Delhi Bomb blast:
দুবছৰ ধৰি দিল্লীত আক্ৰমণৰ পৰিকল্পনা কৰিছিল সন্ত্ৰাসবাদীয়ে। বোমা নিৰ্মাণৰ বাবে ব্যয় হৈছিল লক্ষাধিক টকা । আত্মঘাতী সন্ত্ৰাসবাদী ওমৰ মহম্মদৰ সহযোগী আৰু এজন ‘জেহাদী চিকিৎসক’ মুজাম্মিল শাকিলৰ জেৰাৰ পাছতে পোহৰলৈ আহিছে এই তথ্য।
ৰাষ্ট্ৰীয় অনুসন্ধান সংস্থা (এন আই এ)ৰ সূত্ৰ অনুসৰি, দিল্লীত এই আক্ৰমণ দুবছৰৰ বাবে পৰিকল্পিত আছিল বুলি শাকিলে স্বীকাৰ কৰিছে । এই সময়ছোৱাত বোমা নিৰ্মাণৰ বাবে প্ৰয়োজনীয় বিস্ফোৰক, ৰিম’ট আৰু অন্যান্য সামগ্ৰী সংগ্ৰহ কৰা হৈছিল।
সমগ্ৰ অভিযানৰ দায়িত্বত আছিল শাকিল। সূত্ৰ অনুসৰি শাকিলে হাৰিয়ানাৰ নুহ আৰু গুৰুগ্ৰামৰ পৰা তিনি লাখ টকাত ১৬ কুইণ্টল এন পি কে সাৰ ক্ৰয় কৰা হৈছিল। নুহৰ পৰা ক্ৰয় কৰা হৈছিল আন বিস্ফোৰক ।
ফৰিদাবাদৰ এখন বজাৰৰ পৰা ক্ৰয় কৰা হৈছিল বৈদ্যুতিক উপাদান। শাকিলে এমোনিয়াম নাইট্ৰেটকে ধৰি বোমা তৈয়াৰ কৰা ৰাসায়নিক সামগ্ৰী মজুত ৰাখিবলৈও এটা ফ্ৰীজ ক্ৰয় কৰিছিল। তদন্তৰ এক সূত্ৰৰ মতে, জেৰাৰ সময়ত শাকিলে জনাইছে,ৰাসায়নিক পদাৰ্থ আৰু সাৰ প্ৰক্ৰিয়াকৰণৰ দায়িত্বত আছিল ওমৰ।
উল্লেখ্য যে ,দিল্লী বিস্ফোৰণৰ তদন্তৰ সন্দৰ্ভত দেশৰ একাধিক স্থানত ৰাষ্ট্ৰীয় অনুসন্ধান সংস্থাই তালাচী আৰু গ্ৰেপ্তাৰ আৰম্ভ কৰিছে।
তদন্তৰ ফলত শ্ৰীনগৰকে ধৰি দেশৰ বিভিন্ন প্ৰান্তৰ কেবাগৰাকী চিকিৎসকক গ্ৰেপ্তাৰ কৰা হৈছে, বেছিভাগেই কাশ্মীৰৰ। কেৱল সেয়াই নহয়, বিস্ফোৰণৰ দুই ষড়যন্ত্রী-সহ চাৰিজন লোককো গ্ৰেপ্তাৰ কৰিছে এন আই এয়ে।
