Compassionate Ground:অনুকম্পামূলক নিযুক্তি (Compassionate Ground)ৰ পৰা বঞ্চিত প্রার্থীসকলৰ সংবাদমেল
:অনুকম্পামূলক নিযুক্তি (Compassionate Ground)ৰ পৰা বঞ্চিতপ্ৰাৰ্থী সকলে শুকুৰবাৰে দিছপুৰ প্ৰেছ ক্লাবত এক সংবাদমেলত কেতবোৰ বিষয় সদৰি কৰে ৷ বঞ্চিত প্ৰাৰ্থী সকলৰ নেতৃত্ব লোৱা কে’বাজনো প্ৰাৰ্থীয়ে কয়, আমাৰ পৰিয়ালৰ উপার্জনক্ষম ব্যক্তি চৰকাৰী চাকৰিত থাকোতেই আকস্মিকভাৱে মৃত্যু বা স্থায়ী অক্ষমতাৰ সন্মুখীন হৈছিল I সেই মুহূর্তত আমাৰ পৰিয়ালসমূহ জীৱনৰ আটাইতকৈ ডাঙৰ সংকটৰ সন্মুখীন হৈছিল I চৰকাৰী নিয়ম অনুসৰি সেই সময়ত পৰিয়ালসমূহক সহায় কৰাৰ উদ্দেশ্যে অনুকম্পামূলক নিযুক্তিৰ ব্যৱস্থা কৰা হৈছিল, আৰু পূৰ্বতে বহু পৰিয়ালে এই ব্যৱস্থাৰ জৰিয়তে নতুন জীৱনৰ আশা পাইছিল I কিন্তু অত্যন্ত দুখৰ বিষয় এই যে, আমাৰ বহু আবেদন DLC-ত সঠিকভাৱে বিবেচিত হোৱাৰ পিছতো বছৰ বছৰ ধৰি SLC-পৰ্যায়ত অমীমাংসিত হৈ ৰৈছে I এই দীঘলীয়া সময়ছোৱাত আমি কেৱল অপেক্ষাই কৰি থাকিলোঁ I কোনো স্পষ্ট উত্তৰ নাপাই, কোনো পথ নেদেখি, শেষত আমি এটা আইনী মেৰপেচত সোমাই পৰিলোঁ আৰু গুৱাহাটী উচ্চ ন্যায়ালয়ৰ দ্বাৰস্থ হ’লোঁ I গুৱাহাটী উচ্চ ন্যায়ালয়ে আগতে অনুকম্পামূলক নিযুক্তি পোৱা প্ৰাৰ্থীসকল আৰু 2017 চনৰ পিছত পূর্ণ পেঞ্চন পোৱা ক্ষেত্ৰসমূহ বিবেচনা কৰি আম বিষয়টোত থকা জটিলতা দূৰ কৰিবলৈ Abdul Kader Bokshi vs The State of Assam, Case No. WP(C)/342/2025, Date:03/04/2025 ৰ জৰিয়তে SLC-ত আমাৰ কেছসমূহ বিবেচনা কৰাৰ স্পষ্ট অনুমতি প্রদান কৰিছিল তথাপিও আজিলৈকে SLC-পৰ্যায়ত নিযুক্তিৰ ক্ষেত্ৰত কোনো দৃশ্যমান পদক্ষেপ গ্ৰহণ কৰা হোৱা নাই। এই দীঘলীয়া বিলম্বে আমাৰ পৰিয়ালসমূহক গভীৰ আর্থিক আৰু মানসিক সংকটত পেলাইছে। বহু প্রার্থীয়ে অপেক্ষা কৰোঁতে বয়স সীমা পাৰ কৰিছে। বহু পৰিয়ালে দুখ-কষ্ট, অনিশ্চয়তা আৰু অপমানৰ মাজত দিন পাৰ কৰিবলগীয়া হৈছে। কিছুমান পৰিয়ালৰ অৱস্থা এতিয়া এনে হৈছে যে-“কালি কি খাব, সন্তানক কেনেকৈ পঢ়াম”-এই প্রশ্নতেই দিন শেষ হয়। এই সুযোগতে আমি সংবাদ মাধ্যমৰ জৰিয়তে অসম চৰকাৰৰ সন্মানীয় মুখ্যমন্ত্রী ড° হিমন্ত বিশ্ব শৰ্মা ডাঙৰীয়াক বিনীত আৰু আবেগিক অনুৰোধ জনাইছোঁ। মাননীয় মুখ্যমন্ত্ৰী ডাঙৰীয়া, আপুনি ইতিমধ্যে প্রায় ১ লাখ ৭০ হাজাৰকৈ নিযুক্তি দি ৰাজ্যবাসীক সহায় কৰিছে, তাৰ বাবে আমি আপোনাক কৃতজ্ঞতা জনাওঁ।
এতিয়া অনাথ, পিতৃ-মাতৃহীন আৰু দুখীয়া পৰিয়ালৰ প্ৰায় ১৫০-২০০ জন প্ৰাৰ্থীৰ দিশেও মানৱীয় দৃষ্টিৰে চাই, শীঘ্ৰে নিযুক্তিৰ ব্যৱস্থা কৰিবলৈ আপোনাক অন্তৰৰ পৰা অনুৰোধ জনাইছোঁ। মুখ্যমন্ত্ৰী ডাঙৰীয়াৰ ওপৰতে আমাৰ শেষ ভৰসা।বছৰ বছৰ ধৰি অপেক্ষা কৰাটো কোনো দুখীয়া আৰু অনাথ পৰিয়ালৰ বাবে সহজ নহয়। আপোনাৰ এটা সদয় আৰু মানৱীয় সিদ্ধান্তেই বহু পৰিয়ালৰ জীৱনলৈ নতুন পোহৰ আনিব পাৰে। অনুকম্পামূলক নিযুক্তিৰ মূল উদ্দেশ্য অনুসৰি শীঘ্রে ন্যায় পাম বুলি আমি দৃঢ় আশাৰে ৰৈছোঁ। আমি আশা ৰাখিছোঁ যে অহা ১০ ফেব্ৰুৱাৰীত এই চৰকাৰখনে যিদৰে আন আন বিভাগত নিযুক্তি দিয়াৰ কথা ইতিমধ্যে ঘোষণা কৰিছে, সেই একে দিনতে বা তাৰ সৈতে সংগতি ৰাখি আমাৰ নিযুক্তিৰ বিষয়তো ইতিবাচক আৰু মানৱীয় সিদ্ধান্ত লোৱা হ’ব।
