RSS Chief Assam Visit:
ৰাষ্ট্ৰীয় স্বয়ংসেৱক সংঘৰ সৰসংঘচালক ডাঃ মোহন ভাগৱত দুদিনীয়া কাৰ্যসূচীৰে কাইলৈ গুৱাহাটীত উপস্থিত হ’ব। আজি আবেলি গুৱাহাটী বৰঝাৰৰ লোকপ্রিয় গোপীনাথ বৰদলৈ আন্তঃৰাষ্ট্ৰীয় বিমানকোঠৰ পৰাই পোনে পোনে ৰাষ্ট্ৰীয় স্বয়ংসেৱক সংঘৰ সৰসংঘ চালকগৰাকী গুৱাহাটীৰ বৰবৰীৰ সুদর্শনালয়ত উপস্থিত হ’ব বুলি ৰাষ্ট্ৰীয় স্বয়ংসেৱক সংঘৰ উত্তৰ অসম প্ৰান্তৰ প্ৰচাৰ প্ৰমুখ কিশোৰ শিৱমে এক বিবৃতিযোগে জানিবলৈ দিছে।
উল্লেখ্য যে ৰাষ্ট্ৰীয় স্বয়ংসেৱক সংঘৰ শতবর্ষ পূর্ণ উপলক্ষে আৰএছএছৰ মুৰব্বী ডাঃ মোহন ভাগৱতে ১৮ আৰু ১৯ নবেম্বৰত সম্পূর্ণ দুটাকৈ দিনত সুদর্শনালয়ত থাকি বৌদ্ধিক, মত-বিনিময় কার্যসূচীত অংশগ্রহণ কৰিব। এই মর্মে, ১৮ নৱেম্বৰৰ আবেলি চাৰি বজাত সমাজ জীৱনলৈ অৱদান আগবঢ়োৱা গুৱাহাটী মহানগৰৰ কিছু সংখ্যক নির্বাচিত লোকক সামৰি প্ৰবুদ্ধ নাগৰিক সম্মিলন অনুষ্ঠিত হ’ব।
উক্ত প্রবুদ্ধ নাগৰিক সন্মিলনত বিশিষ্ট সাহিত্যিক, কাকত-আলোচনীৰ সম্পাদক, উদ্যোগপতিকে ধৰি দুই শতাধিক লোক উপস্থিত থাকিব। প্রবুদ্ধ নাগৰিক সন্মিলনত ডাঃ মোহন ভাগৱতে বৌদ্ধিক প্রদান কৰাৰ লগতে মত বিনময় কৰিব। অনুৰূপ ধৰণে ১৯ নৱেম্বৰৰ পুৱা ১০ বজাত যুৱ সম্মিলন অনুষ্ঠিত হ’ব। উক্ত যুৱ সন্মিলনত কিছুসংখ্যক নির্বাচিত কবি-সাহিত্যিক, সাংবাদিক, উদ্যোগপতি আদিৰ সন্মুখত আন এক বৌদ্ধিক প্রদান কৰিব। ডাঃ মোহন ভাগৱতে গুৱাহাটীত দুদিন উপস্থিত থাকি ২০ নৱেম্বৰৰ দিনা মণিপুৰ অভিমুখে ৰাওনা হ’ব বুলি ৰাষ্ট্ৰীয় স্বয়ংসেৱক সংঘৰ উত্তৰ অসম প্ৰান্তৰ প্ৰচাৰ প্ৰমুখ কিশোৰ শিৱমে এক প্ৰেছ বিবৃতিযোগে জানিবলৈ দিছে।
