আজি ঘোষিত উচ্চতৰ মাধ্যমিক চূড়ান্ত পৰীক্ষাৰ ফলাফলে বহু শিক্ষাৰ্থীৰ জীৱনলৈ আনন্দ কঢ়িয়াই অনাৰ বিপৰীতে মৰাণৰ এটি পৰিয়াললৈ নমাই আনিলে সীমাহীন দুখৰ বন্যা ।
মৰাণৰ ডোমৰদলং গাঁৱৰ নিবাসী ৰতন শইকীয়া আৰু প্ৰয়াত জোনালী শইকীয়াৰ কন্যা দিক্ষীতা শইকীয়াই মৰাণ উচ্চতৰ মাধ্যমিক বিদ্যালয়ৰ পৰা এইবাৰ অৱতীৰ্ণ হৈছিল উচ্চতম মাধ্যমিক চূড়ান্ত পৰীক্ষাত ।
আজি ঘোষিত ফলাফলৰ বাবে অধীৰ আগ্ৰহেৰে ৰৈ আছিল দিক্ষীতা । অৱশেষত আহিল ফলাফল । আশা কৰাৰ দৰেই চাৰিটা বিষয়ত লেটাৰ মাৰ্ক সহ ৮০ শতাংশ নম্বৰেৰে প্ৰথম বিভাগত উত্তীৰ্ণ হ’ল দিক্ষীতা । কিন্তু নিয়তিৰ নিষ্ঠুৰ পৰিহাস। সেই ফলাফল ল’বলৈ নাথাকিল মেধাৱী ছাত্ৰীগৰাকী ।
গুৰুতৰভাৱে অসুস্থ দিক্ষীতাক শনিবাৰে ভৰ্তি কৰোৱা হৈছিল চিকিৎসালয়ত । কিন্তু সেইদিনাই পুৱতি নিশা আত্মীয়-স্বজন সকলোৱে কন্দুৱাই নিৰৱে অজান দেশলৈ গুচি গ’ল দিক্ষীতা ।
ফলাফল ঘোষণাৰ দিনটোত আজি হয়তো আনন্দ-উচাহে আৱৰি ধৰিলহেঁতেন ঘৰখন । কিন্তু সেয়া হ’বলৈ নিদিলে বিধাতাই । আজি তাইৰ তিলনি । শোক স্তব্ধ ঘৰখনত আজি নিমাওমাও পৰিৱেশ । দুখৰ বন্যাই ধোৱাই গ’ল সকলোকে । আত্মীয় স্বজন, সহপাঠী সকলোৱেই আজি শোক স্তব্ধ, ভাষাহীন ।