Flying Squad operations:
দৈনিক অগ্ৰদূত ডিজিটেল ডেক্স:-অসম বিধানসভাৰ নিৰ্বাচনৰ প্ৰাকক্ষণত গুৱাহাটী মহানগৰী সহ ৰাজ্যৰ বিভিন্ন অঞ্চলত ফ্লায়িং স্কোৱাডৰ অভিযানত জব্দ কৰা হয় বৃহৎ পৰিমাণৰ ধন ৷ গুৱাহাটী মহানগৰীৰ জালুকবাৰী উৰণীয়া সেতুৰ সমীপত তথা লাচিত উদ্যানৰ কাষত এখন নীলা ৰঙৰ এক্সইউভি-৭০০ বাহনৰ পৰা জালুকবাৰী আৰক্ষীয়ে Static Surveillance Teamৰ সৈতে যৌথভাবে অভিযান চলাই জব্দ কৰে ২৬ লাখ টকা ৷জব্দকৃত বাহনখনৰ নম্বৰ এএছ-০১ এফজে-৫০৫৮। পাছত জব্দকৃত ধনখিনি আয়কৰ বিভাগক জমা দিয়ে। ইফালে বাহনৰ গৰাকীয়ে ফাৰ্মাচীৰ ব্যৱসায়িক লেনদেনৰ বাবে গুৱাহাটীৰ পৰা নলবাৰীলৈ ধনখিনি লৈ গৈ আছিল বুলি সদৰী কৰিছে।ধনখিনি সন্দৰ্ভত বৰ্তমান আয়কৰ বিভাগে চলাই আছে তদন্ত।
আনহাতে বশিষ্ঠ আৰক্ষীয়ে মাইঘুলিত চাৰি লাখ ৬৬ হেজাৰ আঠশ টকা জব্দ কৰে। এগৰাকী মণিপুৰী মহিলাৰ পৰা ধনখিনি জব্দ কৰা হয়। অৱশ্যে ধনখিনিৰ উৎস এই পর্যন্ত জানিব পৰা হোৱা নাই বুলি আৰক্ষীয়ে সদৰী কৰিছে।
একেদৰে গোৰেশ্বৰৰ বাঙালীপাৰাত নিশা ফ্লায়িং স্কোৱাডৰ অভিযানত জব্দ কৰা হয় ৬ লাখ ১২ হাজাৰ ৫০০ টকা । কৃষ্ণকান্ত সেন নামৰ ব্যৱসায়ীজনৰ বাহনত উদ্ধাৰ হয় টকাখিনি৷টংলাৰ পৰা তামুলপুৰ অভিমুখী আছিল বাহনখন ।
আনহাতে কোকৰাঝাৰৰ কোৰ্টপাৰাস্থিত এচবিআইৰ সমীপত এখন বাহনৰ পৰা জব্দ হয় প্ৰায় ৫৬ লাখ টকা ৷ এক বিশেষ সূত্ৰৰ ভিত্তিত দুজন লোকক তালাচী চলাই আৰক্ষীৰ ফ্লায়িং স্কোৱাডৰ দলে জব্দ কৰে বৃহৎ পৰিমাণৰ ধনখিনি।