Barpeta Road Robbery Incident Update:
ৰোডৰ এখন গহনালয়ৰ পৰা এটা ডকাইতৰ দলে শুকুৰবাৰে দিন দুপৰতে ১৫ কোটিৰো অধিক টকা মূল্যৰ সোণ-হীৰাৰ আ-অলংকাৰ, নগদ এক লাখ ৩৫ হেজাৰৰো অধিক টকা আদি লুটি লৈ নির্বিঘ্নে উধাও হয়। দুপৰীয়া ১২.৪২ বজাৰ পৰা এক বজাৰ ভিতৰত এই লোমহর্ষক ডকাইতি কাণ্ড সংঘটিত হয়।
আৰক্ষী থানাৰ পৰা মাত্ৰ ২০০ মিটাৰৰ সমীপত সংঘটিত চাঞ্চল্যকৰ ডকাইতি কাণ্ডই দেশজুৰি চৰ্চিত হৈ পৰিছে ৷ ঘটনা সংঘটিত হোৱাৰ পিছতে আৰক্ষীয়ে নিশাই ক্ষিপ্ৰতাৰে বৰপেটাৰ দৌলাশালত অভিযান চলাই ঘটনাৰে জড়িতোথকাৰ সন্দেহত চাৰিজন যুৱকক আটক কৰে।
উল্লেখ্য যে বৰপেটা ৰোডৰ নগৰৰ সদাব্যস্ত দুর্গাবাৰী-কালীবাৰী ৰোডস্থিত ৰমানাথ কমপ্লেক্সত থকা ‘সেন কো’ নামৰ গহনালয়ত সংঘটিত হয় চাঞ্চল্যকৰ ডকাইতি ঘটনা । শুকুৰবাৰে দুপৰীয়া গহনালয়খনত কোনো গ্রাহক নাছিল। তেনে সময়তে ডকাইতৰ দলটোৰ দুজনে প্রথমে গহনালয়ৰ শ্ব’ৰূমৰ তলত থকা কৰ্মচাৰীৰ স’তে ওপৰলৈ উঠি যায়। গহনালয়ৰ কৰ্মচাৰীসকলে লোক দুজনক গ্রাহক বুলি ধাৰণ কৰি তেওঁলোকক কেনে সোণ ক্রয় কৰিব, সেই বিষয়ে জনাবলৈ অনুৰোধ জনায়। তেতিয়াই দলটোৰ আন তিনিজনে বিপণীখনত প্রৱেশ কৰে আৰু এজনে প্রথম মহলাৰ প্ৰৱেশদ্বাৰত থাকি তদাৰক কৰে।
পাঁচজনীয়া এই দলটোৱে গহনালয়ত প্ৰৱেশ কৰিয়ে কৰ্মচাৰীসকলৰ মূৰত পিষ্টল লগাই পুৰুষ-মহিলা সমন্বিতে সকলো কৰ্মচাৰীৰ হাত-মুখ বান্ধি লয় আৰু চিঞৰ-বাখৰ নকৰিবলৈ ভাবুকি দিয়ে। হিন্দী ভাষাত কথা কোৱা ডকাইতৰ দলটোৱে আনকি গহনালয়খনৰ চিচি টিভি কেমেৰা ভাঙি হার্ড ডিস্ক সংগ্ৰহ কৰি লয়। ফলত ভিতৰত তীব্ৰ আতংকৰ সৃষ্টি হয় আৰু প্ৰাণৰ মায়াত কোনেও চিঞৰ-বাখৰ কৰা নাছিল। ইয়াৰ প্ৰাকক্ষণত ডকাইত কেইজনে কৰ্মচাৰীসকলৰ প্ৰত্যেকৰে ম’বাইল ফোন, মানিবেগ পর্যন্ত হস্তগত কৰে। এনেদৰে গহনালয়খনত ডকাইতৰ দলটোৱে লুটপাট চলাই থকাৰ সময়তে ঘটনাস্থলীত গহনালয়ৰ গুদাম প্ৰৱন্ধকে প্ৰৱেশ কৰাত তেওঁক গালি-গালাজ কৰি ডকাইতৰ দলটোৰ এজনে তেওঁৰ বুকুত গোৰ মৰাৰ লগতে মুখত প্ৰহাৰ কৰে।
পাছত তেওঁক দলটোৱে গহনালয়ৰ কৰ্মচাৰীয়ে দুপৰীয়াৰ আহাৰ গ্ৰহণ কৰা কক্ষত আবদ্ধ কৰি ৰাখে। তদুপৰি প্ৰৱন্ধকজনৰ জেপত থকা নগদ ১০ হেজাৰ টকাও ডকাইতৰ দলটোৱে কাঢ়ি লয়। ডকাইতৰ দলটোৱে বিপণীখনত বেংকত জমা দিবলৈ ৰখা নগদ এক লাখ ২৫ হেজাৰ টকাও কাঢ়ি নিয়ে বুলি প্ৰৱন্ধকজনে জনায়। তেওঁ লগতে জনোৱা মতে, ডকাইতি কাণ্ড সংঘটিত হোৱাৰ সময়ত বিপণীখনত কমেও ১৫ কোটি টকাৰ সোণ-হীৰাৰ আ-অলংকাৰ জমা আছিল। এই সকলো সোণ-হীৰাৰ অলংকাৰ দলটোৱে লুটি নিয়ে। ডকাইতৰ দলটোৱে দুপৰীয়া ১২.৪২ৰ পৰা এক বজালৈ ১৮ মিনিট সময় ধৰি বিপণীখনত লুটপাট চলাই হিন্দী চিনেমাৰ কায়দাৰে দুখন মটৰ চাইকেলত উঠি সুকীয়া দিশত নির্বিঘ্নে আঁতৰি যায়।
ডকাইতৰ দলটোৱে গহনালয়খনৰ চিচি টিভি কেমেৰা বিকল কৰিলেও কাষৰ আন এখন সোণৰ অলংকাৰৰ বিপণীৰ চিচি টিভি কেমেৰাত দলটোৰ প্ৰৱেশ-প্রস্থানৰ দৃশ্য বন্দী হয়। শিমলাগুৰিৰ ফালৰ পৰা ডকাইতৰ দলটো দুখন মটৰ চাইকেলত উঠি গহনালয়খনলৈ আহে। লুটপাট চলাই পলায়ন কৰাৰ সময়ত এখনত তিনিজনে আৰু আন এখনত দুজন উঠি দুটা ভাগত পলায়ন কৰে। ইয়াৰে এটা দল শিমলাগুৰিৰ ফালে উধাও হয়। এই ডকাইতি কাণ্ডক লৈ গহনালয়খনৰ মহিলা কৰ্মচাৰীসকল আতংকত মূঢ় হৈ পৰে। তেওঁলোকৰ একাংশ কান্দোনত ভাগি পৰে।
আনহাতে, ডকাইতৰ দলটো উধাও হোৱাৰ পাছত ঘটনাস্থলীত আৰক্ষীৰ এটা দল উপস্থিত হৈ তদন্ত আৰম্ভ কৰে। তদন্তকাৰী আৰক্ষীয়ে ম’বাইল ফৰেনচিক ভান আনি ঘটনাস্থলীৰ পৰা ফিংগাৰ প্রিন্ট সংগ্ৰহ কৰে বুলি আৰক্ষীয়ে জনায়। পাছত সন্ধিয়া বৰপেটাৰ জ্যেষ্ঠ আৰক্ষী অধীক্ষক পুস্কিন জৈনো ঘটনাস্থলীত উপস্থিত হৈ ঘটনাৰ বুজ লয়। আনহাতে, বৰপেটাৰোডৰ দৰে সদাব্যস্ত বাণিজ্যিক নগৰ এখনত দিন দুপৰতে হিন্দী ছবিৰ কায়দাত কেনেদৰে ডকাইতিৰ ঘটনা সংঘটিত হ’বলৈ পালে, তাক লৈ স্থানীয় ৰাইজৰ মনত অনেক প্রশ্ন উদয় হৈছে।
