মহিলাৰ বাবে আসন সংৰক্ষণৰ নামত সংবিধানৰ ১৩১ সংশোধনীৰ জৰিয়তে দেশত লোকসভাৰ সমষ্টি বৃদ্ধিৰ চেষ্টা চলাই ব্যর্থ হোৱাৰ পাছত প্রধানমন্ত্রী নৰেন্দ্ৰ মোদীয়ে একাংশ বিৰোধী দলক সমালোচনাৰে থকা-সৰকা কৰে। নিশা ৮-৩০ বজাত এক আধাঘণ্টীয়া ভাষণ দি মোদীয়ে তেওঁৰ চৰকাৰৰ এই অভীষ্ট সিদ্ধি নোহোৱাক লৈ কয়, ‘মহিলাসকলৰ অধিকাৰ কাঢ়ি নিয়াৰ উদ্দেশ্যে বিৰোধীয়ে তেওঁলোকৰ অধিকাৰ ভ্রূণক একপ্ৰকাৰ হত্যা কৰিলে বিৰোধীয়ে।’
দেশবাসীক উদ্দেশ্যি দিয়া ভাষণত মোদীয়ে বাৰম্বাৰ কংগ্ৰেছৰ নাম উল্লেখ কৰে। তদুপৰি তেওঁ কমকৈ হ’লেও তৃণমূল কংগ্রেছ, সমাজবাদী পার্টি, ডিএমকেকো আক্ৰমণ কৰি বক্তব্য আগবঢ়ায়। মমতা বেনার্জী নেতৃত্বাধীন তৃণমূলক কটাক্ষ কৰি তেওঁ কয়, ‘মহিলাসকলক আগুৱাই নিয়াৰ সুযোগ পাইছিল তৃণমূল কংগ্রেছে; কিন্তু সেই সুযোগ তেওঁলোকে নষ্ট কৰিলে। একেই পথ গ্রহণ কৰিলে সমাজবাদী পার্টিয়ে।’
একেদৰে তেওঁ কংগ্ৰেছৰ সহযোগী ডিএমকেকো আক্ৰমণৰ লক্ষ্য কৰি লয়। লক্ষ্যণীয়ভাবে মোদীৰ সমালোচনাত আজি স্থান নাপালে চিপিএম আৰু চিপিআয়ে। একাংশ বিশ্লেষকৰ মতে অসমৰ লগতে কেৰালাৰ নিৰ্বাচন ভোটগ্রহণ ইতিমধ্যে সম্পন্ন হোৱাৰ বাবে মোদীয়ে সচেতনভারে বাঁওপন্থী দল দুটাক সমালোচনাৰ পৰা ৰেহাই দিয়ে। ইয়াৰ বিপৰীতে পশ্চিমবংগ আৰু তামিলনাডুৰ নিৰ্বাচনৰ ভোটগ্রহণ হ’বলৈ বাকী থকাৰ বাবে ৰাজ্য দুখনৰ শাসনাধিষ্ঠ দুই দল ক্রমে তৃণমূল কংগ্ৰেছ আৰু ডিএমকেক তেওঁ কঠোৰ ভাষাৰে সমালোচনা কৰে।
দুয়োটা দলক নাৰী বিৰোধী বুলি অভিহিত কৰে প্রধানমন্ত্রী মোদীয়ে। তীক্ষ্ণ শব্দ প্রয়োগৰে সমালোচনা কৰি তেওঁ লগতে কয়, ‘বিধেয়ক গৃহীত কৰিবলৈ আমাৰ ওচৰত ৬৬ শতাংশ ভোট নাছিল। কিন্তু মই জানো যে এই দেশৰ এশ শতাংশ মহিলাৰ সমৰ্থন আমাৰ স’তে আছিল।’
সমগ্র বিষয়টোক মহিলাসকলৰ প্ৰতি অপমান বুলি আখ্যা দি তেওঁ আৰু কয়, ‘এগৰাকী মহিলাৰ ভুল হ’ব পাৰে; কিন্তু তেওঁ কেতিয়াও অপমান পাহৰি নাযায়। এই ধৰণৰ আচৰণৰ যন্ত্ৰণা দেশৰ মহিলাসকলৰ হৃদয়ত স্থায়ী হৈ ৰ’ব।’
ভাষণত মোদীয়ে সমগ্ৰ দেশৰ মাতৃ-ভগ্নী আৰু কন্যাসকলৰ ওচৰত ক্ষমাও বিচাৰে। কংগ্ৰেছক সংস্কাৰ বিৰোধী দল বুলি কটাক্ষ কৰি মোদীয়ে পুনৰ কয়, ‘কংগ্রেছে যেতিয়াই সংস্কাৰৰ কথা শুনে তেতিয়াই তাক স্থগিত ৰাখিবলৈ সকলো ধৰণৰ চেষ্টা কৰে। মই ভাবিছিলো কংগ্ৰেছে নিজৰ শতিকা প্রাচীন ভুলসমূহ সংশোধন কৰি ল’ব; কিন্তু পৰজীৱীৰ লেখীয়াকৈ কংগ্ৰেছে আঞ্চলিক দলসমূহৰ সহায় বিচাৰি আছে। তেওঁলোকে মহিলাসকলৰ ওচৰ চপাৰ আৰু নতুন ইতিহাস লিখাৰ সুযোগ নষ্ট কৰে।’
সকলো ধৰণৰ চেষ্টা চলায়ো মহিলাৰ বাবে আসন সংৰক্ষণ বিধেয়ক গৃহীত কৰোৱাত ব্যর্থ হোৱা বুলিও মোদীয়ে উল্লেখ কৰে। তৎসত্ত্বেও এই দিশত প্রচেষ্টা থমকি নৰয় বুলি উল্লেখ কৰি তেওঁ লগতে কয়, ‘আসন পুনৰ বিন্যাসক লৈ বিৰোধীয়ে ভুল বুজিছে। দেশৰ মানুহে এই পাপ ক্ষমা নকৰে। মহিলাসকলৰ উত্থান হ’লে পৰিয়ালতান্ত্রিক দলসমূহ বিপদত পৰিব। সেয়েহে বিৰোধীয়ে এই বিধেয়কৰ বিৰোধিতা কৰিলে।’
মোদীয়ে লগতে মন্তব্য কৰে যে নাৰী শক্তিৰ বন্দন সংশোধনী বিধেয়ক হৈছে সময়ৰ প্ৰয়োজন। সমগ্ৰ দেশৰ উত্তৰ, পশ্চিম, পূব, দক্ষিণ সকলো দিশৰ মহিলাসকলৰ সবলীকৰণৰ উদ্দেশ্যে সৎ প্রচেষ্টা হাতত লোৱা হৈছিল বুলি উল্লেখ কৰি তেওঁ কংগ্রেছক নেতিবাচক দৃষ্টিভংগীৰ গৰাকী বুলি সমালোচনা কৰে। আজি দেশে সম্মুখীন হোৱা প্ৰতিটো প্রত্যাহ্বানৰ কাৰণ কংগ্ৰেছৰ নেতিবাচক দৃষ্টিভংগী বুলিও মোদীয়ে অভিযোগ উত্থাপন কৰে।
দেশৰ মহিলাসকলে বিৰোধী দলটোক ইয়াৰ উপযুক্ত প্ৰত্যুত্তৰ দিব বুলিও মোদীয়ে দাবী কৰে। উল্লেখ্য যে এই বিধেয়কৰ জৰিয়তে লোকসভা আৰু বিধানসভাসমূহৰ ৩৩ শতাংশ আসন মহিলাৰ বাবে সংৰক্ষণৰ উদ্যোগ লোৱা বুলি মোদী চৰকাৰে দাবী কৰি আহিছে। অৱশ্যে ২০২৩তে সংসদৰ উভয় সদনত গৃহীত হোৱা নাৰী শক্তি বন্দন বিধেয়কখন বিগত তিনি বছৰে কিয় কাৰ্যকৰী নকৰিলে বুলি চৰকাৰক কালিৰ পৰা প্ৰত্যুত্তৰ দি আহিছে সম্মিলিত বিৰোধীয়ে।
