জনতাৰ হৃদয়ৰ নিভৃত কোণত অৱস্থান কৰা শিল্পী জুবিন গাৰ্গৰ মৃত্যুৱে বিভিন্নজনৰ মুখা খুলি দিলে। পৰ্দাৰ আঁৰ কাপোৰ আঁতৰাই দিয়াৰ দৰে বহুতৰে তথাকথিত সম্ভ্রান্ত মুখৰ আঁৰৰ ক’লা চৰিত্ৰ প্রকট হ’ল। ছিংগাপুৰত জুবিনৰ ৰহস্যজনক মৃত্যুৰ পাছত পোহৰলৈ অহা এনে এজন ভণ্ড চৰিত্ৰৰ, নর্থ-ইষ্ট ফেস্টিভেল আয়োজনৰ নামত সংস্কৃতিৰ দালালি কৰা, বিভিন্নজনক অন্যৰূপে ব্যৱহাৰ কৰি নিজৰ সামাজিক-অর্থনৈতিক স্থিতি সৱল কৰা শ্যামকানু মহন্তৰ অন্যতম পৃষ্ঠপোষক আছিল চৰকাৰো।
অথচ শ্যামকানুৰ দ্বাৰা আয়োজিত যিকোনো অনুষ্ঠানৰ বিৰুদ্ধে ৰাজ্য চৰকাৰে এতিয়া নিষেধাজ্ঞা জাৰি কৰিবলৈ ৰাজি হৈছে। ৰাজ্যত এইদৰে কোনো অনুষ্ঠান-প্রতিষ্ঠানৰ বিৰুদ্ধে নিষেধাজ্ঞা জাৰি কৰাৰ ঘটনা বহু কম। শ্যামকানু জড়িত থকা অনুষ্ঠান আয়োজনত অসম চৰকাৰে জনৰোষৰ সম্মুখীন হৈ নিষিদ্ধ কৰিবলগীয়া হোৱাটোৱে সুচায় যে শ্যামকানুৰ ব্যৱসায় বা এই অনুষ্ঠান আয়োজন ক’লা-বগা নাছিল। ইয়াৰ পাছতো কোনো ধৰণৰ পৰীক্ষা-নিৰীক্ষা নকৰাকৈ কিয় শ্যামকানুৱে বৃহৎ পৰিমাণৰ অনুদান লাভ কৰিছিল দৰাচলতে গভীৰ ৰহস্যৰ বিষয়।
এক তথ্য অনুসবি, শ্যামকানু মহন্তৰ ট্রেন্ড এমএমএছ-এ বিভিন্ন সময়ত চৰকাৰৰ পৰা বিভিন্ন অনুদান লাভকৰিছিল। এনে কিছু তথ্য দাঙি ধৰা হ’ল- ২০১৪-১৫ বর্ষত যুব কল্যাণ মন্ত্রণালয়ৰ পৰা দিল্লীত নর্থ-ইষ্ট ফেস্টিভেলৰ বাবে শ্যামকানুরে লাভ কৰিছিল ন লাখ আৰু একেটা বৰ্ষত ড’নাৰ মন্ত্রণালয়ৰ পৰা ছয় লক্ষাধিক অনুদান লাভ কৰিছিল। ইপিনে, ২০১৫ত সাংস্কৃতিক মন্ত্রণালয়ৰ পৰা পাঁচ লাখ, ২০১৫-২০১৬ত বঙালী আয়োজনৰ বাবে যুব কল্যাণ মন্ত্রণালয়ৰ পৰা ১০ লাখ টকা, একেটা বর্ষতে যুব কল্যাণ মন্ত্রণালয়ৰ পৰা ফেস্টিভেলৰ ফুটবল প্রতিযোগিতাৰ বাবে পাঁচ লাখ, তথ্য প্রযুক্তি মন্ত্রণালয়ৰ পৰা আলোচনাচক্ৰৰ বাবে ২০১৬ত দুই লাখ টকা, ২০১৮৩ দিল্লীত নর্থ-ইষ্ট ফেস্টিভেলৰ বাবে অ’এনজিচিৰ পৰা ১২ লাখ, ড’নাৰৰ পৰা ১০ লাখ, ২০১৯ত বেংককত নর্থ-ইষ্ট ফেস্টিভেলৰ আয়োজন কৰিবলৈ ড’নাৰ মন্ত্রণালয়ৰ পৰা ৭৯ লাখ, ট্রেন্ড এনএমএছৰ নামত পর্যটন মন্ত্রণালয়ৰ পৰা একেটা বর্ষতে ৩০ লাখ টকা, ২০২০-২১ত ড’নাৰ মন্ত্রণালয়, এনআৰএলৰ পৰা তেওঁৰ অনুষ্ঠানৰ নামত ক্রমে ২৫ লাখ আৰু তিনি লাখ টকা অনুদান হিচাপে লাভ কৰে।
এইদৰে বিভিন্ন সময়ত চৰকাৰী অনুদান লাভ কৰি চৰকাৰৰ আশিস ধন্য হৈছে শ্যামকানু। ২০২৪ত পর্যটন মন্ত্রণালয়ে ট্রেন্ড এনএমএছৰ নামত ২০২২ত ২৫ লাখ, পাঁচ লাখ টকা, সাংস্কৃতিক মন্ত্রণালয়ে ২০২৪ত নর্থ-ইষ্ট ফেষ্টিভেলৰ বাবে ২০ লাখ, ২০২২৩ ২৩ লাখ টকা অনুদান লাভ কৰে।
ভাৰত চৰকাৰৰ বিভিন্ন মন্ত্রণালয়ৰ পৰা কাৰ পৃষ্ঠপোষকতাত শ্যামকানুরে অনুদান লাভ কৰিছিল। কাৰ জহত শ্যামকানুরে এইদবে বৃহৎ ধনৰাশি লাভ কৰিছে সেয়াই প্রশ্ন। চর্চা অনুসৰি, বিজেপি চৰকাৰৰ সকলো সা-সুবিধা লাভ কৰিছিল তেওঁৰ জ্যেষ্ঠ ভ্রাতৃ ননীগোপাল মহন্তয়ো। সামাজিক মাধ্যমত বিভিন্নজনে এই প্রশ্ন উত্থাপন কৰিছে যে কিহৰ বাবে এটা পৰিয়ালৰ বাবে বিশেষ দৰদ চৰকাৰৰ।
যুৱ প্ৰজন্মৰ জনপ্রিয় কবি প্ৰণৱ কুমাৰ বৰ্মনে ২০০৩ত গুৱাহাটী বিশ্ববিদ্যালয়ৰ এটা ঘটনাৰ বিষয়ে সামাজিক মাধ্যমত বিবৰি কয় যে জুবিন গাৰ্গৰ বিৰুদ্ধে ষড়যন্ত্র বহু পুৰণি। এই ক্ষেত্ৰত তেওঁ নাম উল্লেখ নকৰাকৈ কোনো এজন সাংবাদিকৰ কথা উল্লেখ কৰিছে।
তেওঁ কয় যে সম্পূর্ণ মিথ্যাচাৰেৰে জুবিন গার্গে কোৱা এটা বাক্যৰ অপভ্রংশ কৰি তেওঁৰ বিৰুদ্ধে অপপ্ৰচাৰ কৰা হৈছিল। সেই সময়ত আজিৰ দৰে ম’বাইল ভিডিঅ’ আদিৰ উপস্থিতি নাছিল, গতিকে জুবিনে স্থিতি স্পষ্ট কৰিবলৈ সুযোগেই নাপালে। এক অনাহুত অপ্রীতিকৰ পৰিস্থিতিৰ বাবে হতাশ আৰু বিধ্বস্ত হৈ পৰা বুলিও কবি প্রণৱে লিখিছে।এই ঘটনাৰ বাবে জুবিনে বহু নিশা শুব পৰা নাছিল। প্রণরে লিখিছে, ‘জুবিন গাৰ্গৰ জনপ্রিয়তাত ঈর্ষান্বিত হৈ এচামে সেই তাহানিৰ পৰাই ষড়যন্ত্র ৰচি আহিছিল। সেই ষড়যন্ত্রই ২০২৫ ত সাকাৰ ৰূপ পালে।’
ইপিনে, জুবিন গাৰ্গৰ অনাকংক্ষিত মৃত্যুৰ ঘটনাৰ অন্যতম অভিযুক্ত তথা জুবিনৰ মেনেজাৰ সিদ্ধার্থই এখন মুকলি পত্ৰ প্ৰেৰণ কৰি নিজকে ধোৱা তুলসীৰ পাত সজাবলৈ চেষ্টা কৰিছে। বিভিন্ন স্পষ্টীকৰণ দিবলৈ চেষ্টা কৰা সিদ্ধার্থই এই কথাও লিখিছে যে তেওঁক জুবিন গার্গে প্রায়েই কৈছিল কিদৰে মানুহে তেওঁক ব্যৱহাৰ কৰিছিল, তেওঁৰ গানে কোটি কোটি টকা উপাৰ্জন কৰাৰ পাছতো তেওঁ অসমৰ মিউজিক লেভেলৰ পৰা ৰ’য়েলিটি পোৱা নাছিল।
সিদ্ধার্থ শৰ্মাৰ বিৰুদ্ধে ইতিমধ্যে গোচৰ ৰুজু হোৱাৰ পাছত তেওঁ বিচাৰ প্ৰক্ৰিয়াৰ সন্মুখীন হোৱাৰ সলনি এইদৰে নিজৰ স্পষ্টীকৰণৰ ঢাক-ঢোল বজাবলৈ সুবিধা পাইছে এয়া গভীৰ ৰহস্যৰ বিষয়।
ইতিমধ্যে সিদ্ধার্থৰ চিঠিখন ইমান শুদ্ধ অসমীয়াত লিখি দিলে বুলি সন্দেহৰ চৰ্চা আৰম্ভ হৈছে। বিভিন্নজনৰ লগতে এগৰাকী অভিনেত্রী অমৃতা গগৈয়ে কয় যে সিদ্ধার্থ শর্মাই শুদ্ধ অসমীয়া ক’বই নোৱাৰে, লিখাটো দূৰৰে কথা। যিজন মানুহে ক’বই নোৱাৰে তেওঁ ইমান ধুনীয়া অসমীয়া ইমান দীঘলীয়াকৈ লিখিব পাৰে নে বুলি প্রশ্ন কৰে অভিনেত্ৰীগৰাকীয়ে।
তেওঁ দাবী কৰিছে যে পত্ৰখনৰ আধা শব্দই হয়তো বুজিয়েই পোৱা নাই। এই পত্রখন এজন অসমীয়া মানুহে যে সহায় কৰিছে সেয়া ধুকপ বুলি তেওঁ কয়। কেবল তেরেই নহয়, এই বিষয়টোক লৈ সামাজিক মাধ্যমত সন্দেহৰ জোৱাৰ উঠিছে যে জুবিনৰ মৃত্যুক লৈ অসম স্তব্ধ হৈ পৰাৰ সময়ত কোন অসমীয়াই সিদ্ধার্থক সহায় কৰিছে।