Two Accused Arrested for Abusing Arunachali Women:
কেতিয়াবা যদি মাৰধৰ, কেতিয়াবা আকৌ তীর্যক তথা অপমানজনক বাক্যবাণ প্রয়োগ! কেন্দ্রীয় চৰকাৰে ‘এক ভাৰত শ্রেষ্ঠ ভাৰত’ গঢ়াৰ ধ্বনি আওৰাই থকাৰ মাজতে দেশৰ বিভিন্ন অঞ্চলত উত্তৰ-পূবৰ লোক ঘৃণা-বৈষম্যৰ পাত্ৰ হৈ আছে। নিজকে একপ্ৰকাৰ ‘উন্নত প্রজাতি’ৰ দৰে আচৰণ কৰা দিল্লীৰ দুই পুৰুষ-মহিলাই অলপতে সামান্য কথাতে এজন আৰক্ষী বিষয়াৰ উপস্থিতিতে অৰণাচল প্ৰদেশৰ তিনিগৰাকী যুৱতীক জাত-পাতত ধৰি অপমান কৰাক লৈ চৌদিশে প্রবল প্রতিক্রিয়া অব্যাহত আছে।
ঘটনাটোক লৈ অৰুণাচল প্ৰদেশৰ মুখ্যমন্ত্রী পেমা খাণ্ডু,ছিকিমৰ মুখ্যমন্ত্ৰী প্ৰেমা সিং টামাং,মেঘালয়ৰ মুখ্যমন্ত্ৰী কনৰাড চাংমা,কেন্দ্ৰীয় মন্ত্ৰী ক্ষিৰেন ৰিজিজু,উত্তৰ-পূৰ্বাঞ্চলৰ উন্নয়ন (ড’নাৰ) ৰ মন্ত্ৰী জ্যোতিৰাদিত্য এম সিন্ধিয়াৰ পৰা আৰম্ভ কৰি অসমৰ গৌৰৱ গগৈলৈকে অঞ্চলটোৰ বহু জনপ্রতিনিধি সৰৱ হৈ উঠিছে।
অসম প্রদেশ কংগ্ৰেছৰ সভাপতি গৌৰৱে কয় যে এই ঘটনাক এক গতানুগতিক বিবাদ বুলি আওকাণ কৰিব নোৱাৰি। একেদৰে দুই অভিযুক্তক কঠোৰ শাস্তি বিহাৰ দাবী উত্থাপন কৰি মুখ্যমন্ত্রী খাণ্ডুৱে কয়, ‘এনে আচৰণ সম্পূৰ্ণৰূপে অগ্রহণযোগ্য আৰু ইয়াৰ স্থান আমাৰ সমাজত নাই।’ এনেদৰে উত্তৰ-পূবৰ জনপ্রতিনিধিসকল সৰৱ হৈ উঠাত ঘটনাটোক লৈ কঠোৰ স্থিতি গ্ৰহণ কৰা বুলি প্ৰকাশ কৰিছে উত্তৰ-পূৰ্বাঞ্চলৰ উন্নয়ন (ড’নাৰ) ৰ মন্ত্ৰী জ্যোতিৰাদিত্য এম সিন্ধিয়াই।
এই ঘটনাই গভীৰভাৱে ব্যথিত কৰা বুলি উল্লেখ কৰি সামাজিক মাধ্যমত মন্ত্রীজনে কয়, ‘এক সৰু আৱাসিক ঘটনাই ভ্রান্ত ধাৰণাত প্রোথিত আতিশয্য আৰু ভাবুকিৰ ৰূপ লোৱা এই ঘটনা গভীৰভাৱে লজ্জাজনক। আমাৰ উত্তৰ-পূবৰ ভাই-ভনীসকলৰ প্রতি যিকোনো অন্যায় সহ্য কৰা নহ’ব। তেওঁলোকৰ নিৰাপত্তা আৰু মৰ্যাদা আমাৰ বাবে গুৰুত্বপূৰ্ণ।’ মন্ত্ৰীজনৰ এই মন্তব্যয়ো উত্তৰ-পূবৰ বাহিৰত দিল্লীকে ধৰি দেশৰ আন ঠাইত অঞ্চলটোৰ লোকৰ প্ৰতি ভ্রান্ত ধাৰণা বৰ্তমানেও বর্তি থকাটো প্ৰমাণ কৰিছে। অথচ উত্তৰ-পূবত দেশৰ আন আন অঞ্চলৰ লোক এনে পৰিস্থিতিৰ সন্মুখীন হোৱাৰ উদাহৰণ নাই।
উল্লেখ্য যে অৰুণাচল প্ৰদেশৰ এই তিনি যুৱতী এনে আচৰণৰ ভুক্তভোগী হ’বলগীয়া কাৰণ তেনেই সাধাৰণ আছিল। বিভিন্ন সূত্রে দিল্লীত বাস কৰা এই তিনি যুৱতীয়ে যোৱা ২০ ফেব্ৰুৱাৰীত এজন ইলেক্ট্রিচিয়ানৰ দ্বাৰা তেওঁলোকৰ ফ্লেটত এটা এয়াৰ কণ্ডিচনাৰ স্থাপন কৰায়। যুৱতী তিনিগৰাকীৰ দিহা মতে ইলেক্ট্রিচিয়ানজনে তেওঁলোকৰ এপার্টমেণ্টৰ চতুৰ্থ মহলাৰ ফ্লেটত এয়াৰ কণ্ডিচনাৰটো স্থাপন কৰোতে পকী দেৱালত ফুটা কৰাত কিছু পৰিমাণৰ বালি-চিমেণ্টৰ মিশ্রণ তলৰ মজিয়াত পৰে। ইয়াকে লৈ জাঙুৰ খাই উঠে তলৰ মহলাৰ ফ্লেটত বাস কৰা হৰ্ষ সিং আৰু ৰুবী জৈন নামৰ দুই প্রতিবেশী।
ঘটনাটোত যুৱতী তিনিগৰাকীৰ কোনো ভুল নথকা সত্ত্বেও তেওঁলোকক দুই পুৰুষ-মহিলাই উপর্যুপৰি গালিবৰ্ষণ কৰিবলৈ ধৰে। তাকে কৰোতে তেওঁলোকে যুৱতী তিনিগৰাকীৰ জাত-পাতত ধৰি আপত্তিজনক মন্তব্য কৰে। উত্তৰ-পূবৰ লোকৰ প্ৰতি থকা ভ্রান্ত ধাৰণা উদঙাই দুই পুৰুষ-মহিলাই কৰা এনে আচৰণত বিমূঢ় হৈ পৰে যুৱতী তিনিগৰাকী।
উল্লেখ্য যে এই তিনি যুৱতীৰ এগৰাকীয়ে কেন্দ্ৰীয় লোকসেৱা আয়োগ (ইউপিএছচি)ৰ পৰীক্ষাৰ প্ৰস্তুতি চলাই আছে। বিগত দুবছৰৰো অধিক দিন তেওঁ ৰাজধানী মহানগৰ অঞ্চলত বাস কৰি আছে। উক্ত দিনা এনে অভাৱনীয় তথা অপমানজনক পৰিস্থিতিৰ সন্মুখীন হোৱাৰ পাছতে ভুক্তভোগী তিনিগৰাকী আৰক্ষীৰ দ্বাৰস্থ হয়। তিনি ভুক্তভোগীৰ অভিযোগৰ ভিত্তিত দিল্লীৰ মালব্য নগৰ আৰক্ষী থানাত ভাৰতীয় ন্যায় সংহিতাৰ ৭৯ (মহিলাৰ ভদ্রতা নাশৰ উদ্দেশ্যে শব্দৰে তাচ্ছিল্য কৰা), ৩৫১ (২) (অপৰাধী ভাবুকি) আৰু ১৯৬ (ধর্ম, বর্ণ, জন্মৰ স্থান, বাসস্থান, ভাষা আদিত লৈ শত্রুতা বৃদ্ধি) ধাৰাত গোচৰ ৰুজু হৈছে। ঘটনা সন্দৰ্ভত ইউপিএছচি পৰীক্ষাৰ প্ৰস্তুতি চলাই থকা যুৱতীগৰাকীয়ে কয়, ‘ঘটনাটো তেনেই সৰু আছিল; কিন্তু ইয়ে ফিৰিঙতিৰ পৰা খাণ্ডৱ দাহৰ ৰূপ ল’লে।
আমাৰ বিৰুদ্ধে যি অপমানজনক ভাষা ব্যৱহাৰ কৰিলে, তাৰ বিৰুদ্ধে আমি আৰক্ষীক এজাহাৰ দাখিল কৰিছো।’ অৱশ্যে আৰক্ষীয়ে ব্যৱস্থা গ্রহণ কৰাৰ পূৰ্বেই অভিযুক্ত দুই পুৰুষ-মহিলাই আত্মগোপন কৰে। ঘটনাটোৰ ভুক্তভোগীগৰাকীয়ে লগতে কয়, ‘আমাৰ চেহেৰা সুকীয়া হোৱাৰ বাবে আৰু হিন্দী তেওঁলোকৰ দৰে ক’ব নোৱাৰাৰ বাবে তেওঁলোকে আমাক এই দেশৰ নাগৰিক নহয় বুলি ভবা যেন লাগে। তেওঁলোকে ভাবে যে আমি চীন অথবা আন কোনো দেশৰ। গতিকে তেওঁলোকে ভাবে যে আমাৰ ক্ষেত্ৰত যিকোনো কাম কৰিব পাৰে আৰু আৰক্ষীয়ে তেওঁলোকক সুৰক্ষা দিব। মই অৰুণাচলৰ আৰু মই এগৰাকী ভাৰতীয় নাগৰিক। কিন্তু তেওঁলোকে আমাক তেনেদৰে গ্ৰহণ নকৰে। কাৰণ তেওঁলোক অসভ্য।’
উল্লেখ্য যে এই ঘটনাৰ এক ভিডিঅ’ ভাইৰেল হৈছে। ভিডিঅ’টোত এপার্টমেন্টটোৰ চতুৰ্থ মহলাৰ খটখটীত দুই পক্ষৰ মাজত উত্তপ্ত তর্ক-বিতর্কত লিপ্ত হোৱা দেখা গৈছে। এই তর্ক-বিতৰ্কৰ সময়ত অভিযুক্ত দুই পুৰুষ-মহিলাই তিনি অসহায় যুৱতীৰ প্ৰতি অপমানসূচক ভাষা প্রয়োগ কৰে। ইয়াৰ দ্বাৰা তেওঁলোকে যুৱতী তিনিগৰাকী ‘বেশ্যা বৃত্তি’ত জড়িত থকা বুলি সুচাব বিচাৰে। অসহায় যুৱতী তিনিগৰাকীক উদ্দেশি অভিযুক্ত মহিলাগৰাকীয়ে কয়, ‘তোমালোকে ঘৰত মাচাজ পার্লাৰ খুলিছা নেকি?’ এই মাচাজ পাৰ্লাৰৰ জৰিয়তে তেওঁ যুৱতী তিনিগৰাকী অসৎ কৰ্মত লিপ্ত থকাৰ ইংগিত দিবলৈ চেষ্টা কৰে।
লক্ষ্যণীয় যে ঘটনাটো সংঘটিত হোৱাৰ সময়ত ঘটনাস্থলীত এজন আৰক্ষী বিষয়াও উপস্থিত আছিল। অৱশ্যে আৰক্ষী বিষয়াজনে দুই পক্ষৰ কাজিয়াত হস্তক্ষেপ কৰি পৰিস্থিতি শান্ত কৰাৰ চেষ্টা চলায়। তাৰ মাজতে অভিযুক্ত মহিলাগৰাকীয়ে নিজকে সামাজিকভাৱে উচ্চখাপৰ সূচাই অভিযুক্ত পুৰুষজনক ইংগিত কৰি উচ্চস্বৰত কয়, ‘তোমালোকৰ মানেই নাই। তেওঁ সীমা শুল্ক বিষয়া আৰু ৰাজনীতিকৰ পুত্র।’ আনহাতে, এই অকল্পনীয় পৰিৱেশৰ অভিজ্ঞতা সম্পৰ্কত আন এগৰাকী ভুক্তভোগী যুৱতীয়ে কয়, ‘মই ভালদৰে তেওঁলোকক সম্বোধন কৰিছিলো।
ইলেক্ট্রিচিয়ানজনৰ ভুল থকাৰ বাবে তেওঁ ক্ষমা বিচাৰিলে।’ এয়াৰ কণ্ডিচনাৰ স্থাপন কৰোতে দেৱালৰ পৰা বালি-চিমেণ্ট তললৈ খহি পৰাৰ বাবে ইলেক্ট্রিচিয়ানজনৰ স’তে এই দুই পুৰুষ-মহিলা কাজিয়াত লিপ্ত হয়। বিষয়টোত যুৱতী তিনিগৰাকীয়ে হস্তক্ষেপ কৰাত তেওঁলোকক গালি বৰষিবলৈ লয় অভিযুক্তদ্বয়ে।
আনকি হর্ষ সিঙে ইলেক্ট্রিচিয়ানজনক প্ৰহাৰ কৰাৰো ভাবুকি দিয়ে। তেতিয়াই যুৱতী তিনিগৰাকীয়ে পৰিস্থিতি বেয়াৰ ফালে ঢাল নাখাওক বুলি বিষয়টোত হস্তক্ষেপ কৰাত তেওঁ উষ্মাৰে কয়, ‘মই তোমালোকৰ স’তে কথা পাতিছো নেকি? তোমালোক উত্তৰ-পূবৰ অসভ্য, অশিক্ষিত মানুহ।’ তাৰ পাছতে তেওঁ যুৱতী তিনিগৰাকীক প্ৰহাৰ কৰিবলৈ উদ্যত হৈছিল। তাতেই ক্ষান্ত নাথাকি তেওঁ উত্তৰ-পূবৰ বিৰুদ্ধে অনেক ভিত্তিহীন কথা চিঞৰি চিঞৰি কয় ৷
আনহাতে এই ঘটনা উত্তৰ – পূবৰ ৰাজ্য কেই খনৰ লগতে দেশজুৰি তীব্ৰ প্ৰতিক্ৰিয়াৰ সৃষ্টি হয় । নতুন দিল্লীত উত্তৰ-পূবৰ যুৱতীৰ সৈতে হোৱা ঘটনাক লৈ উত্তৰ-পূবৰ ছাত্ৰ সমাজে সাক্ষাৎ কৰিলে বুধবাৰে অনুসূচিত জাতিৰ ৰাষ্ট্ৰীয় আয়োগৰ অধ্যক্ষক সাক্ষাৎ কৰে । ভাৰত চৰকাৰৰ হস্তক্ষেপৰো দাবীকাে অৰুণাচলৰ সক্রিয় সমাজকর্মী ট’ক’ টাকিৰ।
দিল্লী প্ৰদেশ আপেও দোষী গ্ৰেপ্তাৰ কৰি কঠোৰ শাস্তিৰ দাবী কৰে ৷এনে ঘটনাক্ৰমৰ মাজতে বুধবাৰে পুৱা দুই অভিযুক্ত হৰ্ষ সিং আৰু ৰুবী জৈনক দিল্লী আৰক্ষীয়ে গ্ৰেপ্তাৰ কৰি পাটিৱালা হাউচ আদালতত হাজিৰ কৰি নিজৰ জিন্মাত লয় ৷
