Theft:
মহানগৰীৰ স্মাৰ্ট আৰক্ষীক চেলেন্স দি দুৰ্বৃত্তই ইটোৰ পিছত সিটোকৈ অপৰাধমূলক কাৰ্যকলাপ অব্যাহত ৰখাৰ মাজতে আজি পুনৰ দুৰ্বৃত্তই গহনা ক্ৰয় কৰাৰ অচিলা লৈ কৌশলৰে লুট কৰি নিয়ে সোণৰ গহণা ৷
প্ৰাপ্ত খবৰ মতে,সাতগাঁও ৰে’ল গেইটৰ সমীপতে থকা বিনায়ক জুয়েলাৰী খনত বাইকত অহা দুই যুৱকে গহণা কিনাৰ চলেৰে দোকান খনত সোমাই।
ADVERTISEMENT
দুই যুৱকৰ এজনে সোণৰ লকেট চাই থকাৰ মাজতে আন এজনে সোণ চেইন এডাল অতি কৌশলৰে পকেটত সোমাই লয় ৷ পিছত দুই যুৱক গহণা পচন্দ হোৱা নাই বুলি কৈ দোকান খনৰ প্ৰস্থান কৰে ৷
আনহাতে যুৱক দুজন প্ৰস্থানৰ পিছতে জুয়েলাৰী খনৰ চেলচমেন জনৰ দৃষ্টিগোচৰ হয় যে যুৱকজনৰ এজনে সোণৰ চেইন চুৰি কৰি নিছে। আনকি চুৰি কৰাৰ দৃশ্য বন্দী হয় জুয়েলাৰী খনৰ চি চি টিভিত ৷
ঘটনা সন্দৰ্ভত ইতিমধ্যে বিনায়ক জুয়েলাৰীৰ স্বত্বাধিকাৰীয়ে সাতগাঁও থানাত এজাহাৰ দাখিল কৰিছে ৷
উল্লেখ্য যে মহানগৰীত চিলনী চোৰে বাইক চলাই থকা অৱস্থাত ৰাজপথেদি খোজ কাঢ়ি যোৱা যুৱতী-মহিলাৰ পৰা সোণৰ চেইন কাঢ়ি নিয়াৰ পিছত এইবাৰ চোৰে সলাইছে চুৰি কাৰ্যৰ ন ন কৌশল ৷
