Rupee Falls:
মার্কিন ডলাৰৰ বিপৰীতে ভাৰতীয় মুদ্ৰাৰ মূল্য ৪০ টকা কৰাৰ প্রতিশ্রুতি দিয়া প্রধানমন্ত্রী নৰেন্দ্ৰ মোদীৰ দিনত ভাৰতীয় টকাৰ পতনে নিতৌ ন ন অভিলেখ স্থাপন কৰিছে। এনে অৱস্থাত দেশৰ অর্থনীতি ভয়াৱহ বিপৰ্যয়ৰ দিশে অগ্ৰসৰ হৈছে বুলি একাংশ অর্থনীতিবিদে আশংকা কৰিছে।
আনকি আজি এক মার্কিন ডলাৰৰ মূল্য ভাৰতীয় মুদ্রাত ৯২ টকা পর্যন্ত হয়। আজিৰ দিনটোৰ আৰম্ভণিতে টকাৰ এই মহাপতন ঘটে। অৱশ্যে সন্ধিয়ালৈ পৰিস্থিতি কিছু উন্নত হৈ ডলাৰৰ বিপৰীতে ভাৰতীয় মুদ্ৰাৰ মূল্য ৯১.৮৮ টকা হয়। তৎসত্ত্বেও পৰিস্থিতি শোচনীয় হৈ আছে। একাংশ অর্থনীতিবিদে আঙুলিয়াই দিছে যে টকাৰ এই শোচনীয় অৱস্থাৰ প্ৰভাৱত বিভিন্ন সা-সামগ্ৰীৰ মূল্যবৃদ্ধিয়ে গগন স্পৰ্শ কৰাৰ আশংকা আছে। অর্থনীতিবিদৰ মতে টকাৰ মূল্যৰ এই উদ্বেগজনক পতনৰ আঁৰত আছে ভাৰতৰ বজাৰৰ্ত বিদেশী বিনিয়োগকাৰীসকলৰ বিনিয়োগ প্রত্যাহাৰ, মার্কিন ৰাষ্ট্ৰপতি ড’নাল্ড ট্রাম্পৰ শুল্ক হেঁচা, বিশ্বৰ বজাৰৰ অনিশ্চয়তা। আজি মুদ্রা বিনিময় বজাৰত ভাৰতীয় টকাৰ মূল্য প্ৰথম অৱস্থাত ৯১.৪৫ টকা আছিল। সময় আগবঢ়াৰ লগে লগে এই পতন অধিক বৃদ্ধি পাই ৯২ টকা হয়। অৱশ্যে ইয়াৰ কিছু সময়ৰ পাছতে পৰিস্থিতি কিছু উন্নত হৈ ভাৰতীয় মুদ্রাৰ মূল্য ৯১.৮৮ টকা হয়।
উল্লেখ্য যে যোৱা বছৰৰ পৰা ভাৰতীয় মুদ্ৰাৰ মূল্যৰ পতনে ভয়াৱহ ৰূপ লৈছে। আনকি চলিত বছৰটোৰ প্ৰথম ২৩ টা দিনতে টকাৰ মূল্য দুশ পইচা বা দুই শতাংশৰো অধিক হ্রাস পাইছে। ভাৰতীয় মুদ্ৰাৰ মূল্যৰ এই মহাপতন সম্পৰ্কত অনুজ চৌধুৰী নামৰ বিশ্লেষকজনে কয়, ‘বিদেশী বিনয়োগকাৰীৰ বিনিয়োগ প্রত্যাহাৰ, বিশ্বৰ বজাৰত অনিশ্চয়তা আদি কাৰকৰ প্ৰভাৱত টকাৰ মূল্য এনেদৰে অৱনমন ঘটিছে। ইয়াৰ বিপৰীতে ডলাৰ অধিক শক্তিশালী হ’বলৈ ধৰিছে।’
লক্ষ্যণীয় যে কেৱল টকাৰ মূল্যৰ পতনে নহয়, শেহতীয়াভাৱে ভাৰতৰ শ্বেয়াৰ বজাৰতো খহনীয়াৰ সৃষ্টি হৈছে। আজি বম্বে শ্বেয়াৰ বজাৰৰ সূচকাংক ছেনছেক্সৰ ৭৬৯.৬৭ পইণ্টৰ পতন ঘটে। ফলত আজি সন্ধিয়া ছেনছেক্স ৮১,৫৩৭.৭০ হয়। একেদৰে নতুন দিল্লীস্থিত ৰাষ্ট্ৰীয় ষ্টক এক্সচেঞ্জৰ সূচকাংক নিফটিৰো ২৪১.২৫ পইণ্টৰ অৱনমন ঘটি ২৫,০৪৮.৬৫ হৈছে। ফলত বিনিয়োগকাৰীসকলে লাখ লাখ কোটি টকাৰ লোকচান ভৰিবলগীয়া হৈছে। আনহাতে, আজি বিশ্বৰ বজাৰৰ্ত প্ৰতি বেৰেল খাৰুৱা তেলৰ মূল্য ১.০৩ শতাংশ বৃদ্ধি পাই ৬৪.৭২ ডলাৰ অৰ্থাৎ ৫,৯৪৬.৪৭ টকা হয়।
