সেয়া অতি অশান্ত তথা বিক্ষুব্ধ সময়ৰ কথা। মহাশূন্যত নিজস্ব গতিৰে বিচৰণ কৰি ফুৰিছিল উল্কাৰ দলে। মহাকর্ষণ শক্তিৰ বিচিত্র টানত সেইবোৰ আকৌ মহাশূন্যতে বিলীন হৈ পৰিছিল। সিবোৰৰ কিছু খণ্ডাংশ অৱশ্যে আছাৰ খাই পৰিছিল কোনো কোনো গ্ৰহৰ ওপৰত।পৃথিৱীৰ সৃষ্টিৰ মুহূৰ্তত এনে কিছুমান তাণ্ডৱেই ঘটিছিল।
বিভিন্ন গ্ৰহৰ জন্মবৃত্তান্তক লৈ মহাকাশ প্ৰেমীসকলৰ কৌতূহল সদায় তুংগত থাকে। বিশাল চেহেৰাৰ বাবে সৌৰজগতত ‘গুৰুগ্ৰহ’ৰূপে পৰিচিত বৃহস্পতি। পৃথিৱীৰ পৰা চাৰে আঠশ নিযুত মাইল দূৰত অৱস্থিত এই গ্ৰহটোৰ বয়স কিমান?
এই বিষয়ত দীর্ঘ গৱেষণাৰ অন্তত অৱশেষত এটা সময়ৰেখা বিচাৰি উলিয়াবলৈ সক্ষম হৈছে একাংশ বিজ্ঞানীয়ে। কোৱা হৈছে যে উল্কাৰ ধ্বংসাবশেষে বৃহস্পতিৰ জন্মদাগ ৰাখি গৈছে। কেৱল সেয়াই নহয়, আমাৰ পৃথিৱীৰ বুকুৰ শিলাখণ্ডয়ো তাৰ সাক্ষ্য বহন কৰে।
জাপানৰ নাগোয়া বিশ্ববিদ্যালয় আৰু ইটালীৰ মহাকাশ গৱেষণা কেন্দ্ৰৰ বিজ্ঞানীসকলে যৌথভাবে এই বিষয়ত গৱেষণা চলাইছিল। তেওঁলোকৰ গৱেষণাৰ কাম সম্প্রতি প্রকাশিত হৈছে এখন বিজ্ঞান পত্রিকাত।
তাতেই জনাইছে যে চাৰে সাত হেজাৰ কোটি বছৰৰো বহু পূর্বে যেতিয়া মাত্র সৌৰজগত তৈয়াৰ হৈছিল, বৃহস্পতিৰ আবিৰ্ভাৱৰ সময়ো তেতিয়াই। অৱশ্যে অন্যান্য গ্ৰহৰ তুলনাত গুৰুগ্ৰহৰ বিৱৰ্তন হৈছিল অনেক দ্রুতগতিত। গ্ৰহটোৰ ৰাসায়নিক পৰিৱৰ্তন, গঠন সকলোতেই উল্কাপাতৰ প্ৰভাৱ বেছি।
উল্কাবৃষ্টিৰ তথ্য-পৰিসংখ্যা বিশ্লষণ কৰি বিৰাট হিচাপ-নিকাচ কৰাৰ পাছতহে বৃহস্পতি সম্পর্কে খুঁটি-নাটি তথ্য পোৱা গৈছে।
পত্রিকাৰ প্ৰতিবেদনত কোৱা হৈছে যে ফল্কাপাতৰ ফলত ছিটিকি অহা ক্ষুদ্র খনিজ কণিকাৰ পৰা বুজা যায় বৃহস্পতিৰ জন্মকাল। মহাশূন্যত ক্রমশঃ গ্রহাণু, উল্কাবোৰৰ গতিবিধি, সংঘৰ্ষৰ ফলত উচ্চ তাপশক্তি বলয়ৰ পৰা ছিটিকি আহি কোনো কণিকা কিমান সোনকালে শীতল হৈছে, সেই সময়সীমা বাহিৰ কৰিব পাৰিলেই বুজা যাব কোন গ্ৰহৰ বয়স কিমান।
বিজ্ঞানীৰ দলটোৱে জানিব পাৰিছে যে বৃহস্পতিৰ ক্ষেত্ৰত গলিত কণিকাৰ পৰা শীতল হোৱা আৰু লাহে লাহে গোট মৰাৰ যি গতিপ্রকৃতি, সেয়াই জন্ম সময়।
প্রশ্ন হৈছে সেই সময়টো কেতিয়া? মুঠৰ ওপৰত সৌৰজগত সৃষ্টিৰ এহেজাৰ আঠশ কোটি বছৰৰ পাছত। উল্কাখণ্ডৰ অংশ হেনো অত্যন্ত দ্রুতগতিৰে শীতল হৈ পৰে। তাৰ পাছত গেছীয় পদার্থ জমা হৈ হৈ ইমান বিশাল আকাৰ হৈ পৰে সেই উল্কাখণ্ডৰ। সৌৰজগতৰ সবাতোকৈ ডাঙৰ গ্ৰহ হৈছে বৃহস্পতি।
গৱেষক দলৰ অন্যতম বিজ্ঞানী ড° ডিয়েগ’ তুৰিনিয়ে কয়, ‘একমাত্র উল্কাখণ্ডই এই ৰেকৰ্ড ধৰি ৰাখিব পাৰে। গ্ৰহ জন্মৰ সবাতোকৈ স্পষ্ট প্রমাণ সেইটোৱেই।’
অৱশ্যে বৃহস্পতিৰ জন্মৰহস্য উদ্ঘাটনৰ নেপথ্যত পৃথিৱীৰ অৱদানো কম নহয়। পৃথিৱীৰ মাটিত গলিত অৱস্থাৰ খনিজ পাথৰ বিশ্লেষণ কৰি এইবোৰ তথ্য লাভ কৰা বুলি জনাইছে বিজ্ঞানীসকলে।
