ইৰান-ইজৰাইলৰ যুদ্ধৰ ফলত বহুলভাৱে চর্চা হৈছে হৰমুজ প্ৰণালীৰ নাম। যুদ্ধৰ ফলত সম্প্রতি এই প্রণালী কার্যতঃ বন্ধ হৈ পৰিছে। ইৰান আৰু ওমানৰ মাজৰ এই সংকীর্ণ পথৰে বিশ্বৰ দৈনিক তেল আৰু তৰল প্রাকৃতিক গেছ (এলএনজি) সৰবৰাহৰ প্ৰায় এক পঞ্চমাংশ পাৰ হয়।
সমগ্ৰ বিশ্বতে সম্প্ৰতি হৰমুজ প্রণালীক পৃথিৱীৰ সবাতোকৈ কৌশলগত বাধাৰূপে তথা বিশ্বব্যাপী ইন্ধন সৰবৰাহৰ ক্ষেত্রত সবাতোকৈ গুৰুতৰ ব্যাঘাতৰ এক বুলি বিবেচনা কৰা হৈছে। এই প্রণালীতে এটা ৰঙা উপকূল আছে, যি দীর্ঘদিনৰ পৰা বিশ্বজুৰি ভ্ৰমণকাৰী, ভূতাত্ত্বিক তথা ফটো চিকাৰীসকলক আকৰ্ষণ কৰি আহিছে।
হৰমুজ প্রণালীৰ ৰঙা উপকূল (ছোৰ্খ উপকূল) ইৰানৰ সবাতোকৈ অসাধাৰণ উপকূলীয় দর্শনীয় স্থানসমূহৰ অন্যতম, যি ইয়াৰ ৰঙা বালি আৰু জলৰাশিৰ বাবে বিখ্যাত।ইয়াৰ বালিত আয়ৰণ অক্সাইডৰ পৰিমাণ বেছি থকাৰ কাৰণে ই গাঢ় ৰঙা ৰঙৰ। বৈজ্ঞানিকভাবে আকর্ষণীয় তথা দৃশ্যত নাটকীয় এই খনিজ সমৃদ্ধ মাটিৰ উপকূলৰেখাক তেজৰ দৰে ৰঙা দেখা যায়।
ঠিক যেন কোনো চিত্ৰকৰে অংকন কৰা তৈলচিত্রহে। স্থানীয় লোকসকলে এই ৰঙা মাটিক জেলাক বুলি কয়। ইয়াৰ ৰঞ্জকতা ইমানেই তীব্র যে ই ছালত কিছুদিনলৈ দাগ সৃষ্টি কৰিব পাৰে আৰু ইয়াৰ কিছু ক্ষুদ্র কণাই আনকি নিজৰ লোৰ ঘনত্বৰ কাৰণে চুম্বকৰ স’তে প্রতিক্রিয়া কৰে।
দ্বীপটোৰ বাসিন্দাসকলৰ স্থানীয় খাদ্যৰ ভিতৰত জেলাক এক গুৰুত্বপূৰ্ণ উপাদান। হৰমুজৰ স্থানীয় লোকসকলে কেতিয়াও গুড়ি আকাৰৰ জেলাক নাখায়, বৰঞ্চ ইয়াক মছলাৰূপে ব্যৱগাৰ কৰে। সাধাৰণত ছুৰাগ (এবিধ গাঢ় ৰঙা ৰঙৰ শুকান মাছক চচ) তেয়াৰ কৰাত ইয়াক মছলাৰূপে ব্যৱহাৰ কৰে।
মহিলাসকলে তেওঁলোকৰ মাহেকীয়া ঋতুচক্ৰৰ সময়ত আয়ৰণৰ প্ৰাকৃতিক উৎসৰূপেও সামান্য পৰিমাণৰ জেলাক গ্রহণ কৰে। তদুপৰি কাপোৰ ৰং কৰা আৰু মৃৎশিল্পত ৰং কৰাৰ বাবেও জেলাক ব্যৱহাৰ হয়। সম্প্রতি প্রশাধন সামগ্ৰী, ৰঞ্জক আৰু কাৰুশিল্পত ব্যৱহাৰৰ বাবে সীমিত পৰিমাণৰ ৰঙা বালি বা জেলাক ৰপ্তানি কৰা হয়।
ৰঙা মাটিৰ প্ৰভাৱ কেৱল উপকূলৰেখাতে সীমাবদ্ধ নহয়। ৰঙা বালিৰ ওপৰত ঢৌ আছাৰ খাই পৰিলে, সাগৰৰ পানীয়ে স্বয়ংক্রিয়ভাৱে ৰঙচুৱা তথা গোলাপী ৰং ধাৰণ কৰে।
এই ৰংবোৰৰ স’তে পাৰস্য উপসাগৰৰ পাতল নীলা আভা মিহলি হৈ এক সম্মোহনী পেলেট সৃষ্টি কৰে, যি সূর্যোদয় আৰু সূর্যাস্তৰ সময়ত তীব্ৰতৰ হয়। যিহেতু সাগৰৰ উপকূলৰ ৰঙা আভা সাগৰৰ অনেক দূৰৰ পৰাই দেখা যায়, সেয়ে নাবিকসকলে এসময়ত হৰমুজ প্রণালীত প্রাকৃতিক নেভিগেচন মাৰ্কাৰৰূপে ইয়াক ব্যৱহাৰ কৰিছিল।
