃদ্ধিৰ চেষ্টা চৰকাৰে চলাব বুলি সূত্রই সদৰী কৰিছে। উল্লেখ্য যে ৰাছিয়াৰ পৰা খাৰুৱা তেল ক্ৰয়ৰ বাবে ভাৰতক ‘ব্লেকমেইলিং’ৰ অপচেষ্টাত নামিছে ট্রাম্প। ট্রাম্পৰ অভিযোগ হ’ল যে ভাৰতে ৰাছিয়াৰ পৰা তেল ক্ৰয় কৰি দেশখনক ইউক্রেইনৰ স’তে যুদ্ধত লিপ্ত থাকিবলৈ সহায় কৰি আহিছে।
ইয়াৰ ‘পোটক’ তুলিবলৈ মার্কিন প্রশাসনে আজিৰ পৰা প্ৰযোজ্য হোৱাকৈ ভাৰতীয় সামগ্ৰীৰ ওপৰত শুল্ক ৫০ শতাংশলৈ বৃদ্ধি কৰিছে। আনহাতে, মার্কিন প্রশাসনে আৰোপ কৰা শুল্ক সম্পৰ্কত দেশৰ বৈদেশিক দপ্তৰৰ ৰাজ্যিক মন্ত্রী কীর্তি বর্ধন সিঙে কয়, ‘আমাৰ দেশৰ অর্থনীতি যাতে ক্ষতিগ্রস্ত নহয়, তাৰ প্ৰতি লক্ষ্য ৰাখি আমি যথোপযুক্ত পদক্ষেপ গ্রহণ কৰিম। মই নিশ্চিতি দিব বিচাৰিছো যে আমাৰ অৰ্থনীতিৰ শক্তিয়ে এই সময়ছোৱাৰ মাজেৰে আমাক আগবঢ়াই নিব। আমি লাভবান হোৱা দেশৰ পৰা শক্তি ক্ৰয় কৰি যাম।’
ADVERTISEMENT