PM Assam Visit :
আজি পুনৰ দুদিনীয়া কাৰ্যসূচীৰে সন্ধিয়া ভাৰতীয় বায়ু সেনাৰ বিশেষ বিমানেৰে গুৱাহাটীত উপস্থিত হ’ব প্রধানমন্ত্রী নৰেন্দ্র মোদী। সন্ধিয়া ৫.২০ বজাত প্রধানমন্ত্রী লোকপ্রিয় গোপীনাথ বৰদলৈ আন্তঃৰাষ্ট্ৰীয় বিমানকোঠত উপস্থিত হোৱাৰ লগে লগে তেওঁক উস্ম আদৰণি জনাব ৰাজ্যপাল লক্ষ্মণ প্ৰসাদ আৰ্চায,মুখ্যমন্ত্ৰী ড:হিমন্ত বিশ্ব শৰ্মা আৰু মেয়ৰ মৃগেন শৰণীয়াই ।
আনহাতে মুখ্যমন্ত্ৰীয়ে সদৰী কৰা অনুসৰি, ৫.৪৫ বজাত প্রধানমন্ত্রী উপস্থিত হ’ব সৰুসজাই অর্জুন ভোগেশ্বৰ বৰুৱা ক্রীড়া প্রকল্পত। তাত প্রায় ১০ হেজাৰ শিল্পীয়ে বাগুৰুম্বা নৃত্য প্রধানমন্ত্রীৰ উপস্থিতিত প্রদর্শন কৰিব। নিশাটো খানাপাৰাস্থিত কইনাধৰাৰ ৰাজ্যিক অতিথিশালাত প্রধানমন্ত্রীয়ে কটাব। ১৮ জানুৱাৰীৰ পুৱা প্ৰধানমন্ত্ৰী খানাপাৰাৰ পৰা হেলিকপ্টাৰৰে কলিয়াবৰলৈ যাত্ৰা কৰিব। কলিয়াবৰৰ মৌচন্দা খেলপথাৰত প্রধানমন্ত্রীয়ে এখন বৃহৎ ৰাজহুৱা সভাত অংশগ্ৰহণ কৰিব। এই সভাতে প্রধানমন্ত্রীয়ে কাজিৰঙা ৰাষ্ট্ৰীয় উদ্যানৰ মাজেৰে পাৰ হৈ যোৱা ৰাষ্ট্ৰীয় পথৰ ওপৰৰে নিৰ্মাণ হ’বলগীয়া উৰণ সেতুৰ আধাৰশিলা স্থাপন কৰিব। দুপৰীয়া ১২.৩০ বজাত প্ৰধানমন্ত্ৰী কলিয়াবৰৰ পৰা বৰবাৰ বিমানকোঠত উপস্থিত হ’ব আৰু পোনে পোনে দিল্লীলৈ উৰা মাৰিব।
উল্লেখ্য যে প্ৰধানমন্ত্ৰীক আদৰণি জনাবলৈ অসম চৰকাৰ আৰু ৰাজ্যিক বিজেপিয়ে ব্যাপক আয়োজন কৰিছে। বিমানকোঠত প্রধানমন্ত্রীক দলৰ কৰ্মকৰ্তাই আদৰণি জনোৱাৰ উপৰি সমদলৰে সৰুসজাইলৈ আদৰি আনিব। প্রধানমন্ত্রীৰ সন্মানার্থে বিমানকোঠ চৌহদত অসমৰ থলুৱা সাংস্কৃতিক কাৰ্যসূচীও প্ৰদৰ্শন কৰা হ’ব। ইতিমধ্যে আজি পুৱাৰে পৰা বিমান বন্দৰ প্ৰৱেশদ্বাৰৰ আশেপাশে বিভিন্ন সাংস্কৃতিক দল সমূহ উপস্থিত হৈছে এক উৎসৱ মুখৰ পৰিবেশৰ সৃষ্টি হয় ৷
উল্লেখ্যযোগ্য বিহু আৰু ঝুমুৰৰ পাছত কপ্ৰধানমন্ত্ৰী নৰেন্দ্ৰ মোদীৰ উপস্থিতিত সৰুসজাইৰ অৰ্জুন ভোগেশ্বৰ বৰুৱা ক্রীড়া প্ৰকল্পৰ বাকৰিত ১০ হেজাৰ যুৱক-যুৱতীয়ে বাগুৰুম্বা নৃত্য প্ৰদৰ্শন কৰিব। এই বৃহৎ সাংস্কৃতিক কার্যসূচীত অংশগ্রহণ কৰা প্ৰতিগৰাকী নৃত্য শিল্পীক ৰাজ্য চৰকাৰৰ তৰফৰ পৰা ২৫ হেজাৰকৈ টকা প্ৰদান কৰা হ’ব বুলি মুখ্যমন্ত্রী ড: শৰ্মাই ঘোষণা কৰে। শনিবাৰে বিয়লি ৫.৪৫ বজাত সৰুসজাই ষ্টেডিয়ামত প্রধানমন্ত্রী মোদী উপস্থিত হ’ব। প্রধানমন্ত্রীৰ সন্মুখত বাগুৰুম্বাৰ প্ৰদৰ্শনৰ লক্ষ্যৰে সৰুসজাই স্টেডিয়ামত যোৱা তিনি দিন ধৰি আখৰা অব্যাহত ৰাখিছে নৃত্য শিল্পী তথা কলা-কৌশলীসকলে। শুকুৰবৰাৰে সন্ধিয়া তেওঁলোকৰ চূড়ান্ত আখৰা পৰিদৰ্শন কৰে মুখ্যমন্ত্রী ড° শৰ্মাই। আখৰা প্ৰত্যক্ষ কৰি নৃত্য শিল্পীসকলক সম্বোধন কৰি মুখ্যমন্ত্রী ড° শৰ্মাই কয় যে বড়ো জাতিৰ চহকী কৃষ্টি-সংস্কৃতিৰ পৰিচয় বাগুৰুম্বাক বিশ্ব দৰবাৰলৈ লৈ যোৱাৰ বাবেই এয়া চৰকাৰৰ এক প্ৰয়াস তথা প্রচেষ্ট। লগতে তেওঁ কয় যে এই কাৰ্যসূচীত মুঠ ৯,৬৬৭ গৰাকী যুৱক-যুৱতী তথা নৃত্য শিল্পীয়ে অংশগ্ৰহণ কৰিব। ইয়াৰ ভিতৰত নেপালৰ পৰা ২৯ গৰাকী, নগালেণ্ডৰ পৰা ২৫ গৰাকী, পশ্চিমবংগৰ পৰা ৫১ গৰাকী নৃত্যশিল্পী আহিছে। লগতে এই বৃহৎ দলটোৰ লগত থাকিব ২৫ গৰাকী প্রশিক্ষক (এক্সপার্ট সমিতি) আৰু ১২গৰাকী কৰিঅ’গ্ৰাফাৰ। এই কাৰ্যসূচীত অংশগ্রহণ কৰা প্ৰতিগৰাকী শিল্পী তথা যুৱক-যুৱতীক অনুষ্ঠানত অংশগ্ৰহণ কৰাৰ এখন প্ৰমাণপত্ৰ আৰু দক্ষতাৰ এখন প্ৰমাণপত্ৰ প্ৰদান কৰা হ’ব। এই দুখন প্রমাণপত্রসহ অংশগ্ৰহণকাৰী নৃত্য শিল্পীসকলক পৰৱৰ্তী সময়ত জিলা পর্যায়ত সম্বর্ধনা জনোৱা হ’ব বুলি মুখ্যমন্ত্রীয়ে কয়। মুখ্যমন্ত্রীয়ে কয় যে অংশগ্ৰহণকাৰী প্ৰতিগৰাকী নৃত্যশিল্পীক ৰাজ্য চৰকাৰৰ তৰফৰ পৰা ২৫ হেজাৰ টকাকৈ প্ৰদান কৰা হ’ব।
একেদৰে প্ৰশিক্ষক, বিশেষজ্ঞ আৰু কৰিঅ’গ্ৰাফৰসকলক ৫০ হেজাৰকৈ টকা প্ৰদান কৰা হ’ব। অহাবাৰ দিল্লীত বাগুৰুম্বা নৃত্য প্রদর্শন কৰা হ’ব বুলি মুখ্যমন্ত্রী মন্তব্য কৰি লগতে কয়, ‘শনিবাৰে প্রধানমন্ত্রী ষ্টেডিয়ামত উপস্থিত হোৱাৰ পাছতে এখন চমু সভা অনুষ্ঠিত হ’ব। সাংস্কৃতিক মন্ত্রী, বিটিচিৰ মুখ্য কাৰ্যবাহী সদস্য হাগ্রামা মহিলাৰী, মুখ্যমন্ত্ৰীয়ে ভাষণ প্ৰদান কৰাৰ পাছতে প্রধানমন্ত্রীয়ে ৰাইজক সম্বোধন কৰিব। ইয়াৰ পাছতে বড়ো জাতিৰ কৃষ্টি-সংস্কৃতি তথা ঐতিহ্য আমি বিশ্ববাসীৰ সন্মুখত প্রদর্শন কৰিম। ইয়াৰ পাছতে লেজাৰ শ্ব’ হ’ব আৰু শেষত ফটকা প্রদর্শনীৰে অনুষ্ঠানৰ সামৰণি পৰিব।’ লগতে মুখ্যমন্ত্রীয়ে কয় যে এই অনুষ্ঠান চাবলৈ বহু লোকে প্রবেশ পত্ৰ বিচাৰিছে। বহন ক্ষমতা অনুসৰি ৩৫ হেজাৰ লোকক প্রবেশপত্র দিয়া হৈছে। প্রধানমন্ত্রী আগমনৰ সময়ছোৱাত জালুকবাৰীৰ পৰা বেলতলালৈ ৰাষ্ট্ৰীয় ঘাইপথত কোনোধৰণৰ ৰোড শ্ব’ নাথাকে বুলি তেওঁ কয়।
