সমাগত দীপান্বিতালৈ হাতত মাথো আৰু কেইটামান দিন বাকী । অসমৰ অন্যান্য প্ৰান্তৰ লগতে জামুগুৰিহাটৰ মৃৎ শিল্পী সকলো এতিয়া পোহৰৰ উৎসৱ দীপাৱলী উপলক্ষ্যে মাটিৰ চাকি তৈয়াৰ কৰাৰ কামত ব্যস্ত হৈ পৰিছে । দীপাৱলী উপলক্ষ্যে জামুগুৰিহাটৰ দুগৰাকী মহিলা মৃৎ শিল্পীয়ে এইবাৰ এক লাখ মাটিৰ চাকি তৈয়াৰ কৰা কাম ইতিমধ্যে সম্পূৰ্ণ কৰি তুলিছে ।
জামুগুৰিহাটৰ গোপালপুৰৰ ৰূপা পাল শইকীয়া নামৰ মহিলাগৰাকীৰ লগতে তেওঁৰ মাতৃয়ে যুটীয়াভাৱে এইবাৰ দীপাৱলী উপলক্ষ্যে এক লাখ গচা মাটিৰ চাকি তৈয়াৰ কৰি বিভিন্ন স্থানলৈ বিক্ৰীৰ বাবে প্ৰেৰণ কৰিছে । বিশ্বনাথ ঘাটৰ পৰা মাটি মগাই আনি সেই মাটিৰে তৈয়াৰ কৰা চাকিসমূহ ইতিমধ্যে জামুগুৰিহাটৰ লগতে কুসুমটোলা, চতিয়া, ধলাইবিলৰ লগতে জিলাখনৰ বিভিন্ন স্থানলৈ প্ৰেৰণ কৰা হৈছে । মহামাৰী কৰ’নাই বিগত দুটা বছৰ এইসকল মৃৎ শিল্পীৰ জীৱনলৈও চৰম বিপৰ্যয় নামি অনাৰ পাছত এইবাৰ দীপাৱলী উপলক্ষ্যে মাটিৰ চাকি তৈয়াৰ কৰি বিক্ৰী কৰিব পাৰি উৎফুল্লিত হৈ পৰিছে এই দুগৰাকী মহিলা মৃৎ শিল্পী ।
জামুগুৰিহাটৰ অন্যতম মহিলা মৃৎ শিল্পী ৰূপে পৰিচিত ৰূপা পাল শইকীয়াই কয়, ‘বহু বছৰ ধৰি এই শিল্পৰ লগত জড়িত যদিও শেহতীয়াকৈ মৃৎ শিল্পৰ প্ৰতি ভাবুকি নামি আহিছে ৷ বজাৰত বহিঃৰাজ্যৰ প্লাষ্টিক চাকি সোমাই পৰাত মাটিৰ চাকিৰ প্ৰতি একাংশ লোকৰ আকৰ্ষণ কমি যোৱা বুলিও মন্তব্য কৰে ৷ ইয়াৰ উপৰি চাকি তৈয়াৰ কৰিবৰ বাবে জামুগুৰিহাটৰ পৰা প্ৰায় ৪০ কিলোমিটাৰ দূৰত্ব বিশ্বনাথ ঘাটৰ পৰা কেচা মাটি আনিব লগা হোৱাত আমাৰ খৰছো বৃদ্ধি পাইছে ৷ সেয়ে চাকিৰ মূল্যও আমি কিছু পৰিমানে বৃদ্ধি কৰিব লগা হয় যদিও গ্ৰাহক ৰাইজে সেই মূল্যত দিবলৈ অমান্তি হয় ৷ তথাপি গ্ৰাহকক সন্মত কৰি আমি এই শিল্প জীয়াই ৰাখিছো ৷’
ৰূপা পাল শইকীয়া আৰু কয়, ‘এই শিল্পৰ জৰিয়তে আমাৰ জীৱন নিৰ্বাহ কৰিবলৈ কিছু অসুবিধা হয় ৷ চৰকাৰে যদি আমাক কিছু আৰ্থিক সহায় আগবঢ়োৱাৰ লগতে এই সামগ্ৰী বিক্ৰীৰ এখন বজাৰ সৃষ্টি কৰি দিয়ে আমি উপকৃত হ’ম ৷ কিয়নো স্থানীয় কোনো বেংকে আমাক ঋন নিদিয়ে ৷ বেংকৰ পৰা ঋণ বিছাৰি আমি ভাগৰি পৰিলো ৷ বিভিন্ন বে-চৰকাৰী বিত্তিয় প্ৰতিষ্ঠানসমূহে সামান্য ঋন প্ৰদান কৰে যদিও অধিক সুদ দিবলগীয়া হোৱাত আমি প্ৰায়ে সমস্যাৰ সন্মুখীন হ’বলগীয়া পৰিস্থিতি সৃষ্টি হৈছে বুলি মন্তব্য কৰে ৰূপা পাল শইকীয়াই ৷
ক’ভিডৰ ভয়ানক সংক্ৰমণে আমাৰ জনজীৱন স্তব্ধ কৰি দিয়াৰ পাছত শেহতীয়াকৈ চৰকাৰে বিভিন্ন পূজা-পাৰ্বন তথা উৎসৱসমূহ উদযাপন কৰিবলৈ দিয়াত আমি অতিশয় সুখী বুলিও মন্তব্য কৰে ৰূপা পাল শইকীয়াই ৷ আনহাতে, এই থলুৱা লোক শিল্পসমূহ জীয়াই ৰখাৰ ক্ষেত্ৰত চৰকাৰে এক সুপৰিকল্পিতভাৱে আচঁনি গ্ৰহণ কৰাৰো দাবী জনাইছে জামুগুৰিহাটৰ টুপিয়া নিবাসী শিক্ষক সমাজকৰ্মী নিতুমনি বৰাৰ লগতে কোচগাঁও নিবাসী বিশিষ্ট নাট্য কৰ্মী শৈলেন বৰকটকীয়ে ৷