Pension plan:✒️আপুনি যদি বিবাহিত, তেন্তে আপোনাৰ বাবে এক দৰকাৰী আৰু লাভজনক চৰকাৰী আঁচনিৰ বিষয়ে আজি জনাবলৈ ওলাইছো।
এই আঁচনিখনৰ নাম হৈছে প্রধানমন্ত্রী শ্রম যোগী মান-ধন বা পিএম-এছৱাইএম। অৱসৰ পৰিকল্পনাৰ বাবে অসংগঠিত খণ্ডত কাম কৰা যিকোনো বিবাহিত ব্যক্তিয়ে এই আঁচনিত বিনিয়োগ কৰিব পাৰে।
এই আঁচনিত বিনিয়োগকাৰীৰ ধন সুৰক্ষিত থকাৰ লগতে ন্যায্য ৰিটার্ণও পাব পৰা যায়।
দেশৰ অসংগঠিত খণ্ডৰ কৰ্মীসকলক আর্থিক সুৰক্ষা প্ৰদানৰ উদ্দেশ্যে ২০১৯৩ নৰেন্দ্ৰ মোদী চৰকাৰে এই পেন্সন আঁচনিখন আৰম্ভ কৰিছিল। এই আঁচনিত বিবাহিত দম্পতীয়ে প্রতিমাহে মাত্র ২০০ টকাকৈ বিনিয়োগ কৰিলেই অৱসৰৰ সময়ত বছৰি ৭২ হেজাৰ টকা পর্যন্ত পেন্সন লাভ কৰিব পাৰে।
বিনিয়োগৰ বাবে যোগ্যতাৰ চৰ্তঃ
গৃহ পৰিচাৰক-পৰিচাৰিকা, পদপথৰ দোকানী, ইটা ভাটাৰ শ্রমিক, মুচি, ৰিক্সাচালক, ভূমিহীন শ্রমিক, হিচাপ কর্মী, নির্মাণ কর্মী, কৃষি শ্রমিক, বিড়ি কাৰখানাত কাম কৰা শ্রমিক, শিপিনী, চামৰাৰ শ্রমিক, দৃশ্য-শ্রাব্য শ্রমিক আদিকে ধৰি সেইসকল শ্রমিকে এই আঁচনিৰ সুবিধা পাব পাৰে যিসকলৰ মাহিলি আয় প্রতিমাহে ১৫,০০০ টকাতকৈ কম আৰু বয়স ১৮ৰ পৰা ৪০ বছৰৰ ভিতৰত। তদুপৰি কেৱল বিবাহিতসকলেহে এই আঁচনিখনত বিনিয়োগ কৰিব পাৰে। এই আঁচনিত বিনিয়োগৰ ক্ষেত্ৰত আন এক চর্ত এই যে নিউ পেন্সন আঁচনি বা এনপিএছ ইএছআইচি বা ইপিএফঅ’ আঁচনিত বিনিয়োগ কৰা ব্যক্তিয়ে এই আঁচনিসমূহত বিনিয়োগ কৰিব নোৱাৰিব।
কেনেকৈ পাব ৭২ হেজাৰ টকাৰ বাৰ্ষিক পেন্সন?
এই আঁচনিখনত এহাল দম্পতীয়ে প্রতিমাহে ২০০ টকাকৈ বিনিয়োগ কৰিব লাগে। অর্থাৎ এবছৰত মুঠ ১২০০ টকা দিব লাগে। ধৰি লওক দম্পতীৰ বয়স ৩০ বছৰ। গতিকে, তেওঁলোকে ৬০ বছৰ বয়সলৈকে প্রায় ৩৬,০০০ টকা সঞ্চয় কৰিব লাগিব। ৬০ বছৰ বয়সৰ পাছত দম্পতীৰ যেতিয়া অৱসৰৰ সময় হ’ব, তেতিয়া সুত সহ বার্ষিক পেন্সন হিচাপে লাভ কৰিব পাৰিব ৭২ হেজাৰ টকা।
প্রধানমন্ত্রী শ্রম যোগী মান-ধন আঁচনিৰ দুটা মূল বৈশিষ্ট্য ন্যূনতম নিশ্চিত পেন্সন:
পিএমএছৱাইএম আঁচনিৰ অধীনত প্রতিজন গ্রাহকে ৬০ বছৰ বয়সত ন্যূনতম ৩,০০০ টকাৰ পেন্সন লাভ কৰিব। পাৰিবাৰিক পেন্সন: পেন্সন লাভ কৰি থকা অৱস্থাত কোনো গ্রাহকৰ মৃত্যু হ’লে তেওঁৰ পত্নীয়ে মৃত গ্রাহকে পাবলগীয়া পেন্সনৰ ৫০ শতাংশ পৰিয়াল পেন্সন হিচাপে লাভ কৰিব। অর্থাৎ মাহে ৩০০০ টকা পেন্সন পালে পত্নীয়ে মৃত্যুৰ পাছত ১৫০০ টকা পাব। অৱশ্যে পৰিয়াল পেন্সনৰ সুবিধা কেবল পত্নীয়েহে পায়। পত্নীৰ মৃত্যু হ’লে স্বামীয়ে এই সুবিধা নাপায়।
এই আঁচনিখনত কেনেকৈ নামভর্তি কৰিব?
মবাইল নম্বৰ, বেংকৰ জমা একাউন্ট আৰু আধাৰ নম্বৰৰে এই আঁচনিখনত সহজে বিনিয়োগ কৰিব পাৰি। ইয়াৰ বাবে এজন ব্যক্তিয়ে ওচৰৰ সাধাৰণ সেবা কেন্দ্রলৈ যাব লাগিব। আধাৰ নম্বৰ আৰু বেংকৰ জমা একাউন্ট বা জন-ধন একাউন্ট নম্বৰ ব্যৱহাৰ কৰি প্রধানমন্ত্রী শ্রম যোগী মান-ধন আঁচনিত নামভর্তি কৰিব পাৰিব।