Model Code of Conduct:✒️ভাৰতৰ নিৰ্বাচন আয়োগ(Election Commission of India)ৰ নিৰ্দেশত পশ্চিমবংগকে ধৰি পাঁচখন ৰাজ্যত উঠাই লোৱা হ’ল নিৰ্বাচনী আচৰণবিধি। বিধানসভা নিৰ্বাচন সম্পন্ন হোৱাৰ পাছত আৰু নতুন চৰকাৰ গঠনৰ প্ৰক্ৰিয়া আৰম্ভ হোৱাৰ লগে লগে বৃহস্পতিবাৰে এই ঘোষণা কৰে আয়োগে।
কেৱল পাঁচখন ৰাজ্যই নহয়, যিসমূহ ৰাজ্যত উপ-নিৰ্বাচন অনুষ্ঠিত হৈছিল, সেই স্থানসমূহতো প্ৰত্যাহাৰ কৰা হৈছে আদৰ্শ আচৰণবিধি। এই সন্দৰ্ভত পশ্চিমবংগ, অসম, কেৰেলা, তামিলনাডু, পুডুচেৰীৰ লগতে গুজৰাট, কৰ্ণাটক, মহাৰাষ্ট্ৰ, নাগালেণ্ড আৰু ত্ৰিপুৰাৰ ৰাজ্যিক নিৰ্বাচন আয়োগৰ কাৰ্যালয়লৈ জাননী প্ৰেৰণ কৰা হৈছে। সাত মে’ৰ পৰাই এই সিদ্ধান্ত কার্যকৰী হৈছে।
উল্লেখযোগ্য যে, যোৱা ১৫ মাৰ্চত ভাৰতৰ নিৰ্বাচন আয়োগে (Election Commission of India) বাংলা-সহ পাঁচখন ৰাজ্যৰ নিৰ্বাচনী সূচী ঘোষণা কৰিছিল। তাৰ পিছদিনাৰ পৰাই বলবৎ হৈছিল আদৰ্শ নিৰ্বাচনী আচৰণবিধি।
প্ৰায় দুমাহ ধৰি চলি থকা এই বিধি চাৰি মে’ত ফলাফল ঘোষণাৰ পাছত প্ৰত্যাহাৰৰ সিদ্ধান্ত লোৱা হয়।
তথ্য অনুসৰি ন মে’ত পশ্চিমবংগত নতুন চৰকাৰ গঠন হ’ব । আন ৰাজ্যসমূহতো শীঘ্ৰেই নতুন চৰকাৰৰ শপতগ্ৰহণ অনুষ্ঠান অনুষ্ঠিত হ’ব। সেই পৰিপ্ৰেক্ষিততেই আচৰণবিধি উঠাই লোৱাৰ সিদ্ধান্ত গ্ৰহণ কৰিছে আয়োগে।
বৃহস্পতিবাৰে আয়োগৰ সচিব প্ৰফুল্ল অৱস্থী সংশ্লিষ্ট ৰাজ্যসমূহলৈ এই মর্মে চিঠি প্ৰেৰণ কৰে।
ইফালে, গুজৰাট, কৰ্ণাটক, মহাৰাষ্ট্ৰ, নাগালেণ্ড আৰু ত্ৰিপুৰাত অনুষ্ঠিত উপ-নিৰ্বাচনৰ বাবেও জাৰি আছিল নিৰ্বাচনী আচৰণবিধি। এতিয়া সেইসমূহ ৰাজ্যতো পুনৰ স্বাভাৱিকভাৱে চৰকাৰী আৰু প্ৰশাসনিক সিদ্ধান্ত গ্ৰহণ কৰিব পাৰিব।
তথাপিও আচৰণবিধি প্ৰত্যাহাৰৰ ক্ষেত্ৰত এটা ব্যতিক্ৰম থাকি গৈছে। পশ্চিমবংগৰ ফল্টা বিধানসভা সমষ্টিত ভোটগ্ৰহণৰ সময়ত ব্যাপক অশান্তিৰ অভিযোগ উত্থাপন হোৱাত পুনৰ নিৰ্বাচনৰ সিদ্ধান্ত লৈছে আয়োগে।
২১ মে’ত পুনৰ ভোটগ্ৰহণ আৰু ২৪ মে’ত ফলাফল ঘোষণা কৰা হ’ব। সেইবাবে ফলতা সমষ্টিত এতিয়াও বলবৎ থাকিব নিৰ্বাচনী আচৰণবিধি।