আজি বিয়লি চিৰাং জিলাৰ বিজনীৰ নেতাজী ক্লাবত সদৌ অসম বেংগলী সুৰক্ষা মঞ্চৰ এখন সংবাদমেল অনুষ্ঠিত হয়। এই সংবাদ মেলত মঞ্চৰ সভাপতি উৎপল দেই কয় যে কম দিনৰ ভিতৰত সদৌ অসম বঙালি সুৰক্ষা মঞ্চ আৰু সদৌ অসম বাঙালি সুৰক্ষা সমিতি নামৰ সংগঠন দুটা জাতীয় স্বাৰ্থত জাতীয় অভিৱৰ্তনৰ দ্বাৰা একত্ৰিত হ’ব ৷ লগতে অসমত বঙালীসকলৰ বিৰুদ্ধে ‘ডি’ ভোটাৰ,ডিটেনচন কেম্পৰ সমস্যা,বিদেশী ন্যায়াধিকৰণ সমস্যা আদিৰ কাৰণে যৌথ সংগ্ৰাম কৰাৰ স্বাৰ্থত একত্ৰিতকৰণৰ কথাও নেতাজনে উল্লেখ কৰে ।
উৎপল দে’ই লগতে কয় “সোমবাৰে কোকৰাঝাৰ জিলাৰ গোসাইগাঁৱৰ তুলসীবিলৰ একেটা পৰিয়ালৰ পাঁচজন লোকে আত্মহত্যা কৰা ঘটনা পৰিকল্পিত হত্যাকাণ্ড । উচ্চ শিক্ষিত ছাত্ৰী এগৰাকী কিদৰে আত্মহত্যা কৰিব পাৰে? এই পৰিয়ালটোক পৰিকল্পিতভাৱে হত্যা কৰি আত্মহত্যাৰ ৰূপ দিছে । সামাজিক মাধ্যমত ভাইৰেল হোৱা আত্মহত্যা টোকা সমূহ দুষ্কৃতিকাৰীয়েই কৰিছে যাতে এই পৰিকল্পিত হত্যাক আত্মহত্যাৰ ৰূপ দিয়া যায় ৷”
আনহাতে এই ঘটনাক চিবিআই তদন্তৰ দাবী জনায় উৎপল দে’ই। কাৰণ কেইদিনমান পূৰ্বে জনৈক শীল নামৰ ব্যক্তিজনক অপহৰণ কৰি হত্যা কৰা হৈছিল বুলিও সদৰী কৰে নেতাজনে। কিন্তু ইয়াৰ কোনো তদন্ত নহ’ল । সেয়ে এই ঘটনাৰ চিবিআই তদন্তৰ দাবী জনায়৷” ডিফু মেডিকেল কলেজত মন্ত্ৰী হিমন্ত বিশ্ব শৰ্মাই কোচ ৰাজবংশী,চুতীয়া আদি জনগোষ্ঠীৰ বাবে আসন সংৰক্ষণৰ বিষয়ে কয় যে মেডিকেল কলেজ হিমন্তৰ পৈত্ৰিক সম্পত্তি নহয় যে যাকে ইচ্ছা তাৰ নামত সংৰক্ষণ কৰিব ।
বঙালীসকল,নাথযোগী বা অন্যান্যসকল অসমবাসী নহয় নেকি ? বাকী সকল অসমৰ খিলঞ্জীয়া নহয় নেকি বুলি প্ৰশ্ন কৰি কয় যে মন্ত্ৰী শৰ্মাই নিজৰ পৈত্ৰিক সম্পত্তিৰ দৰে মেডিকেল কলেজৰ আসন সংৰক্ষণ কৰাটো অনুচিত হৈছে । অইন জনগোষ্ঠীৰ ল’ৰা ছোৱালীয়ে মেডিকেলত শিক্ষা গ্ৰহণৰ অধিকাৰ নাই নেকি বুলিও প্ৰশ্ন কৰে।
লগতে তেওঁ কয় ” বাকী জনগোষ্ঠীৰ ল’ৰা-ছোৱালী ঠেলা-ৰিক্সা চলোৱাটো বিচাৰে হিমন্ত বিশ্ব শৰ্মাই । নিজৰ ৰাজনৈতিক উদ্দেশ্য লৈ কেইটামান জনগোষ্ঠীক বাছি লোৱাৰ ধিক্কাৰ জনায় উৎপল দেই। তেওঁ মিঞা মিউজিয়াম সন্দৰ্ভত কয় যে বৰাক ভেলীৰ বিধায়ক কমলাক্ষ পুৰকায়স্থই বেংগলী মিউজিয়াম বিতৰ্ক উলিয়াইছে । ইমান দিন নীৰৱে থকা বিধায়কজন এতিয়া ক’ৰ পৰা ওলাল বুলিও প্ৰশ্ন কৰে ।
১২ লাখ হিন্দু বঙালীৰ নাম এন আৰ চিৰ পৰা কৰ্তন হৈছে তেতিয়া ক’ত আছিল এই জন বিধায়ক ? প্ৰতিদিনে বিদেশী জাননি পোৱা বঙালীৰ হৈ মাত নমতা বিধায়ক জনে ভোটৰ স্বাৰ্থত বঙালী মিউজিয়ামৰ দাবী কৰিছে ।”
ইপিনে পুৰকায়স্থক সকীয়াই কয় যে “তেওঁ বঙালীৰ অভিভাৱক নহয় । মিউজিয়ামৰ নামত অসমীয়া বঙালীৰ সংঘাত কৰিব বিচাৰিছে । বঙালীসকলৰ কোনো মিউজিয়ামৰ প্ৰয়োজন নাই। কাৰণ বিশ্বৰ দুই নম্বৰ স্থানত আছে বঙালীসকল । গতিকে আমি মিউজিয়াম নিবিচাৰো আমি বঙালীসকলে বিচাৰো নিজৰ স্বাভিমান, অধিকাৰ লৈ মূৰ দাঙি জীয়াই থকাটোহে ।
বিদেশীৰ নামত হাৰাশাস্তি বন্ধ হ’ব লাগিব, বিদেশী ন্যায়াধীকৰণ,ডিটেনচন শিবিৰ বন্ধ হ’ব লাগিব। প্ৰতিজন বঙালীৰ নাম থাকিব লাগিব এন আৰ চিত । গতিকে এই ধৰণৰ মূল সমস্যা এৰি মিউজিয়ামৰ বিতৰ্ক এৰিবলৈ সকিয়াই দিয়ে । বিজেপি চৰকাৰক সমালোচনা কৰি কয় যে বিজেপিৰ ৰাজ্যিক সভাপতি ৰঞ্জিত দাসৰ সমষ্টিত লাখে লাখে হিন্দু বঙালিক বিদেশী জাননী দি আছে ।
গতিকে বিজেপিক সকিয়াই দি কয় যে ২০২১ ৰ বিধান সভা নিৰ্বাচনৰ দিন চমুচাপি আহিছে যিমান জাননি দিব পাৰে দি থাকক । এইবাৰ ভাৰতীয় গণ পৰিষদৰ হৈ আপোনালোকৰ বিৰুদ্ধে তীব্ৰ যুঁজ হ’ব । এই অন্যায়ৰ প্ৰত্যুত্তৰ দিয়া হ’ব ভোটেৰে । বিজেপিৰ মিছলীয়া প্ৰধানমন্ত্ৰী নৰেন্দ্ৰ মোদীয়ে বিজেপি আহিলে বিদেশী সমস্যাৰ সমাধান কৰাৰ কথা কৈছিল ৷বঙালীসকলৰ বাবে ডিটেনচম কেম্প দিছে বিজেপিয়ে ।
অসমৰ সকলো জাতি জনগোষ্ঠীৰ বাবে স্বায়ত্ব শাসন দিয়াৰ বিপৰীতে বঙালীসকলৰ বাবে ডিটেনচন কেম্প নিৰ্মাণ কৰি আছে এই মিছলীয়া প্ৰধানমন্ত্ৰীয়ে । গতিকে বঙালী সুৰক্ষা মঞ্চই সকীয়াই দি কয় যে জাতিৰ বাবে কৰিম জাতিৰ বাবে মৰিম । ইয়াৰ বাবে যিকোনো পৰিস্থিতিৰ সৃষ্টি হ’লে তাৰ বাবে চৰকাৰ দায়ী হ’ব লাগিব বুলি সকিয়াই দিয়ে উৎপল দেই ।
এই সংবাদ মেলত সদৌ অসম বঙালী সুৰক্ষা মঞ্চৰ চিৰাং জিলা সাধাৰণ সম্পাদক বিশ্বজিত ৰজক,সদস্যসকল ক্ৰমে পৱন তৰফদাৰ,মিথুন ঘোষ উপস্থিত থাকে৷