Nalbari Incident:
নলবাৰী জিলাৰ বেলশৰ থানাৰ অন্তৰ্গত পানীগাঁওস্থিত ছেইণ্ট মেৰীজ ইংলিছ স্কুলত বৰদিন উদযাপনৰ সামগ্রী লণ্ডভণ্ড কৰা ঘটনাৰ সৈতে জড়িত থকাৰ অভিযোগত বৃহস্পতিবাৰে গ্ৰেপ্তাৰ হোৱা হিন্দুত্ববাদী সংগঠনৰ চাৰি নেতা ক্ৰমে বিশ্ব হিন্দু পৰিষদৰ নলবাৰী জিলা সমিতিৰ সম্পাদক ভাস্কৰ ডেকা, উপ-সভাপতি মানস পাটগিৰি, সহকাৰী সম্পাদক বিজু দত্ত আৰু বজৰং দলৰ নলবাৰী জিলাৰ সংযোজক নয়নমণি তালুকদাৰক শুকুৰবাৰে নলবাৰী আৰক্ষীয়ে মুখ্য ন্যায়িক দণ্ডাধীশৰ আদালতত হাজিৰ কৰি নিজৰ জিন্মাত লয় ৷
আনহাতে নলবাৰী কাণ্ডক লৈ সামাজিক মাধ্যমযোগে তীপ্রতিক্রিয়া প্রকাশ কৰে মুখ্যমন্ত্ৰী ড: হিমন্ত বিশ্ব শৰ্মাই ৷এই সন্দৰ্ভত মুখ্যমন্ত্ৰী গৰাকীয়ে উল্লেখ কৰে যে নলবাৰী জিলাৰ বেলশৰ থানাৰ অন্তৰ্গত পানীগাঁওস্থিত ছেইণ্ট মেৰীজ ইংলিছ স্কুলত বৰদিন উদযাপনৰ সামগ্রী লণ্ডভণ্ড কৰা ঘটনাৰ সৈতে জড়িত দুষ্কৃতিকাৰীসকলক আটক কৰা হৈছে। অসম আৰক্ষীয়ে তৎক্ষণাত এই বিয়য়ত ব্যৱস্থা গ্রহণ কৰিছে আৰু আইন অনুসাৰে আগলৈকে অধিক কঠোৰ ব্যৱস্থা গ্রহণ কৰা হ’ব। ৰাজ্যজুৰি শান্তি-সম্প্রীতি বজাই ৰখাৰ লগতে সকলো প্রতিষ্ঠান আৰু নাগৰিকৰ সুৰক্ষা নিশ্চিত কৰিবলৈ আমি সম্পূৰ্ণৰূপে প্রতিশ্রুতিবদ্ধ।
উল্লেখ্য যে বুধবাৰে দিন-দুপৰতে নলবাৰীৰ পানীগাঁও স্থিত ছেইণ্ট মেৰীজ স্কুলত বৰদিনৰ প্রস্তুতিত ব্যাঘাত জন্মাই বৰদিন পালনত ব্যৱহৃত বিভিন্ন সামগ্রী কাঢ়ি আনি জ্বলাই দিছিল বিশ্ব হিন্দু পৰিষদ আৰু বজৰং দলৰ একাংশ নেতা-কর্মীয়ে। পাছত বিদ্যালয় কর্তৃপক্ষৰ অভিযোগৰ ভিত্তিত বেলশৰ আৰক্ষীয়ে ঘটনা সংক্রান্তত এটা গোচৰ ৰুজু কৰে। আনহাতে, এই দুই হিন্দুত্ববাদী সংগঠনৰ নেতা-কর্মীৰ এনে উদ্ভণ্ডালিক লৈ চৌদিশে প্রবল প্রতিক্ৰিয়াৰ সৃষ্টি হৈছিল ৷
পাছত বৃহস্পতিবাৰে আৰক্ষীয়ে ঘটনা সংক্রান্তত বিশ্ব হিন্দু পৰিষদৰ নলবাৰী জিলা সমিতিৰ সম্পাদক ভাস্কৰ ডেকা, উপ-সভাপতি মানস পাটগিৰি, সহকাৰী সম্পাদক বিজু দত্ত আৰু বজৰং দলৰ নলবাৰী জিলাৰ সংযোজক নয়নমণি তালুকদাৰক গ্ৰেপ্তাৰ কৰে। এই চাৰিজনক আৰক্ষীয়ে নলবাৰী চহৰৰ ৰিদ্ধি-সিদ্ধি হোটেলৰ ওচৰৰ পৰা কৰায়ত্ত কৰি থানালৈ নিয়ে। তেওঁলোকৰ সতীৰ্থসকলৰ সন্ধানত আৰক্ষীয়ে অভিযান অব্যাহত ৰাখিছে। অভিযোগ অনুসৰি এই চাৰি নেতাৰ নেতৃত্বতপবিত্ৰ বৰদিনৰ প্রাকমুহূর্তত একাংশই তাণ্ডৱ চলাই ছেইন্ট মেৰীজ স্কুলৰ বেনাৰ, পোষ্টাৰ ফালি পেলোৱাৰ উপৰি যীশুখ্ৰীষ্টৰ মূর্তি পর্যন্ত দলিয়াই পেলায়। আনকি বিদ্যালয় চৌহদত দলটোৱে জয় শ্ৰীৰাম ধ্বনি দি কোনো কাৰণতে বৰদিন উদ্যাপন নকৰিবলৈ বিদ্যালয় কর্তৃপক্ষক ভাবুকিও দিয়ে।
ইয়াৰ পাছতে দলটোৱে নলবাৰী চহৰৰ বিভিন্ন শ্বপিং মলত প্ৰৱেশ কৰি বৰদিন উদ্যাপন ব্যৱহৃত বিভিন্ন সামগ্ৰী দোকানৰ পৰা কাঢ়ি নি জুলাই ছাৰখাৰ কৰে। বৃহস্পতিবাৰৰ ঘটনাৰ পাছতে ছেইন্ট মেৰীজ স্কুলৰ মুৰব্বী ফাদাৰ বাইজু ছেবাষ্টিয়ানে জিলা আৰক্ষী অধীক্ষককো ঘটনা সম্পর্কে অভিযোগ দিছিল।
