ECI Pressmeet in Guwahati:
আগন্তুক অসম বিধানসভাৰ নিৰ্বাচনৰ পৰিপ্ৰেক্ষিতত তিনিদিনীয়া কাৰ্যসূচীৰে সোমবাৰে গুৱাহাটীত উপস্থিত হোৱা ভাৰতৰ মুখ্য নির্বাচন আয়ুক্ত জ্ঞানেশ কুমাৰৰ নেতৃত্বত নির্বাচন আয়োগৰ প্ৰতিনিধি দলটোৱে যোৱা তিনিদিনত একাদিক্ৰমে ৰাষ্ট্ৰীয় আৰু ৰাজ্যিক স্বীকৃতপ্ৰাপ্ত দল সমূহৰ স’তে সুকীয়া সুকীয়াকৈ এক পৰ্যালোচনা বৈঠকত অংশ লয় ৷ একেদৰে নিৰ্বাচন আয়োগে ৰাজ্যৰ মুখ্যসচিব আৰু আৰক্ষী সঞ্চালক প্ৰধানৰ সহ জ্যেষ্ঠ আমোলাৰ স’তে আলোচনাত মিলিত হোৱাৰ পিছত বুধবাৰে মহানগৰীৰ ৰেডিছন ব্লু হোটেলত এক সংবাদমেল সম্বোধন কৰে মুখ্য নির্বাচন আয়ুক্ত জ্ঞানেশ কুমাৰ,নির্বাচন আয়ুক্তদ্বয় ড° এছ. এছ. সান্ধু আৰু ড: বিবেক যোশীয়ে ৷ মুখ্য নির্বাচন আয়ুক্ত গৰাকীয়ে কয়,অসমত মুঠ ভোটাৰ ২ কোটি ৪৯ লাখ ৫৯ হাজাৰ ১৩৯ জন ৷ নতুন ভোটাৰৰ সংখ্যা ৫ লাখ ৭৫ হাজাৰ | ইয়াৰে ১২ লাখ ৩ হাজাৰ ৭০৯ জন দিব্যাংগ ভোটাৰ ৷
আনহাতে অযোগ্য ভোটাৰৰ নাম কৰ্তনৰ বাবে অসমত এছ আৰ ব্যৱস্থা কৰা হয়। যাৰ জৰিয়তে কোনোবা ভোটাৰ ৰৈ গ’লে তেওঁ জিলা আয়ুক্তৰ লগত যোগাযোগ কৰিব পাৰিব ৷ আগন্তুক নির্বাচনত সকলো ভোটাৰক ভোট দিবলৈ আহ্বান আয়োগৰ। একেদৰে এইবাৰ নিৰ্বাচনত ইভিএমত ৰঙীন ফটো থাকিব প্ৰাৰ্থীৰ ৷ ইভিএমত প্ৰাৰ্থীৰ ফটো ব্লেক এণ্ড হোৱাইট হ’লে ভোটাৰৰ অসুবিধা হোৱাৰ বাবে এই পদক্ষেপ লোৱা হৈছে বুলি উল্লেখ কৰি মুখ্য নিৰ্বাচনী আয়ুক্ত গৰাকীয়ে কয়,নির্বাচনত থাকিব মুঠ ভোটকেন্দ্রৰ সংখ্যা হ’ব ৩১,৪৮৬টা ৷ ইয়াৰে গ্ৰামাঞ্চলত ২৭,৭১১টা ভোটকেন্দ্র থকাৰ বিপৰীতে চহৰাঞ্চলত ৩,৭৭৫টা ভোটকেন্দ্র । একেদৰে মহিলাই পৰিচালনা কৰিব ৩৭১৬টা ভোটকেন্দ্র। এইবাৰৰ পৰা কোনো এটা ভোট কেন্দ্রত নাথাকিব ১২০০ৰ অধিক ভোটাৰ ৷ভোটকেন্দ্ৰত খোৱাপানীকে ধৰি থাকিব সকলো ব্যৱস্থা কৰা হ’ব। তদুপৰি দিব্যাংগৰ বাবে ভূমি মহলাত থাকিব ভোটকেন্দ্র ৷
সংবাদমেলত জ্যেষ্ঠ উপ-নির্বাচন আয়ুক্তদ্বয় মনীশ গাৰ্গ আৰু ড: পৱন কুমাৰ শৰ্মা, সঞ্চালক প্রধান আশীষ গোৱেল, উপদেষ্টা এন. এন. বুটোলিয়া, সঞ্চালক বিদ্যাৰাণী কন্থৌজাম আৰু ৰাজ্যিক মুখ্য নিৰ্বাচনী বিষয়া অনুৰাগ গোৱেল উপস্থিত থাকে ৷
