Narendra Modi:✒️সংসদৰ তিনিদিনীয়া বিশেষ অধিৱেশনত কেন্দ্ৰ চৰকাৰে তিনিখন গুৰুত্বপূর্ণ বিধেয়ক গৃহীত কৰাৰ লক্ষ্য লৈছে। এই বিধেয়কসমূহ হৈছে— মহিলা সংৰক্ষণৰ বাবে ১৩১তম সংবিধান সংশোধনী বিধেয়ক, লোকসভাৰ সাংসদৰ সংখ্যা ৮৫০লৈ বৃদ্ধি কৰাৰ উদ্দেশ্যে আসন পুনৰ্বিন্যাস বিধেয়ক আৰু কেন্দ্ৰশাসিত অঞ্চল আইন সংশোধনী বিধেয়ক।
বৃহস্পতিবাৰে দুপৰীয়া এই তিনিখন বিধেয়ক লোকসভাত দাখিল কৰা হয়। বিধেয়কসমূহ দাখিল কৰাৰ আগতে এই বিষয়ে ভোটগ্ৰহণ অনুষ্ঠিত হয়, য’ত ২৫১ জন সাংসদে পক্ষে মত প্ৰদান কৰে আৰু ১৮৫ জনে বিপক্ষে মত দিয়ে।
প্ৰায় ১২ ঘণ্টা আলোচনা চলাৰ পাছত শুক্ৰবাৰে দুপৰীয়া এই বিধেয়কসমূহৰ ওপৰত চূড়ান্ত ভোট অনুষ্ঠিত হোৱাৰ সম্ভাৱনা আছে।
সংসদৰ অধিৱেশন আৰম্ভ হোৱাৰ পূৰ্বে প্ৰধানমন্ত্ৰী নৰেন্দ্ৰ মোদীয়ে সমাজ মাধ্যমত পোষ্ট কৰি মহিলা ক্ষমতায়নৰ বিষয়টোত গুৰুত্ব আৰোপ কৰে।
তেওঁ কয় যে এই বিশেষ অধিৱেশন ভাৰতৰ বাবে এক ঐতিহাসিক পদক্ষেপ হিচাপে পৰিগণিত হ’ব, য’ত মহিলা শক্তিক অধিক মৰ্যাদা দিয়া হ’ব।
ইফালে, এই তিনিখন বিধেয়কৰ ভিতৰত বিশেষকৈ আসন পুনৰ্বিন্যাস বিধেয়কখনক লৈ বিৰোধী দলসমূহে তীব্ৰ আপত্তি উত্থাপন কৰিছে। এই বিধেয়কৰ জৰিয়তে লোকসভাৰ আসন সংখ্যা বৰ্তমানৰ ৫৪৩ৰ পৰা বৃদ্ধি কৰি ৮৫০লৈ নিয়াৰ প্ৰস্তাৱ দিয়া হৈছে। লগতে এই আসনসমূহৰ এক-তৃতীয়াংশ মহিলাৰ বাবে সংৰক্ষিত কৰাৰো প্ৰস্তাৱ আছে।
উল্লেখযোগ্য যে ২০২৩ চনত ‘নাৰী শক্তি বন্দন অধিনিয়ম’ গৃহীত হৈছিল, য’ত মহিলাৰ বাবে ৩৩ শতাংশ আসন সংৰক্ষণৰ কথা কোৱা হৈছিল। সেই অনুসৰি জনগণনা আৰু আসন পুনৰ্বিন্যাসৰ পাছত সংৰক্ষণ প্ৰযোজ্য হোৱাৰ কথা আছিল।
কিন্তু এইবাৰ চৰকাৰে দুয়োটা প্ৰক্ৰিয়া একেলগে আগবঢ়োৱাৰ চেষ্টা কৰাত কংগ্ৰেছ, তৃণমূল কংগ্ৰেছ, ডিএমকে আদি দলসমূহে প্ৰশ্ন উত্থাপন কৰিছে।
তামিলনাডুৰ মুখ্যমন্ত্ৰী এম. কে. ষ্টেলিনে এই বিষয়ত বিৰোধিতা কৰি বিধেয়কৰ খচৰা দাহ কৰাৰো অভিযোগ উঠিছে। আনহাতে, কংগ্ৰেছ নেতা ৰাহুল গান্ধীয়ে এই প্ৰস্তাৱক ‘বিপজ্জনক পৰিকল্পনা’ বুলি অভিহিত কৰিছে।
বিৰোধী জোট ‘INDIA’-ৰ নেতাসকলেও এই বিষয়ত বৈঠক অনুষ্ঠিত কৰি চৰকাৰৰ এই পদক্ষেপৰ বিৰুদ্ধে কণ্ঠ উত্থাপন কৰিছে। অৱশ্যে, কেন্দ্ৰ চৰকাৰে বিৰোধীৰ অভিযোগ অস্বীকাৰ কৰি কয় যে এই বিষয়ত ভুল ব্যাখ্যা আগবঢ়োৱা হৈছে।
সংসদীয় বিষয়ক মন্ত্ৰী কিৰেন ৰিজিজুৱে বিৰোধী দলসমূহক গুজব নচপাবলৈ আহ্বান জনায় আৰু মহিলা সংৰক্ষণক সমৰ্থন কৰিবলৈ অনুৰোধ কৰে।
এই বিধেয়কসমূহ গৃহীত হ’লে আৰু ৰাষ্ট্ৰপতিৰ অনুমোদন লাভ কৰিলে লোকসভাৰ গঠন আৰু ৰাজনৈতিক সমীকৰণত ডাঙৰ পৰিবর্তন আহিব পাৰে।